Truþe herd telle her-of ; and to peers sente

to taken his teem ; and tilie þe erthe

And purchase him a pardon ; a pena & a culpa

For him & ffor his eyres ; ffor euere-more after

and bade him holde him at home ; and erien his leyes

and alle þat holpen him to erie ; to sette or to sowe

Or ony oþer myster ; þat myȝte peers auayle

pardon with peers plowman ; truþe haþe i-graunted

kyngis and knyȝtis ; þat kepen holy chirche

and ryȝtffully in rewmes ; rulen þe peple

han pardon thoruȝ purgatorie ; to passe ffull lyȝtC

with patriarkis & prophetis ; in paradice to be ffelawe

Bisschoppis y-blesside ; if þei ben as þey shulden

legistres of boþe þe lawez ; þe lewide þer-with to preche

In as moche as þei mown ; amende alle synffull

arne pyres with þe appostelis ; þis pardon peers schewyth

And at þe day of dom ; at þe hie deys to sitte

Marchauntes in þe margyne ; hadden many ȝeris

And non a pena & a culpa ; þe pope nolde hem graunte

For þei holden not her halydaies ; as holi chirche techeþ

And ffor þei sweryn be her soule ; and so god muste hem helpe

aȝeins clene concience ; her catell to selle

and vndir her secrett seel ; truþe sente hem a lettre

That þei shulde bigge boldely ; þat hem likid beste

And sythen selle it aȝeyn ; and saue þe wynnynge

And amende mesondeux þer-myd ; and mysseyse ffolk helpe

And wikked weyes ; wyȝtlyche hem amende

And do bote to brigges ; þat to-broken weren

Marien maydenes ; or maken hem Nunnes

pore peple and presoneris ; ffynde hem her lijflode

And sette scolers to scole ; or to summe oþer craftis

Releue religion ; and rente hem better C

And I shall sende ȝou my-self ; Seynt myhel myn archaungell

Tha{.}t no deuyl shall ȝou dere ; ne fferre ȝou in ȝoure doynge

And wite ȝou ffro wanhope ; if ȝe wulle þus worche

And sende ȝoure soulis in-to sauyte ; to my Seyntis in Ioye

þenne were marchaundis merie ; and weppeten ffor Ioye

And preysed peers þe plowman ; þat purchaced þis bulle

Men of lawe leest pardon had ; þat pleseden ffor mede

For þe sauȝter saueþ hem not ; swyche as takyn ȝiftis

And namely of Innocentes ; þat non yuel kunnen

Super Innocentem munera non accipies

Pledours shulle pyne hem ; to plete ffor swiche & helpe

Prynces and prelatis ; shulde paye ffor her trauaile

And many Iustices and Iuroure ; wolden ffor Ion do more

þanne pro dei pietate ; leue þou non oþer

And he þat spendiþ his speche ; and spekiþ ffor þe pore

That is Innocente and nedy ; and no man appaireþ

Comfortiþ him in þat caas ; with-ouȝtyn coueytise of ȝiftis

And schewiþ lawe ffor oure lordis loue ; as he it haþe lerned

schal no deuyl at his deþe-day ; deren him a myte

þat he ne worþ saue his soule ; þe sauuter bereþ wittenesse

Domine quis habitabit in tabernaculo tuo

and to bigge water ne wijnd ; ne witt ne fiere ne ferþe

These ffoure þe ffader of heuene ; made to his ffolde in comune

These ben truþis tresore ; true ffolk to helpe

That neuer shall waxe ne wanye ; with god him-selue

whan þey drawyn vn-to þe deþ ; Indulgences wolden haue

his pardon is ffull pitit ; at her partinge hens

þat ony mede of mene men ; ffor his motinge takiþ

ȝe legistres and lawyers ; holdyn þis ffor truþe

That if þat I lye ; matheu is to blame

For he bade me take ȝou þis ; and þis prouerbe me tolde

Quodcumque vultis vt faciant vobis homines facite eis

Alle leuynge P laboreris ; þat leuen with her handis

That trueliche taken ; and trueliche wynnen

And leuen in loue and in lawe ; ffor her lowe hertis

Han þe same obsolucion ; þat sent was to peers

Beggers ne bidders ; ne ben not in þe bulle

But if þe suggestion be soþe ; þat schapeþ hem to begge

For he þat beggiþ or bit ; but if he haue nede

he is ffals with þe ffende ; and deffraudiþ þe nedy

And also be-gyliþ þe gyuer ; aȝeynys his wille

For if he wiste he were not nedy ; he wolde it gyue anoþer

þat were more nedy þan he ; so þe nedyeste shulde be holpyn

Caton kenneþ me þus ; and þe clerk of stories

Cui des videto ; is catonnys techingeC

and in þe stories he techiþ ; to be-stowe þis almes

Sit Elemosina tua in manu tua donec studeas cui des

And gregori was a good man ; and bad vs ȝeuen alle

{.}That asken ffor his loue ; þat vs alle leneþ

Non eligas cui miserearis ne fforte pretereas illum qui meretur accipere

Quia in-sertum est pro quo deum magis placeas

For ȝe woten neuer who is worþi ; and god wott who haþe nede

In him þat takiþ is þe trecherie ; if ony treson walke

For he þat ȝeueþ ȝeldeþ ; and ȝarkiþ him to reste

And he þat biddiþ borwiþ ; and bringiþ him-self in dette

For beggers borwyn euere-mo ; and her boruȝ is god almyȝty

To ȝelden hem þat ȝeuen hem ; and ȝit vsure more

Quare non dedisti pecuniam meam ad mensam vt ege veniens cum vsuris exigere & cetera

For-þi bidde not ȝe beggers ; but if ȝe haue nede

For so may bigge him bred ; þe book beriþ wittenesse

he þat haþe bred I-now ; þouȝ he haue not ellis

Satis dyues est qui non ; indiget pane

late vsage be ȝoure solace ; of seyntis lyues redinge

þe book banneþ beggerie ; & blameþ in þis manere

Iunior fui etenim senui & non vidi iustum derelictum nec semen eius querens panem & cetera .

For ȝe leuen in no loue ; ne no lawe holdyn

Many of ȝou ne weddyn nouȝt ; þe wymmenP ȝe with delyn

but as whilde bestis with we-he ; & worþ vp & worchen

and bringen fforþe barnes ; þat bastardis men callen

Or þe bak or summe ban ; he brekiþ in his ȝouþe

and sithen gon ffaiten with her fauntis ; ffor euere-more after

þer is mo mysshapped peple ; amongis þese beggers

þan of alle manere men ; þat on þis molde walken

and þei þat leuen þus her lyf ; mown loþe þe tyme

That euere he was man wrouȝt ; whanne he shall hens ffare

and olde men and hore ; þat helples ben of strengþe

and wymmen with child ; þat worche ne mown

Blynde and beddrede ; and broken her membris

That taken þese mysheues ; mekeliche as messellis & oþerC

han a pleyn pardon ; as þe plowman him-seluen

For loue of here lowe hertis ; oure lord haþe hem graunted

Her penaunce P & her purgatorie ; here on þis erthe

peers quod a preste þo ; þi pardon muste I rede

For I wolle construe iche a clause ; and kenne it þe on Englishe

and peers at his preiere ; þe pardon vnffoldyn

and I behynde hem boþe ; be-helde all þe bulle

alle in two lynes it lay ; & not a leef more

And was wrettyn ryȝth þus ; in wittenesse of truþe

Et qui bona egerunt ibunt in vitam eternam qui vero mala in ignem eternum

Peter quod þe prest þo ; I can no pardon ffynde

but do well and haue well ; and god shall haue þi soule

and do yuell and haue yuell ; hope þou non oþerC

But after þi deþ-day ; þe deuell shall haue þi soule

and peers ffor pure tene ; pullide it atwynne

and sayd si ambulauero in medio vmbre mortis non timebo quoniam tu mecum es

I shall sesse of my sowynge quod peers ; & swynke not so harde

Ne be abouȝte my beli Ioy ; so besili no more

of preieris & penaunce P my plow ; shall be her-after

and wepe whan I shulde slepe ; þouȝ whete bred me ffaile

þe prophete his payn {h}ete ; in penaunce & in sorowe

By þat þe sauter seiþ ; so deden many oþer

That loueþ god lelli ; his lijflode is ffull esy

Fuerunt michi lacrime mee panes die ac nocte

and but if luke lye ; he lereþ vs be ffoulis

we shulde not be to besy ; abouȝte þe worldis blis

Ne soliciti sitis ; he seiþ in þe gospell

and scheweþ us be ensaunplis ; oure-seluen to wisse

The ffoulis in þe ffeeld ; who ffynte hem mete at wynter

haue þey no gerner to go to ; but god ffynde hem alle

what quod þe prest to perkyn ; peter as me þinkeþ

Thou art lettered a litill ; who lernede the on bokeC

Abstinence þe abbesse quod peers ; myn abc me tauȝte

and concience come afterwarde ; & kende me moche more

where þou a preste peers quod he ; þou myȝteste preche where þou shuldeste

as dyu{.}ynoure in dyuynite ; with dixit in-sipiens to þi teme

lewde lorell quod peers ; litill lokiste þou on þi bibill

Or on salomones sawes ; selden þou be-holdist

Eice derisores & iurga cum eis ne crescant & cetera

The preste & perkyn ; apposede eiþer oþer

And I þoruȝ her wordis ; awoke and wayted abouȝte

and seie þe sunne in þe souþe ; satte þat tyme

metteles & monyles ; on maluerne hillis

mvsinge on þese metellis ; and my wey I ȝede

Many tyme þese Metellis ; han made me studie

of þat I seie slepinge ; if it so be myȝte

and also ffor peers þe plowman ; ffull pensif in herte

and whiche a pardon peers hadde ; all þe peple to comforte

And how the prest impugnede it ; with two propre wordis

And I haue no sauoure ; in sompnewarie . ffor I see it ofte ffaile

Cato & canonystres ; conceilyn vs to leue

To sette sadenesse in sompnewarie ; ffor Sompnia ne cures

and ffor þe book of þe bible ; beritth wittenesse

how danyell dyuyned ; þe dremes of a kynge

That was Nabugodonosor ; nemed of clerkis

Danyel seyd sir kyng ; þi dremys be-tokyn

þat vnkouþe knyȝtis shull come ; þi kyngdam to cleue

Amongis lower lordis ; þi lond shall be departid

And as danyell dyuyned ; in dede it ffelle after

The kynge lees his lordshipe ; and lower men it had

and Ioseph mette merveilousliche ; how þe mone & Sunne

And þe eleuene sterris ; haylesed hem alle

þanne Iocob iugged ; iosphs sweuene

Bew fitz quod his ffader ; ffor de-ffaute P we shulen

I my-self and my sones ; seche þe ffor nede

It be-ffelle as his ffader saide ; in pharaones tymeC

þat Ioseph was iustice ; egypt to loken

it be-ffelle as his ffader tolde ; his ffrendis þer him souȝteP

and alle þis makiþ me ; on þese metellis to þenke

and how þe prest preiede ; no pardon to do-well

and demed þat do-well ; indulcences passed

By-ennalis & tryennalis ; and bisshoppis lettres

and how do-well at þe day of dom ; digneliche vndirffonged

and passiþ alle þe pardon ; of Seint petrus chirche

For-þi I rede ȝou renkis ; þat riche ben on þis erthe

vppon tr{i}uste of ȝoure tresore ; triennalis to haue

Be ȝe neuer þe balder ; to breke þe ten hestis

and nameliche ȝe maistris ; meyris & iugges C

That han þe welþe of þis world ; and wise men ben holden

To purchace ȝou pardon ; at þe papis bullis

at þe dredffull dom ; whanne deed shall arise

And come al be-ffor criste ; acountes to ȝelde

how þou leddiste þi lyff here ; and his lawes kepteste

and how þou dedist day be day ; þe dom woll reherce

A poke ffull of pardon þer ; ne prouyncialis lettris

þouȝ ȝe be ffounde in þe ffraternite ; of alle þe ffoure ordris

and haue indulgences double-ffolde ; but if do-well ȝou helpe

I sette ȝoure patentes & ȝoure pardon ; at a pies hele

For-þi I conceille alle cristen ; to crie god mercy

and marie his moder ; be oure mene bitwynne

þat god ȝeue vs grace here ; er we gon hens

Swiche werkis to werche ; while we ben here

þat after oure deþ-day ; do-well reherce

At þe day of dom ; we deden as he hyȝte