Passus decimus de visione .
Et secundus de dowell .N
Et secundus de dowell .N
THan had Wit a wife , was hote dame Study
That leue / le[n]e was of lere , and of liche both
She was wonderli wrought , wit me so techid
And al staring dame study , sternely sayd
Wel art þou wyse quod she to wyt any wysdomes to tell
To Flatterers or to foles that frentyke be of wyttes
And blamed him and banned hym , & bade him be styl
Wyth suche wyse wordes to wyshe any sottes ,
And sayd , Noli mittere , man Margarite Pearles
Amonge hogges that haue hawes at wyll ,
They do but driuel theron , draufe were hem leuer ,
Than al precious Pirre , that in paradice wexeth
I say it by such , quod she , þat shew it by her works
That hem were leuer land , and lordshyp on earth ,
Or ryches or rentes , and rest at her wyll ,
Than al the soth sawes , that Salomon sayde euer
Wysedome and wytte nowe is not worth a kerse ,
But if it be garded with couetise , as clothers kemb her woule
Who-so can contryue deceites , & conspyre wrongs
And lead forth a loue-daye , to let wyth truth
He that such craftes can , is oft cleped to counsell ,
They lede Lords wyth lesinges , and belieth Truth ,
Iob the gentle in hys gestes wytnesseth ,
That wicked men they welden , þe welth of this world
And þat they be lordes of ech land , þat out of law lyueth .
Quare impii viuunt , bene est omnibus qui preuaricantur
et inique agunt .
The Psalter sayeth the same , by such as done euyl .
Ecce ipsi peccatores habundantes in seculo obtinuerunt diuitias
Lo sayth holy lecture , whych be these shrewes
Thylke that god geueth moste , leest good they deleth
And most vnkind be to þe commen , þe most cattel weldeth
Que perfecisti destruxerunt , iustus autem ,
Harlots for her harlotry , may haue of her goodes
And Iapers and Iuglers , and ianglers of gestes ,
And he that hath holy wryte aye in hys mouth ,
And can tell of Tobie , & of the twelue Apostles
Or preachen of þe penaunce , þat Pilate falsely wrought ,
To Iesu the gentle , that Iewes to-drawe , T
Lytle is he loued that suche a lesson sheweth
Or daunten or draw forth , I do it on god hym-selfe .
But tho that fayne hem foles , & wyth faytinge liueth
Agayne the lawe of our lorde , and lyen on hem-selfe ,
Spiten and spuen , and speake foule wordes
Drynkinge and driuelyng , and do men for to gape
Lyken men , & lye on hem , þat leneth hem no gyftes
They can no more minstrelsy ne musyke men to glad ,
Than Maude the mulier , of Multa fecit deus
Ne were hir vyle harlotry , haue god my trouth
Shoulde neuer kynge ne knyght , ne canon of Poules
Gyue hem to her yeres gyfte , ne gift of a grote ,
And myrth of minstrelsy amongest men is nought
Lechery , losenchery , and losels tales ,
Glotony and greate othes is mirthe they loueth ,
And if they carpen of Christ , these clerkes & these lewd
At the meat in her myrth , whan minstrelles ben styll
Than telleth they of the trinitie a tale or twayne
And bringeth forth a balde reason , & taken Bernard to witnes
And put forth a presumption to preue þe soth ,
Thus they dreuell at her dayse , the deitie to knowe
And gnawen god with hyr gorge , whan hyr guts fallen
And the carfull may crye , and carpen at the gate
Both a-hungerd and a-furste , and for chels quake
Is none to nymen hym nere , hys noy to amend
But hunten hym as a hounde , & hoten hym go hence ,
Litle loueth he that Lorde , that lent hym all þat blysse ,
That thus parteth , with the pore , a percel whan him nedeth
Ne were mercy in mene men more than in rych
Mendynauntes meatles , myght go to bedde .
God is much in the gorge , of these greate maisters ,
And amonges meane men his mercy & hys worckes
And so sayeth the psalter , I haue sene it oft .
Ecce audiuimus eum / e[a]m in effrata , in veniemus eum / e[a]m
in campis silue .
Clarkes and other kinnes men carpen of god fast
And haue hym much in þe mouth , & meane men in hert
Fryers and faytors haue founden such questions
To please wyth the proud men sith the pestilence time
And preachen at Saint Paules for pure enuy of clarkes
That folke is not firmed in the faythe , ne freer of her goodes
Ne sory for her synnes , so pride waxen ,
In religion , & in al the realme , amongest rich & pore
That prayers haue no pore the pestilence to lette
And yet þe wretches of this worlde , is none ware by other
Ne for dreade of þe death , withdraw not her prid
Ne ben plentuous to the pore , as pure charitie wold
But in gaines & in glotony , forgloten her goods hem-self
And breketh not to the begger , as the boke teacheth .
Frange esurienti panem tuum . &cetera .
And the more he wynneth , & wexeth welthy in ryches
And lordeth in landes , the lesse good he dealeth
Tobie telleth you not so , take hede ye ryche
Howe the byble boke of hym beareth wytnes
Si tibi sit copia habundanter tribue
Si autem exiguum illud Impertiri stude libenter
Who-so hath much spend manly , so meaneth Tobie
And who-so lytle weldeth , rule hym thereafter ,
For we haue no letter of our lyfe , how long it shal endure ,
Suche lessons lordes shoulde loue to heare ,
And howe he myght most meyny manly fynde ,
Not to fare as a fideler , or a frier to seke feastes ,
Homely at other mens houses , and haten her owne .
Elenge is the hall euery day in the weke
There the Lorde ne the ladye lyketh not to sytte
Nowe hath eche ryche a rule , to eaten by him-selfe
In a priuie parler for poore mens sake ,
Or in chambre wyth a chymney , and leaue the chiefe hall
That was made for meeles men to eate in ,
And all to spare to spende , that spyll shall an-other
I haue hearde heigh men eatynge at the table
Carpen as they clerkes were , of Christ , & of his might
And leiden fautes apon the father that formed vs al ,
And carpen agaynste clarkes crabbed wordes ,
Why would our sauiour suffer such a worme in hys blysse
That begiled the woman , & the man after ,
Through which wyles and wordes they went to hel
And al her sede for her sinne , þe same death suffred ,
Here lieth your lore , these lords beginneth to dispute
Of that þe clarkes vs kenneth of Christ by the gospell .
Filius non portabit iniquitatem patris .
Why should we that now be for the workesN of Adam
Roten and to reade , reason woulde it neuer
Unusquisque portabit onus suum .
Such motiues they moue these masters in her glory
And make men in misbeleue , þat musen of her wordes
Imaginatyue hereafterwarde shal answere to youre purpose
Austen to such arguers he telleth this tene .
Non plus sapere quam oportet .
Wylneth neuer to wytte , whye that God woulde
Suffered Sathan hys sede to begyle ,
And beleue lelly in the loore of holye kyrke
And praye hym of pardon , and penaunce in thy lyfe
And for hys muche mercy to amende you here
For who þat wylneth to wyt , þe waies of god almight
I would hys eye were in his ars & his finger after ,
That euer wylneth to wytte , why that god woulde ,
Suffer Sathan hys sede to begyle ,
Or Iudas to the Iewes Iesu betraye ,
Al was as thou wouldest lord , worshyp be thou
And al worth as thou wold , what-so we dispute
And tho þat vseth these hanylones to blinden mens wits
What is dowell fro dobet & defe mote be worthe ,
Sith he wylneth to wit which they be bothe
But if he lyue in the life that longeth to dowell
For I dare be his bold borowe þat dobet wil he neuer
Though dobest draw on hym day after other
And whan þat wytte was ware , what dame studie told
He became so confuse he cunneth not loke
And as dome as death and drow hym arere
And for no carping I colde after ne kneling to therth
I myght get no grayne of hys grete wyttis
But al laughynge he louted and loked apon studye
In sygne that I shulde besechen hyr of grace
And whan I was war of his wil to his wife I loutid
And sayde mercie madame your man shal I worthe
As longe as I lyue both late and rathe
For to worchen your will the whyle my life endureth
With þat that ye kenne me kindly to know what is dowel
For thie mekenes man quod she , & for thi milde spech
I shal ken the to my cosen that clergye is hote
He hath weddyd a wyfe with in these syx monthes
Is syb to the seuen artes Scripture is hyr name
Thew two as I hope after my teachinge
Shal wishen the dowel I dare vnder-take
Than was I as fayne , as foule of fayr morowe
And glader then the gleman that golde hath to gyfte
And asked hyr the high way , wher that clergie dwelt
And tel me some token quod I , for tyme is that I wend
Aske the hygh waye quod she , hence to suffre
Both wel and woo if that thou wylt learne
And ryde forthe by riches , and rest thou not therein
For if þou couplest þe therwith to clergie commest þou neuer
And also the lycores lande that lechery hight
Leue it on thy lefte halfe a large mile and more
Tyl thou cum to a courte , kepe wel thy tounge
From leasings and luthers speach & lycorous drinks
Than shalt thou se Sobreite and simplicitie of spech
That eche wyght be in wyll hys wyt the to shewe
And thus shalt þou come to clargie that can mani things
Say hym thys sygne I set hym to schole
And þat I gret wel his wife for I wrot her mani boks
And set hyr to sapyence & to the psalter glose
Logicke I lerned hyr and manie other lawes
And al the vnisons in musyck I made hyr to know
Plato the poet I put hym fyrst to boke
Aristotle and other mo to argue I taught
Grammer for gyrls I gard fyrst to writte
And bet hem wyth a bales but if they woulde learne
Of al kynnes craftes I contriued tooles
Of carpentre of karuers and compased masons
And lerned them leuel and line , though I loke dimme
And theologie hath tened me tenscore tymes
The more I muse therin the mystier it semeth
And the depper I dyuine the darkar me it thynkyth
A ful lethy thyng it were , if that loue nere
And for it leet best by loue I loue it the better
For there as loue is Leder , ne lacketh neuer grace
Loke thou loue lellie if the leketh Dowell
For Dobet and Dobest bene of loues kynne
In other science it sayth I sawe it in Caton
Qui simulat verbis nec corde est fidus amicus
tu quoque fac simile sic ars deluditer arte
Who-so gloseth as Gylours done go me to the same
And so shalt thou falsce folke and faiethles begyle
Thys is Catons kenninge to clerckes that it lerneth
And Theologye techeth not so who-so taketh them
He kenneth the contrary agayne Catons wordes ,
For he biddeth vs be as brethren , & bid for our enmies
And loue hem þat lye on vs , & lend hem whan they nede ,
And do good agayne euyl , god hym-selfe hoteth
Dum tempus habemus operemur bonum ad omnes
Maxime autem ad domesticos fidei ,
Paule preached the people that perfitenes loued
To do good for gods loue , and gyue men that asked
And namely to suche that sueth our beleue ,
And al þat vs lacke or lye , our Lord techeth vs to loue
And not to greue hem þat greue vs god him-self forbad it
Mihi vindictam , et ego retribuam .
Therefor loke thou loue as long as thou durest
For is no science vnder þe sunne so souerain for thi soul
And astronomi is a harde thing and euil for to know
Gemetrie and geomansye so gylful of speache
Who-so thinkith worch with tho two thriueth but late
For Sorcerie is the souerenest boke þat to science longith
Yet ar ther fybiches in forseeris of fel mens makyng
Experimentes of alkinamie the people to deceiue
Yf thou thinke to dowel , dele therwyth neuer
Al th[e]se sciences I me selfe / my-selfe soteled & ordeined
And founded hem formest , folke to desceyue
Tyl Clargy thys token and scripture after
To councel the kyndlie to knowen what is dowel
I sayde graund mercie madame & mekely her grete
And went wightlie a-waye with-oute more letinge
And til I comme to clergie I coulde neuer stinte
And grete the goodman as study me taught
And afterward the wyfe , and worshypped hem both
And tolde them the tokens that me taught were
Was neuer gom on this ground sith god made þe world
Fayrer vnderfongen ne frendlyer at ease
Than my-selfe sothlye sone so he wyst
That I was of wyttis house and with his wife dame studie
I sayd to hem sothtly / sothly that sent was I thyther
Dowel and Dobet and Dobest to lerne
It is commune lyfe quod clergie , on holy church to be-leue
With al tharticles of þe fayth þat faleth to be knowen
And that is to beleue lellie both lerned and lewed
On the grete God that gynnyng had neuer
And on the soothfast sone that sauid mankynde
From the dedly deth and the dyuels power
Through the help of þe holy goost þe which gost is of both
Thre persons and not in plurel nombre
For al is but one god and eche is god hym-selfe
Deus pater , Deus filius , Deus spiritus sanctus
God the father god the sonne god þe holy gost of both
Maker of mankynde and of bestis bothe
Austen the Olde hereof made bokes
And hym-selfe Ordeinyd to saue vs in beleue
Who was his autor ? al the foure Euangelistes
And Christ cleped him-self so , þe Euangelists berythe wytnes
Al þe clarks vnder Christ ne coud this assoile
But this belongith to bilieue to lewed þat wold dowel
For had neuer freke fyue wytte þe faith to dispute
Ne man had no merit , myght it be preued .
Fides non habet meritum , vbi humana ratio prebet experimentum
Than is Dobet to suffer for the souls helth
Al that the boke byt by holye churches teaching
And that is man by thy myght for mercies sake
Loke thou worke it in worke that thy word sheweth
Such as thou semest in syght be in assaye founde
Appare quod es , vel esto quodN appares
And let no-bodie be by thy bearynge begiled
But be suche in thy soule , as thou semest wythout
Than is dobest to be bolde to blame the gylty ,
Sithens thou seest thy-selfe as in soule cleane
And blame thou neuer body , and þou be blame-worthy
Si culpare velis culpabilis esse cauebis ,
Dogma tuum sordet , cum te tua culpa remordet .
God in the gospell greuouslye repreueth ,
All that lacken any lyfe , and lackes haue hem-selfe .
Quid consideras festucam in oculo fratris tui , trabem in
oculo tuo & cetera .
Why meuist þou thi mode for a mote in thi brother eies
Sythen a beame in thyne owne blyndeth thy-selfe .
Eiice primo trabem in oculo tuo .
Whych letteth the to loke lesse or more
I rede eche a blynde bosarde do boote to hym-selfe
For abbots and for priers and for al maner prelates
As persons & parysh priestes þat preach should & teach
All maner men to amende by hyr myghte
Thys text was tolde you to be ware ere ye taught
That were such as ye said to salue with other
For gods word wold not be lost , for þat worcheth euer
If it auayled not þe commune it might auaile your-selfe
And it semeth nowe sothly to worldes syght
That gods word worketh not on learned ne on lewd
But in suche maner as marke meneth in the gospel .
Dum cecus ducit cecum , ambo in foueam cadunt .
Lewde men may lyken you thus þat the beame lieth in your eye
And the festu is fallen for your defaute
In all maner men throughe mauzed / ma[n]zed prieste
The bible beareth wytnes that all the folke of Israel
Bytter aboute the gyltes of two bad priestes .
Offyn and fynes for her couetyse
Archa deiN myshapped and Eli brake hys necke
Forthi correctors claw hereon & correct first your-selfe
And than mai ye safely say as Dauid þat made þe psalter
Existimasti inique quod ero tui similis , arguam te , et statu
am contra faciem tuam .
Than shal burel clerks be bashid you to blame or greue
And carpen not as they carpe now & call you domme houndes
Canes non valentes latrare .
And to lacke you with a word your workmanship to let .
But be prester at your preier than for a pound of noblis
And all for your holines haue you this in hert
In schole there is skorne but if a clarke wyll learne
And great loue & lyking for eche of hem loueth other
And nowe is religion a rider , a romer by streate
A leder of loue-dayes and a loude begger / lo[n]de b[u]gger[e]
A prycker of a palfrey from Maner to Maner
An heape of houndes at hys arse as he a lord were
And but if hys knaue knele that shal hys cope brynge
He loured on him & asked who taught him curtesie
Litle had lordes to done to giue landes from her heyres
To religious þat haue no ruth if it raine on her auters
In many places there the persons be by hem-self at ease
Of the pore haue they no pytye & that is her charitie
And they letten hem as lordes her landes lye so brode .
And ther shall come a king & confesse you religious
And beat you as þe byble telleth for breking of your rule
And amend monials monkes and chanons
And put hem to her penaunce . Ad pristinum statum ire .
And barons with erles beat hem through Beatus virs teching
That her barons claymen & blame you foule
Hii in curribus , et hii in equis ipsi obligati sunt . &cetera .
And than friers in freytor shal fynde a keye
Of Constantynes cofers in whych is the cattel
That Gregories godchyldren had it dispended
And than shal þe Abot of Abington & al his issue for euer
Haue a knocke of a kynge and incurable the wounde
That this worth soth seke ye , that oft ouer-see þe bible
Quomodo cessauit exactor quieuit tributum contriuit dominus
baculum impiorum et virgam dominantium cedentium plaga in sauabili / sa[n]abiliN
And ere that kinge come Cayne shal awake
And Dowel shal ding him down , & distroi his might
Than is Dowel & dobet quod I , dominus & knighthood
I wyll not skorne quod scripture but if scriuiners lie
Kynghoode ne knyghthoode by naught I can awaite
Helpeth not to heuenwarde one heres end
Ne ryches ryght naught ne ryaltie of lordes
Paule preuith it impossible rych men to haue heuen
Solomon sayth also that siluer is worst to loue .
Nichil iniquius quam amare pecuniam
And Caton kenneth vs to coueten it naught but as nede teacheth
Dilige denarium sed parce dilige formam
And patriarkes and prophets and poets bothe
Wryten to wyshe vs to wyl no ryches
And praise pouertie with pacience thapostils bere witnes
That thei haue heritage in heuen , and by true right
Ther rych men no ryght mai claim but of ruth & grace
And preuen it by Peter and by Paul bothe
That is baptised be safe be he ryche or poore .
That is in Extremis quod Scripture among saracens & Iewes
They muste be sauyd so & þat is our beleue
That an vnchrysten in that case may christen an heathen
And for his lely beleue whan he the lyfe tyneth
Haue the heritage of heauen , as any man christen
And christen men without more , may not come to heuen ,
For þat Christ for christen men died , & confirmed the law ,
That who-so wold and willeth with Christ to arise .
Si cum Christo surrexistis . &cetera .
He shoulde loue and leue / le[n]e , and the lawe fulfyll
That is loue thy lord god , leuest aboue al thyng ,
And after all christen creatures , in commen ech man other
And thys longeth to loue , that leueth to be saued ,
And but we do thys in dede , ere the day of dome ,
It shall besitten vs ful sore , the syluer that we kepe
And our backs þat moteaten ben , & se beggers go naked
Or delite in wine , & wildfoule , & wot any in defaute
For euery christen creature , shoulde be kinde to other ,
And sithen heathen to helpe in hope of amendement
God hoteth both hygh & lowe , þat no man hurt other ,
And sayth slea not þat semblable is into my owne likenes
But if I sende the some token , and saye , Non necabis / mecaberis . / ,
Is slea not but suffer , and all for the beste ,
For I shall punyshe hem in purgatorye , or in þe pyt of hell
Euery man for hys misdedes , but if mercy it let ,
Thys is a longe lesson quod I , and litle I the wyser
Where dowell is or dobet , darkely ye shewen ,
Many tales ye tell , that Theology lerneth ,
And that I man made was , and my name entred
In the legend of lyfe , longe ere I were ,
Or els vnwryten for some wyckednes , as holy wryte manaceth
Nemo ascendit ad celum , nisi qui de celo descendit
I leue it wel quod , I by our lord and no letter better ,
For Solomon the sage , that Sapience taught
God gaue him grace of wyt , and al his goodes after
He demed well and wysely as holy wryte telleth .
Aristotle and he who wished men better ?
Masters that of gods mercy , teachen men & preachen ,
Of her words they wish vs , for wissest as in her time
And all holy kyrke holdeth hem both dampned ,
And if I shold worke bi her works to wyn me heuen
That for hir workes and wyt , wonneth in payne
Than wrought I vnwysely , what-so-euer ye preach
And of fele wytty in fayth , lytle farly I haue ,
Thoughe her gost be vngracious god for to please
For many men on this molde , more setten her hertes
In good than in god , therfore hem grace fayleth
At hyr moste mischiefe , whan they shall lyfe lete ,
As Solomon did & such other , þat shewed greate wyts
And her works as holy writesaith / write saith , were euer þe contra-rye
Therfore wyse witted men , & wel lettred clarkes
As they say hem-selues , selde done therafter .
Supra / Super cathedram Moysi . & cetera .
And I wene it worthes of manye as was in Noes time
Tho he shoope that shyp of shydes & of bordes
No wight þat wroght theron was salf , ne any workman els
But birdes and beastes , and the blessed Noe ,
And hys wyfe with hys sonnes , & also her wyues ,
Of wights that it wrought , was none of hem saued
God leue it fare not so by folke , that þe fayth teacheth
Of holy kirke þat harborowe is , & gods house to saue
And shilden vs from shame therin , as Noes shyp did beasts
And men þat made it , amyd þe flood he drowned
The CulorN of thys clause , curates is to meane
That ben carpenters holy kyrke to make , for christes own beasts
Homines et ium enta / iumenta saluabis domine .
On good Fryday I finde a felon was saued ,
That had liued all hys life , with leasinges & wyth thefte
And for he bekened to þe crosse , & to Christ shroue him
He was soner saued , than saint Iohn the Baptiste
And or Adam or Isai , or any of the prophetis
That had lyen wyth Lucifer , many longe yeres
A robber was raunsomed , rather than they all ,
Withouten any penaunce of purgatory , to perpetual blisse
Than Mary Magdelen , what woman did worse
Or who worse than Dauid , þat Urias death conspired
Or Paule the Apostle , that no pity had ,
Muche christen kinde to put / [kille] to death ,
And nowe be these souereines with sayntes in heuen
Tho þat wrought wickedlest , in worlde tho they were ,
And tho that wysely worden , and writen many bokes
Of wit and of wisedome , with dampned soules wonneth
That Solomon saith I trow be soth , & certen of vs al
Siue iusti atque sapientes et opera eorum in manu dei sunt .
There are witty & wel learned , & her workes ben hid
In the handes of almighty god , and he wot þe sothe
Wherfore a man worth alowed ther , & his leli works
Or els for his yll wil , and for enuy of herte ,
And be alowed as he liued , for bi yl men knowe good
For how wist men what is white , if al thing blak were
And who wer a good man , but if ther wer som shrew
Therfore lyue we forth with other men , I leue fewe ben good
For Qant oportet vient enplace / en place , il ny ad que pati .
And he that may all amend , haue mercy on vs all
For þe sothist word þat euer god said , was Nemo bonus ,
Cleargy tho of christes mouthe , commended it was litle
For he sayd to saint Peter , and to such as he loued .
Cum / [D]um steteritis ante reges et presides . & cetera .
Though ye come before kinges , & clarkes of þe lawe
Be not abashed , for I shall be in your mouthes ,
And gyue you wytte and wyll , and conning to conclud
Hem all that agaynst you , of christendome disputen .
Dauid maketh mention , he spake amongest kinges ,
And might no king ouercome him , as bi cunuing / cun[n]ing spech ,
But wyt and wysedome wan neuer the mastrye ,
Whan man was at mischiefe , without the more grace ,
The douteist doctour , & diuinour of the Trinitie ,
Was Austen the olde , and heighest of the foure ,
Sayd thus in a sermon , I see it wrytten once .
Ecce ipsi idiote rapiunt celum , vbi nos sapientes in in
ferno mergimur .
And is to meane to Englyshe men , more ne lesse ,
Are none rather rauished , from the ryght beleue
Than are these cunnyng clarkes , that can many bokes
Ne none soner saued , ne sadder of beleue ,
Than plowmen & pastorers , & pore commen laborers ,
Sowters and shepeherdes , suche lewde Iuttes
Percen wyth a Pater noster , the paleys of heauen ,
And passen Purgatorie penaunceles , at her hence parting ,
Into the blysse of Paradice , for her pure beleue ,
That vnperfitly here knewe , and eke lyued ,
Yea , men knowe clarkes that cursed the tyme ,
That euer they could or knewe more than , Credo in deum
And principalli her Pater noster , mani a person hath wished
I se examples my-selfe , & so may many an-other
That seruauntes þat seruen lords , seldom fal in arerages
But tho that kepe the lordes catell , clarkes & reues ,
Ryght so lewde men , and of lytle knowynge ,
Selde fall they so foule , and so farre in synne ,
As clarkes of holy church , þat kepe Christes treasure ,
The which is mans soule to saue , as god saith in þe gospel .
Ite vos in vineam meam .
Agaynste
leawde
prystes .
leawde
prystes .
Reade
thys .
thys .
The Ab
bot of Ab
yngton
bot of Ab
yngton
They þat
made
noe a ship
were vn
saued .
made
noe a ship
were vn
saued .
I saye
Lyken
Fol.xlvi.
And
Carpen
Fol.xliii / xlvii
Sithe
Tyll
Fol.xlviii.
He
Fayrer
Fol.xlix.
And
Offyn
Fol.l.
And
Haue
Fol.li.
Aristotle
That
Fol.lii.
The thef
was sau
ed before
any of þe
prophets
was sau
ed before
any of þe
prophets
Be
Passus
M.i.
Pierce Ploughman .
The vision of
M.ii.
Pierce Ploughman .
The vision of
M.iii.
Pierce Ploughman .
The vision of
Pierce Ploughman .
Pierce Ploughman ,
N.i.
Pierce Ploughman .
The vision of
N.ii.
The vision of
Pierce Ploughman .
N.iii.
Pierce Ploughman .
The vision of
The vision of