Til I wex wery of the worlde · and wilnes eft to slepe.

And lened me to a lenten · and lang tyme I slepte

And of cristes passiou(n) and penaunce · þe peple þ(a)t of taughte

Reste me ther and rutte faste ˜ til ramis palmar(um)

Of gerles and of gloria laus gretely me dremed

And how ozanna by organye olde folkes so(n)gen

¶ Oon semblable to the samaritan · and somdel to piers plowma(n)

Barfoot and oon an asse bake · boteles gan prike

With-outen spores other spere · spaklich he loked

As is the kynde of a knyght · that comes to dubbed

To getten hym gilte spores · and galoches ycouped

Than was faith in a fenestre · and crie a fili dauid

As doos an heraud of armes · whan aunterous comes to Iustes

Olde Iewes of Ier(usa)l(e)m · for Ioie thay songen~

Benedictus qui venit in no(m)i(n)e d(omi)ni & c(etera)

¶ That I frayned at faith · what al that fare bymente

And who shulde Iuste In Ierusalem · Ih(es)us he saide

And fecche that the fende claymeth · Piers fruyt the plowma(n)

¶ Is piers in this place quod · and he preynt on me

This Ih(es)us of his gentries · wol Iuste in piers armes

In his helme and hise haubergeon · humana natura

That crist be nouȝt yknowe here · for consumatus est

In piers paltok the plowman · this priker shal ride

For no dynte shal hym dere · as in deitate p(at)ris

¶ Who schal Iuste with Ih(es)us quod I · Iewes or scribes

¶ Nay quod he the foule fend ˜ and fals dom and deth

Deth sayes he shal for do · and a-doun brynge

Al that lyues or lokes in londe or in watre

Lif saith that lieth · and layes his lif to wedde

That for al that deth kan doo with-Inne thre dayes

To walke and fecche fro þe fend Piers fruyt þe plowman

And legge it ther hym liketh · and lucifer bynde

And for to bete and a-doun bryng · bale det for euere

O mors ero mors tua & c(etera)

¶ Than com pilatus with pepil Sedens p(ro) tribunali

To se how dowtilich deth schol do · and deme hir brotheres right

The Iewes and the Iustices · ayeins Ih(es)u thay were

And al the court on hym cried ˜ Crucifige sharpe

Tho putte hym forth a pilo(ur) · bifore pilat and saide

This Ih(es)us of oure Iewes peple Iaped and dispised

To fordon it on a day · and in thre dayes after

Edifie it eft newe · here he standes that saide it

And yet maken it as muche in al manere poyntes

Bothe as longe and as large · by loft and by grounde

Crucifige quod a cacchepol · I warant hym a wecche

Tolle tolle quod another · and took of kenne thornes

And bi-gan of kene thorn a garland to make

And set it sore on is hed · and saide in Enuye

Aue rabi quod that ribaud ˜ and threw rides at hym

Nayled hym with thre nayiles · naked on the rode

And poiso(n) on a pole ˜ they putte vp to hisse lippes

And bede hym drynke his deth yuel · hise dayes were doon

And if thow suttel be · helpe now thy-seluen.

If þ(o)u be crist and kynges sone · com doun of the rode

Than shul we leue that lif the loueth · and wol nouȝt lete the deye

Consumatu(m) est quod crist · and comsed for to swowen

Pitousliche and pale · as a prison that deyeth

The lorde of lif an of light tho leyde hise eighen togideres

The day for dred · with-drouȝ · and derk becam the sonne

The wal wagged and clef · and al the word quaued

Dede men for þ(a)t dyne · com out of depe graues

And tolde why þ(a)t tempeste · so longe tyme dured

For a bitter bataille · the dede body saide

Lif and deth in this derknesse · hir oon fordoth hir other

Schal no wight wit wit(er)ly · who shal haue the maistrie

Er sonday aboute sonne risyng · and sank w(i)t(h) þ(a)t til erthe

Som saide that he was goddes sone · that so faire deyed

vere filius dei erat iste & c(etera)

¶ And some saide he was a wicche ˜ good is þ(a)t we assaye

Were he be dede or nought ded · doun er he be taken

¶ Two theues also tholed deth þ(a)t tyme

vp-on a cros biside crist · so was the co(mun)e lawe

A cacchepolle cam forth · and craked bothe hir legges

And hir armes after · of either of the theues

And was no boy so bolde · goddes body to touche

For he was knyght and kynges sone ˜ kynde foryaf þ(a)t tyme

That non harlot were so hardi to lay hand vp-on hym

¶ And ther cam forth a knyght with a kene spere ygrounde

Highte longeus as the l(ett)re telleth and longe had lore his sighte

Bifore pilat and other peple · in the place he houed

Maugre hise many tethe · he was made þ(a)t tyme

To take the spere in his hande and Iusten with Ih(es)us

For al thay were vnhardy · þ(a)t houed on hors & stoode

To touchen hem or tasten hym · or take(n) hy(m) doun on rode

Bot this bly(n)de bachiler · þane bare hy(m) thurȝ the herte

The blode spronge doun by þe sper · and vnspered hise eighe(n)

Than fel the knyȝt vp-on knes · and cried hym mercye

Ayein my wille it was lord to wounde yow so sore

How he seighed and saide sore it me a-thenketh

For þe dede þ(a)t I haue don I do me in youre grace

Haue on me reuthe rigful Ih(es)u · and right w(i)t(h) þ(a)t he wepte

¶ Than gan faith felli the fals Iewes despise

Called hem caytyues acorsed for euere

For this foule vilanie · vengeaunce to yow alle

To do the blynde bete hym ybounde it was a boys co(n)nseil

Cursed caytif knyghthode was it neuere

To misdo a dede body · by day or by nyght

The grythe ye hase he geten · for al his grete wounde

For youre champeou(n) chiveler chief knyght of yow alle

yelde hym recreaunt rennyng · right at Ih(es)us wille

For be derkenesse ydo · his deth worth a-venged

And lordeyns · han ylost ˜ for lif shal haue the maistre

And yore fraunchise that free was · fallen is in thraldom

And ye clerkes and youre children · chieue shul ye neu(er)e

Ne haue lordschip in honde · ne no londe tilye

But al bareyne be · and vsurie vsen

Which is lif þ(a)t oure lord · in alle lawes a-corseth

Now youre good dayes aren don · as daniel p(ro)phecied

Whan crist cam hir kyngdome · and crowne shuld iesse

Cum veniat s(an)c(t)us s(an)c(t)or(um) cessabit vnxio v(est)ra~

¶ What for fere of this ferly · And of the false Iewes

I drew me in þat derknesse · to descendit ad in-ferna

And ther I saugh sothely · s(e)c(un)d(u)m sc(ri)pturas

Out of the west coste · a wenche as me thoughte

Com walkyng in the way · to helleward scho loked

Mercy highte that maide ˜ a meke thyng with alle

A ful benigne birde · and buxom of speche

¶ Hir syster as it semed · com softily walkyng

Euene out of the Est and westward she loked

A ful many creatur treuthe she highte

For þe virtue that hir folwed · a-ferde was sche neuer

¶ Whan thise maidens mette mercy and trouthe

Either asked other · of þis gret wondire

Of the dyn and the derkenesse · and how þe day rowed

And wich a light and a leme · lay bifore helle

Ich haue ferly of this fare · in faith saide treuthe

And am wendyng to wite what this wondire meneth

¶ haue no m(er)ueill quod m(er)cy ˜ murthe it bitokne

A Maiden þ(a)t hatte marie · and moder w(i)t(h)-outen felyng

Of any kynnes creature · conceyued thurgh spech

And g(ra)ce of the holy gost wex grete with childe

With-outein · wem in-to this world ˜ she brouȝt hym

And that my tale be trew I take god to witnesse

Sit this barn was born · ben thretty wynter passed

Wich deyed and tholed this day aboute mydday

And that is cause of this clipse · þat closes now the sonne

In menyng that man shal · fro merkenesse be drawe

The while this light and this lem shal lucifer ablonde

For patriarkes and p(ro)phetes · hand p(re)ched her-of often

That man shal man saue · thurgh a maidens helpe

And that was tynt thurȝ tree · tree schal it wynne

And that dethe dooun broughte · deth schal releue

¶ That thow tellest quod · it is but a tale of tale of

For adam and Eue · and abrah(a)m with other

Pat(ri)arkes and p(ro)phetes · that in payne liggen

Leue thow neuer that yon light ˜ a-loft schal brynge

Ne haue hem oute of helle ˜ holde thy tonge mercye

It is bot a tryfule that thow tellest · I trought woot þe soth

For þ(a)t is ones in helle · out comes it neuere

Iob the p(ro)phete patriarke · reproues thi sawes

Quia in inferno nulla est redempc(i)o

¶ Than mercy ful myldly ˜ mouthed thise wordes

Thurgh exp(er)ience quod she · I hope thay shul be saued

For venym fordoos venym ˜ and that I proue by resou(n)T

For of all venym foulest is the Scorpiou(n)

May no medicyne helpe the place · ther he styngeth

Til he be ded and do ther-to · þe yuel he destroyeth

The first venymouste · thurgh venym of hym-selue

So shal this deth fordo · I dar my lif legge

Al þ(a)t deth dide first · thorugh the deueles entisyng

And right as thurgh gile man was bigiled

So shal g(ra)ce that bigan · make a good sighte

ars vt artem falleret

¶ Now suffere we saide treuthe · I se as me thynketh.

Out of the nyppe of þe North · nouȝt ful fer he(n)nes

Rightwisnesse cam rennyng reste we the wille

For he woot more than we · he was or we bothe

¶ That is soth saiede mercy · and I se here bisouthe / bi southe

Were pees cometh pleyng · in pacience yclothed

Loue hase coueited hir longe · leue I non other

But he sent hir som l(ett)re · what this light by-meneth

That ouer houeth helle thus · she vs schal telle

¶ Whan pees in pacience yclothed · approched neiȝ hem twayne

Rightwisnesse hem reu(er)enced · for hir riche clothynge

And prayed pees to telle hir to what place she wolde

And in hir gay garnementz ˜ whom she grete thoughte

¶ Mi wille his to wende quo she · and welcom hem alle

That many day miȝt I nouȝte se · for merknesse of synne

Adam an Eue · and other mo in helle

Moises and many mo mercy schul haue

I shal daunce þer-to · do thow so suster

For Ih(es)us Iusted wel · Ioie bigynnes dawe

ad vesp(er)um demorabitur fletus & ad matutinu(m) liticia

Loue þat is my lemman · swiche l(ett)res me sente

That mercy my syster and I · mankynde schude saue

And that god hase forgyuen · and gunted me pees and mercye

To be mannes meynp(er)o(ur) · for euer more after

Lo here the patent q(uod) pees · in pace in idip(su)m

And that this dede shal dure Dormiam & requiescam

¶ What rauestow quod rightwisnesse · or thow art right dronke

Leuestow that yond light · vnloke mighte helle

And saue mannes soule · syster wene it neuere

Atte bigynnyng god yaf · the dome hym-selue

That adam and Eue · and alle that hem sulked

Shul deye doun-right · and dwelle in peyne after

If þ(a)t þey touched a tre · and þe fruyt eten

Adam afterward ayeins his defense

Freet of þ(a)t fruyt · and forsoke as it were

The loue or oure lord · and his lore bothe

And folowed þ(a)t the fende tauȝt · and hise felawes wille

Ayeins reson and rightwisnesse · record þus w(i)t(h) treuthe

That hir peyne be p(er)petuel · and no prayer hem helpe

For-thy lat hem chewe as þei chose · and chide we nouȝt syster

For it is boteles bale · the bite þ(a)t they eten

¶ And I schal proue q(uod) pees ˜ hir peyne mote haue an ende

And wo in-to wel · mowe wende at þe laste

For had thay wist of no wo · wel had þey nouȝt knowen

For no wight woot what wel is · þ(a)t neuere wo suffred

Ne what is hote hunger þ(a)t had neuere defaute

If no nyght ne were no man is as I leue

Shulde wite witterly what day is to mene

Shuld neuer riȝt riche man · that lyueth in reste and ese

Wite what wo is ne wel · ne were þe deth of kynde

So god that bigan al · of his good wille

Bicam man of a mayde(n) mankynde to saue

And suffred to be sold · to se the sorwe of deyinge

The which vnknyttes al care · and comsyng is of reste

For til modicu(m) met with vs · I may it wel auowe

Woot no wight as I wene · what is ynough to mene

For-thi god of his goodnesse · the first gome Adam

Sette hym in solace · and in sou(er)eigne myrthe

And syne he suffred hym synne · sorwe to fele

To wite what wel was ˜ kyndelich to knowen

And after god graunted hym-self · and toke adamse kynde

To wite what he hase suffred · in the sondry places

Bothe in heuene and in erthe · and now til helle he thynketh

To wite what {i}al wo is · that woot of al Ioie

So it shal fare by this folk ˜ hir folie and hir synne

Shal lere hem what lango(ur) is · and lisse with-outen ende

Woot no wight what werre is · þer þ(a)t pees regnees

Ne what is wit(er)ly wele · til weylawey hym teche

¶ Than was ther a wight ˜ with twa brad eighen

Book highte that beaupere · a bold man of speche

By goddes body quod this book · I wol bere witnesse

That tho this barne was ybore · ther blased a sterre

That alle the wise of this world · in oo wit acorden

That swich a barne was born · in bedlem Citee

That mannes saule schuld saue · and synne distruyeT

That he was god that al wrouȝte · the welkne firste schewed

Tho þat weren in heuene · token stella comata

And tenteden hir as a torche · to reu(er)encen his byrthe

The light folowed þe lord · in-to þe low erthe

¶ That water witnesse þ(a)t he was god · for he wente on it

Peter þe apostle p(ar)ceyued his gate

And he wente on the wate · wel hym knewe and saide

Iube me venire ad te sup(er) aquas

¶ And lo how the sonne gan louke hir light in hir-selue

Whan she seigh hym suffre · that sonne and se made

¶ The erthe for buxomnesse · þ(a)t he wolde suffre

Quaked as quik thyng · and al biquasshed þe roche

Lo helle myghte nought holde but opned þo god tholed

And leet out simondes sones to seen hym hange on rode

And now schal lucifer leue it · þouȝ hym loth thynke

For gigas the giaunt · with a gynne engyned

To breke and to bete adoun · þat ben ayeins Ih(es)usT

And I book wol be brente · but Ih(es)us rise to lyue

In alle myghtes of man ˜ and his moder gladye

And conforth al hys kynne · and oute of care bynge

And al þe Iewen Ioie vnioignen and vnlouken

¶ And bot thay reu(er)ence his rode · and his resurreccion

And leuen on a newe lawe · be lost lif and soule

Al this I book witnesse · and yet muche more

¶ Suffire we saide trouthe · I here and see bothe

How a spirit spekees to helle ˜ and biddes vnsper(e) the yates

Attolite portas & c(etera)

A voice loude in that light · to lucifer cried

Princes of this place vnpynneth and vnlouken

For hire comes with crowne · that kyng is of glorie

¶ Than siked sathan and saide to hem alle

Swich a lighte ayeins oure leue lazar it fette

Care and combraunce · is come to vs alle

If this kynge come Inne · mankynde wol he fecche

And lede it ther hym liket · and lightilich me bynde

Patriarkes and p(ro)phetes han p(ar)led here of lange

That swich a lorde and a light · shol ledde hem alle hennes

¶ Listnes q(uod) lucifer · for I this lord knowe

Bothe this lord and this light · is longe ago I knewe hym

May no deth hym dere · ne no deueles queyntise

And where he wol is his way · and ware hym of the p(er)iles

If he reuees my right · he robbees me by maistrie

For by ryght and reson the renkes þ(a)t ben here

Body and soule ben myn ˜ bothe good and illeT

¶ If adam ete the appul · al scholde deye

And dwelle with vs deuels · this thretyng he made

And he þ(a)t sothnesse is · saied thise wordes

And sitthen he seised{CHECK MS} · seuen hundereth wynter

I leeue that lawe nyl nouȝt · lete hym the leste

¶ That is soth saide sathan ˜ but I me sore drede

For thow gate hym with gile · and his gardyng brake

And in liknees of a Nedder · sat on þe appultre

And eggest hem to ete eue ˜ by hir-selue

And toldest hir a tale · of treson were þe wordes

And so þ(o)u haddest hem out and hider atte laste

It is nouȝt graithly geten ; ther gile is the rote

For god wol nouȝt be {nouȝt} bigiled ˜ quod Gobelyn ne biIaped

Whe haue no trewe title to hem ˜ for þurȝ treson were þey da(m)pned

Certes I drede me quod þe deuel · lest treuthe wyl hem fecche

Oute of oure poustee · and leden hem hennes

¶ Thise thritty wynter al I wene · hase he gane & p(re)ched

I haue assoilled hym with synne · and som tyme I asked

Where he were god or goodes sone · he gaf me schort answer

And thus hase he trolled forth · thise twa and thritty wynter

And whan I seigh it was so ˜ slepyng I wente

To wrne pilates wif · what doon man was Ih(es)us

For Iewes hated hym ˜ and han doon hym to deth

I wolde haue lenged his lif · for I leued if he deyed

That his soule walde suffre no synne in his sighte

For the body while it on bones yede · a-boute was euere

To saue men fro synne ˜ if hem-self wolde~

And nowe I se where a soule comees · hiderward seillyng

With Ioie and with grete light · god it is I woot wel

I rede we fle quod he · faste alle hennes

For vs were bettre nouȝt be · than biden his sighte

For thy lesynges lucifer · lost is alle our praye

Fyrst thorugh the we fellen fra heuene so heigh

For we leued thy lesynges ˜ yloste we haue adam

And alle oure lordschp · I leue ˜ a lond and a water

Nu(n)c princeps hui(us) mu(n)di eicietur foras

¶ Efte þe lighte bad vnlouke · and lucifer answerd

What lord artow quod lucifer · quis est iste

Rex glorie · the lighte soon saide

And lord of myght and of mayn · and alle man(er)e v(er)tues; d(omi)n(u)s v(er)tutum

dukes of thys dym place ˜ anoon vndo thise yates

That crist may come Inne · the kynges sone of heuene

And with that breth helle brake · with belial barres

For any wy or warde · wide open the yates

Patriarkes and p(ro)phetes populus in tenebris

Songen saynt Ioh(a)nes song Ecce agnus dei

Lucifer loke ne myȝte · so light hym a blyndyde

And tho that oure lord loued · in-to his lighte he tooke

And saied to sathan · lo here my soule to amendes

For alle synful soules to saue þo þat ben worthy

Myn thay be and of me · I may the bett(er) hem clayme

Alle þouȝ reson record ; and riȝt of my-selfe

That if thay ete þe appul · alle sholde deye

I bihighte hem nouȝt here · helle for euere

For the dyede þ(a)t thay dide · thy deceite it made

With gile thou hem gate · ayein al reson

For in my palace p(ar)adis ˜ in p(er)sone of an adder

Falslich þ(o)u fettest þer · thyng þ(a)t I loued

¶ Thus ylike a lusarde with a lady visage

Theflich thow me robbedest · þe olde lawe g(ra)untteth

That gilours be bigiled ˜ and þ(a)t is good reson

Dentem p(ro) dente & oculum p(ro) oculo

¶ Ergo soule schal saule quite · and synne wende

And al that man hase mysdon ˜ I man wyl amende

Membre for Membere by þe olde lawe · was amendes

And lif for lif also · and by that lawe I clame it

Adam and al his issue ; at my wille here-after

And þ(a)t deth in hem fordide · my deth shal releue

And bothe quykee and quyte ; that queynche was thorugh synne

And that g(ra)ce gile distroyed ˜ good faith it askes

So leue I nouȝt lucifer ˜ ayein the lawe I fecche thaym

Bot by right and {by} reson · raunsou(n) here my lieges

Non veni soluere legem set adimpler(e)

¶ Thow foched myn in my place ayeins al resou(n)

Falslich and felou(n)lich ˜ good faith me it taughte

To recou(er)e thaym thurgh raunson · and by no reson elles

So þ(a)t thurgh gile thow gate · thurgh g(ra)ce {it} is it wo(n)ne

Thow lucifer in liknesse · of a lyther adder

Gatest by gile tho ˜ that god louede

¶ And in liknesse of leod that lord am of heuene

Graciuslich thy gile haue quyt · go gile ayin gile

And as Adam and alle other · thurgh a tree deyden

Adam and alle thurgh a tre · schal torne ayein to lyue

And gile is bigilde and in his gile fallen

Et cecidit in foueam qua(m) fecit

Now bigynnes thy gile ayein the torne

And my grace to growe · ay gretter and widder

The bitternesse þ(a)t thow browe · brouke it thy-seluen

That art doctur of deth · drynke þ(a)t thow madest

¶ For I that am lord of lif · loue is my drynke

And for that drynke to-day ˜ I deyed vp-on erthe

I faughte so me thryste yet ˜ for mannes soule sake

May no drynke me moiste · ne my thryst slake

Til the vendage falle ˜ in þe vale of Iosaphat

That I drynke right ripe muste resureccio mortuor(um)

And thanne shal I come as a kyng crowned with aungelles

And haue out of helle ˜ alle manere saules

¶ Fendes and fyndekynes · bifore me shul stande

And be at my biddyng wher-so-euer me likees

And to be merciable to man · thanne my kynde it askese

For we ben brethren of blode · bot nouȝt in baptym alle

And alle þ(a)t ben myn hole brethren in blode and in baptisme

Schal nouȝ be dampned to þe deth · þ(a)t is with-outen ende

Tibi soli peccaui & c(etera)

¶ It is nouȝt vsed in erth to hangen a felon

Ofter than ones ˜ though he were a traitur

And if the kyng of {of} that kyndome · come in that tyme

Ther the felon thole scholde · deth or other-wise

Lawe wolde he geue hym lyue · if he loked on hym

And I that am kyng of kynges · schal come swich a tyme

Wher doom to the deth · dampnes al wikked

And if lawe wol I loke on hem ˜ it lyth in my g(ra)ce

Wheither thay deye or deye nouȝt · for þ(a)t thay diden illeT

Nullum malum impunitum & c(etera)

Thay shul be clensed clerelich · and wasshen of hire synnes

In my prisou(n) purgatorie · til parce it hote

And my mercy schal be shewed ˜ to many of my brethren

For blood may suffre blood · both hungre and a calde

And blood may nouȝt se blood · blede bot it rewe

Audiui archana verba que non licet homini loqui

¶ And my rightwisnesse · and right · schal reule all helle

And mercy al mankynde · biforme / bi forme in heuene

For I ware an vnkynde kyng · bot I my kynde helpe

And mandlich at silke a nede ˜ ther nedes helpe bhouees

Non intres in iudiciu(m) cum seruo tuo

¶ Thus by lawe quod oure lord · lede I wol fro hennes

Tho that me loued · and leuyd in my comynge

And for thy lesyng lucifer · that þow leighe til Eue

Thow shalt abye it bitter · and bonde hym with cheynes

Astoroth · and al the route ˜ hidden thaym in hyrnes

Thay dorst nouȝt look on oure lord the boldest of he(m) alle

But lete hym lede forth with hym · who hym liked & lefte what hy(m) liste

Many hundreth of aungels ˜ harpeden and songen

Culpat caro purgat caro regnat deus dei caro

Than pipide pees of poesie a noote

Clarior est solito post maxi(m)a nebula phebus

Post inimicicia clarior est & amor

¶ After sharpe shoures quod pees ˜ moost schyne is the sonne

Is no weder warmer than aft(er) watrie cloudes

Ne no loueleuer / loue leuer · ne leuer frendes

Than after werre and wo · whan loue & pees ben mais

Was neuer werre in this world · ne wikkenesse so kene

That loue and hym liste ˜ to laughynge ne broughte

And pees thurgh pacience al p(er)iles stopped

¶ Trewes quod treuth · thow telles vs soth by Ih(es)us

Clippe we in couenaunt ˜ and ech of vs · kisse other

And lete no pepile quod pees p(ar)ceyue þ(a)t we chide

For inpossible is no thyng · to hym þat is almyȝty

¶ Thow saist soth quod rightwisnesse · and reu(er)entlich hir kiste

Pees and pees here p(er) secula seculor(um)

Misericordia & v(er)itas obuiauerunt sibi Iusticia & pax osculate su(n)t & c(etera)

Treuthe tromped þo ˜ & songe te deum laudamus & c(etera)

¶ And thanne luted loue in a lowe note

Ecce q(ua)m bonu(m) & q(ua)m iocundum & c(etera)

Til the day dawed ˜ thise damiselles daunced

That men range to the resureccion · and right w(i)t(h) þ(a)t I waked

And called kytte my wif ˜ and calote my doughter

Arises and reu(er)ens ˜ goddes resurecciou(n)

And crepeth to the crosse on knees ˜ and kisses it for a Iewel

For goddes blissed body ˜ it bare for oure bote

And it aferees the fende ˜ for swich is the myghte

May no grisely goost ˜ glide ther it schadwes