Hic incipit passus quartus de dobetN
fFol wery and wetschod / wente y forþe aftur
As recheles renk / þat recheþ nat of sorowe
A ȝeede forthe like a lorel / al my lyf tyme
Tyl y wexe wery of þis worlde and wilned eft sclepeT
Of gurles and of Gloria laus gretliche me dremed
And hou Osanna by orgne / olde men songen
On was semblable to þe samaritan and somdel to peres plouhman
Barfot on an asse bak / botles cam prykie
With-oute spores oþur spere / ac braggeliche he lokede
As is þe kyn{g}de of a knyht / þat comeþ to beo dobbed
To getoun his guld spores / and galoches y-coped
¶ Þenne was faith in a fenestre / and cryde fili dauid
As doþe an herraud of armes / when auntres comeþ to ioustes
Olde Iuwes of ierusalem for ioye þei songon
benedictus qui uenit in nomine dominiC
¶ Þan y frayned at faithe / what al þat fare by-mente
And ho scholde iousten in Ierusalem / Ihesus he seyde
And fecche þat þe feond cleymeþ / Peres fruyt þe plouhman .
¶ Is peres in þis place quaþ y / and he preynkede vpon me .
¶ liberum dei arbitrium / quaþ he / for loue hath vndurtake
Þat þes ihesus of his gentery / schal iouste in peres armes
In his helme and in his haburion / humana natura
¶ In peres plates þe plouhman / theos prykiere schal ryde
For no dunt schal him dere / as in deitate patris
¶ Ho schal iouste wyþ ihesus quaþ y / Iuwes or scribes .
¶ Nay quaþ faith but þe feond / and fals dom to deye
dethe seith he wol for-do / and a-doun brynge
Al that lyueþ or lokeþ / a-londe and on watere
¶ Lyf seith he lyeþ / and hathe leyd his lyf to wedde
Þat for al þat deþe can do / wyþ-in þre dayes
To walke and fecche fro þe feeond / Peres fruyt þe plouhmanN .
And legge hit þer hym likeþ / and lucyfer bynde
And for-bite a-doun and brynge / bale deth for euere
O mors mors tus / tu[a] ero morsus /C
¶ Þenne cam pilatus wiþ muche people
To seo hou douhteliche deth scholde do / and deme her beyer ryhte
¶ Þe Iuwes and þe iustices / a-ȝeins ihesus þei were
And alle þe court cryed / Crucifige honde
¶ Þenne putte hym a pelour / by-fore Pilat and seyde
Thes ihesus of oure Iuwene temple / Iapede and despisede
To fordon hit on o day / and in þre dayes after
Edifien hit eft newe / her he stant þat seyde hitP
And ȝut maken hit as muche / in alle manere poyntes .
Boþe as longe and as large / a-loft and a-grounde
And as wyde as hit euure was / þis we witnesse alle
Crucifige quaþ a kachepol / he can of wuche-crafte
Tolle tolle quaþ a-noþur / and tok of kene þornes
¶ And by-gan of grene þorne / a garlaund to make
And sette hit sore an his heued / and sith seyde in enuye .
Aue Rabi quaþ þat ribaud / and reodes schotte at his eyen .
And naylede hym wiþ þre nayles / naked on þe rode
And wiþ a pole poyson / putten to his lippes
And bede hym drynke / his deþe to lette / and his dayes lengþen
And seyde if he sothfast beo / he wol hym-selue helpen
¶ And now if þow beo crist / criste godes sone
Com a-doun of þis rode / and þen wol we leue
Þat lyf þe louyeþ / and wol not let þe deye
Consummatum est quaþ crist / and comsede for to swouene
Pitouslyche and pale / as pryson þat dyeþ
¶ Þe lord of lyf and of liht / þo leyde his eyen to-gederes
¶ Þe day for drede þer-of wiþ-drow / and derk by-cam þe sonne
¶ Þe wal of þe temple to-clef / euene a two peces
¶ Þe hard roche al to-rof / and riht deok / deo[r]k nyht hit semede
¶ Þe eorþe quok and quasked / as hit quyke were
¶ And dede men for þat deone / comen out of deop graues
And tolde why þat tempest / so longe tyme durede
For a byttur bataille / þe dede body sayde
Lyf and deþ N in þis deorkenesse / her on fordoþ þat oþur .
Ac schal no white wite witturly / ho schal haue þe maystrie
Or soneday a-boute þe sonne rysyng / and sank wiþ þat tyl eorthe /
¶ Some sayde he was godes sone / þat so faire deyede
vere filius dei erat iste /C
Some sayde he can of sorcerie / good is þat we assaie
Wher he beo ded or nat ded / doun or he be take
¶ Tho þeues þer were / tholeden deþ þat tyme
Vpon crois by-sydes crist / so was þe comune lawe .
¶ Quicklyche cam a chachepol / and craked a-two here leggus
And here armes aftur / of eueriche of þo þeues
¶ Ac þer was ne boy so bolde / godes body to touche
For he was knyht and kyngessone / kynges sone / kynde for-ȝaf þat tyme
Þat no boy hadde hardinesse / hym touche in dyinge
¶ Ac þer cam forthe a blynd knyht / wiþ kene spere y-grounde
Hihte longius as þe lettre telleþ / and longe hadde lore his syht
By-fore Pilat and oþer people / in þe place he houede
¶ Maugrey his mony teþ / he was mad þat tyme
To iouste with ihesus / this blynd iew longius
¶ For alle hy weren vnhardy / þat houede þer or stode
To touche hym or to tryne hym / or to take hym doun ar graue him .
But þis blynde bacheler / þat bare hym þrow þe herte
¶ Þe blo{u}d sprang doun by þe spere / and vnsperrede þe knyhtes eyen
Þo feol þe knyht vpon knes / and cride ihesu mercy
A-ȝeins my wil hit was quaþ he / þat y ȝow wounde made
¶ He syhed and seyde / sore hit me for-þynkeþ
Of þe dede þat y haue don / y do me in ȝoure grace
¶ My lond and my licame / at ȝoure lyukyng takeþ hit
And haue mercy on me rithful ihesu / . rith wiþ þat he wepte .
¶ Þenne gan Faith foully / þe falce Iuwes to despysen
And calde hem caytifs a-corsed / for þis was a vile vilanie
Veniaunce is to ȝow falle / þat makede þe blynde
Beten hym þat was ded / hit was a boies dede
¶ Corsede caytifs / knyhthod was his neuere
To bete a body bunde / with eny bryht wepne
Þe gree ȝut hathe he getoun / for alle his grete woundes
¶ For ȝoure chaumpion chyualer / chief knyht of ȝow alle
Ȝelt hym recreaunt remynge / riht at ihesus wil
¶ For beo þis deorkenesse y-do / deþ worth y-venkysed
And ȝe lordynges han lost / for lyf schal haue þe maystrie
And ȝoure Fraunchise þat freo was / fallen is to þraldame
And alle ȝoure children cherles / cheuen schul þei neuure
Ne haue lordschup in londe / noþur lond tulye
And as barayne beo / and by vsure libbe
Þe wuche is lyf þat oure lord / in {l}alle lawes defendeþ
¶ Now beoþ ȝoure god dayes don / as daniel / of ȝow telleþ
When crist wiþ croys ouur-cam / ȝoure kynedom schal to-cleue
Cum uenerit sanctus sanctorum cessabit vnctio vestraC
¶ What for fere of þis ferly / and of þis falce iewes
I drow in þat deorkenesse / to descendit ad inferna
And þer y sayh sothly / secun{i}dum scripturas /
Out of þe west as hit were / a wenche as me þouhte
Cam walkynge in þe way / to helle-ward he lokede
Mercy / hihte þat mayde / a mylde þink wiþ-alle
And fol benigne burde / and boxom of speche
¶ Heore sustur as hit semede / cam softely walkynge
Euene out of þe est / and westard he thoughte
A comely creature and clene / treuþe scho hyghte
For þe vertu þat hure folowede / a-ferd was scho neuure
¶ When þus maydones metten / Mercy and treuthe
Ayþur axede of oþur / of þis grete wondur
Of þe dene and derknesse / and hou þe day roued
And wuche a lyht and leem / lay by-fore helle
¶ I haue ferly of this fare / in faith seyde treuthe
And y am wendynge to wyte / what þis wondur meneþ
¶ Haue no meruaille þer-of guaþ {.....}Mercy / murthe hit by-tokneþ
A mayde þat hatte {m....}arie and modur wiþ-oute velynge
Of eny kynde of creature / conceyuede þrow speche
And grace of þe holygost / wax gret wiþ childe
Wiþ-oute wommone wem / in-to þis worlde brouht hym
And þat my tale is trewe / {d}y take god to witnesse
¶ Sythen þis barn was y-bore / beoþ þritty wyntur passet
deyde and deþ þolede / þis day a-boute mydday
Þat is þe cause of þis eclypse / þat ouur-c{h}loseþ now þe sonne
In menyng þat man schal / fro meorknesse beo drawe
Þe while þis lyht and þis leom / schal lucyfer a-blynde
¶ For patriarches and prophetes / han preched her-of ofte
Þat þynge þat tynt was wiþ treo / treo schal hit wynne
And that þat deþ doun brouhte / deþe schal releue
¶ That þat þou tellest quaþ / treuthe is but a tale of walterot
For Adam and Eue / and abraham with oþere
Patriarches and Prophetes þat in þe peyne liggen
Leof hit neuere þat ȝeon lyht / hem a-loft brynge
Ne haue hem out of helle / hold þi tonge mercy
¶ Hit is trufle þat þow tellest / y treuthe wot þe soþe
That þing þat ones is in helle / out comeþ hit neuure
For Iob þe parfit patriarke / repreoueþ þi sawes
Quia in inferno nulla est redempcio /
¶ Þen Mercy ful myldely / mouthede þeos wordes
Þrogh experience quaþ heo / y hope þei schulle beo saued
For venym for-doþe venym / þer fecche y euydence
Þat adam and Eue / hauen schol bote
¶ Of alle fretynge venymes / þe vylest is þe scorpion
May no medicine amende / þe place þere he styngeþ
Til he beo ded y-do þer-to / and þenne hit destruyeþ /
Þe furst venymus mete / þrow vertue of hym-selue
¶ And so schal þis deþ for-do / y dar my lyf legge
Al þat deþ and þe deouel / dude formost to Eue
¶ Ryht as þe gylour þrow gyle / by-gyled man formast
So schal grace þat al by-gan / make a good ende
And by-gyle þe gylour / and þat is a good sleihþe
¶ Now suffre we seyde treuthe / y seo as me þinkes
Out of þe nype of þe norþe / not fol feor hennes
Rithwysnesse com rennynge / reste we þe while
For he wot more þenne we / he was er we boþe
¶ Þat is sothe seyde Mercy / and y seo her by southe
Wher comeþ pees pleynge / in pacience cloþed
Loue heore hathe coueyted longe / leoue y non noþur
But Loue haue sent hure som lettre / what þis liht by-meneþ
Þat ouur-houeþ helle þus / he schal vs telle
¶ When pees in pacience cloþed / aproched ayþur othur
Ryhtwysness reuerencede Pees / in heore riche cloþinge
And preyde pees to tellen heore / to what place he wolde
In hure gay garnemens / wham heo glady þouhte
¶ My wil is to wende guaþ pees and to wel-come hem alle
Þat mony day myht not y seo / for merkenesse of synne
Adam and Eue / and othere more in helle
Moyses and mony mo / mercy schullen synge
And y schal daunce þer-to / do al-so þou sustur
For ihesus ioustede wel / ioye by-gynneþ dawyen
ad vesperum demorabitur fletus
& ad matutinum leticia .C
¶ Loue þat is my lemman / suche lettres heo me sente
Þat Mercy my sustur and y / mankynde schullen saue
¶ And þat god hath for-gyue / and graunted to man-kynde
Mercy my sustur and me / to meympryse hem alle
And crist haþ couerted þe kynde of rihtwysnesse
In-to pees and pyte / of his pure grace /
¶ Lo here þe patente quaþ pees / in pace in idipsum
And þat þis dede schal dure / dormiam et requiescam
¶ Rauest þou quaþ rithwisnesse or þou art riht dronke
Leouest þow þat ȝonde liht / vnlouke myhte helle
And saue mannes soule / sustur wene hit neuure
At þe by-gynnynge of þe worlde / god gaf þe dom hym-self
Þat Adam and Eue / and al his vssue /
Scholden deye doun-riht / and dwellen in peyne euure
If þei touched þe treo / and of þe fruyt eten
Adam afturward / a-ȝeins his defense
Fast fret of þat fruyt / and for-soke as hit were
Þe lel loue of oure lord / and his lore boþe
And folowede þat þe feond tauhte / and his fleises wil
A-ȝeins reson and rithwisnesse / recorde þis wiþ trewþe
Þat here peyne is perpetuel / no preyere may hem helpe
¶ For-þi let hem chewe as þei chose / and chide we nat sustresC
for hit is a boteles bale / þe bite þat þei eten
¶ And y shal preye quaþ / pees heore peyne mot haue ende
Þat heore wo in-to wele / wende mote at þe laste
¶ For had þei wuste of no wo / wele hadde þei not knowe
For wot no whit wat wele is / þat neuure wo suffrede
Ne what is hot hongur / þat had neuure defaute
¶ Of couthe kyndeliche / whit colour discreue
If alle þe worlde were whit / or swan wiht al þinges
If no nyht were / no man as y leoue
Scholde wite witturly / what day were to mene
¶ Ne hadde god suffrede of som / oþer þan him-selue
He hadde not wuste witturly / weþur deþ were sour or swete
¶ For scholde neuure rihtriche / riht riche man / þat lyueþ in reste and hele
I-wite what wo is / {..} ne were þe deþ of kynde
¶ So god þat al by-gan of his goode wil
By-cam man of a mayde / mankynde to saue
And suffrede to beo sold / to seo þe sorow of deynge
Þe wuche vnknutteT al care / and comsynge is of reste
¶ For tyl moryne mete with ous / y may hit wel a-vowe
Ne wot no whit as y wene / what is y-now to mene
¶ For-þi / god of his godenesse / þe furst man Adam .
He sette hym in soloce furst / and in souerayne murthe
And sithe soffrede hym to synige / sorow to fele
To wite þer-þrow what wele was / and kyndely to knowe
¶ And aftur a-untrede god him-self / and toke adames kynde
To wite what he hadde y-suffrede / in þre sondry places
Boþe in heuene and in eorthe / and now to helle he þenkeþ
To wite what al wo is / þat wot of alle ioye /
Omnia probate / quod bonum est tenete
So schal hit fare by þis folc / here folye and here synne
Schal lere hem wat loue is / and lisse wiþ-oute ende
¶ For wot no whit wat werre is / þer-as pees regneþ
Ne what is witturliche wele / tyl welawey him teche
¶ Þenne was þer a whit / wiþ to brode yen
Bok hiht þat beupere / a bold man of speche
By godes body quaþ þis bok / y wol bere witnesse
Þo þis barne was y-bore / þer blased a sterre
Þat alle þe wyse of þis worlde / in o wit acordede
Þat suche a barne was y-bore / in bethleem þe cyte
Þat mannes soule scholde saue / and sinne distruye
And al þe Elemens quath he Bok / here-of bereþ witnesse
¶ Þat he was god þat al wrouhte / þe welkene furst sewede
Þo þat weren in heuene / token Stella comata
And tenden hit as a torche / to reuerence his burthe
Þat liht folowede þe lord / in-to þe low eorthe
¶ Þe watur witnessed þat hit was god / for god wente on hym drye
Petur þe apostle / parceyuede his grace
And as he wende vpon þe watur / wel hym knewe and seyde
domine iube me venire ad te
¶ Lo hou þe sonne gan louke / hure lyht in hure-selue
When heo sey hym suffre deþ / þat sonne and see made
¶ lo þe eorthe for heuynesse / þat he wolde deþ suffre
Quakede as quyk þing / and al to-quasche þe roches
¶ lo helle myht not holde / but openede / þo god deþ þolede
And let out symondes sones / to seo him honge on rode
non visurum se mortemC
¶ Now schal lucifer leoue hit / thauh him loþe þinke
For Ihesus as a geaunt / with a gyn comeþ ȝende
And to haue out alle / of hem þat him likeþ
¶ And ȝut y bok wol beo brent / but he a-ryse to lyue
And conforten al his kyn / and out of care brynge
¶ And al þe Iuwene ioye / vnioynen and vnlouken
And but if þei reuerence his resurreccion / and þe rode honoure
And by-leue on a newe lawe / beo y-lost lyue and soule
¶ Suffre we seyde truthe y hure and seo boþe
A spirit speke to helle / and bit vnsperre þe ȝatesT
A vois loude in þat liht / to lucyfer seyde
Prynces of þis paleys / preost vn-do þe ȝates
For here comeþ with crowne / þe kyng of alle glorie
¶ Þenne syhede satan / and seyde to helle
Suche a liht a-ȝeins ous alle / lazar hit fette
Colde care and combraunce / is come to ous alle
If þes kyng comen In / Mankynde he wol feccheC
And leden hit þer lazar is / and lithliche me bynde
patriarches and prophetes / han parlet her-of longe
Þat suche a lord and a lyht / schal leden hem al hennes
¶ Ac ryse vp Ragemoffyn / and reche me al þe barres
Þat belial þy belsyre / beot wyþ þi damme
And y schal lette þis lord / and his liht stoppe
Þat no liht leopon In / atte þe louer ne at loupe
¶ And þou astrot hote out / and haue out knaues
Coltynge and al his kyn / oure catel to saue
¶ Broimstoun boylaunt / brennynge out cast hit
Al hot on here hefdes / þat entren ny þe walles
¶ Setteþ bowes of brake / and brasone gonnes
And scheoteþ out schot y-nouh / his scheltrom to blende
¶ Sette mahon at þe mangenel / and mulle-stones þroweþ
With crokes and calketrappes / a-cloye we hem echone
¶ lustneþ quath lucyfer / for y this lord knowe
Boþe þis lord and þis lyht / is longe gon y knewe hym
May no deþe þis lord dere / ne no deueles queyntyse
¶ And wher he wole is his waye / ac war hym of þe periles
If he reue me of my ryht / he robbeþ me by maystrie
¶ For by ryht and reson / þe renkes þat beon here
Body and soule beoþ myne / boþe goode and ille
¶ For he hym-self hit seyde / þat sire is of helle
Þat Adam and Eue / and alle his issue
¶ Scholden deye with deol / and here dwelle euure
If þat þei touched a treo / or toke þer-of an appul
Þus þis lord of liht / suche a lawe made
¶ And syþe he is so lel a lord / y leoue þat he wol nat
Reuen vs of oure ryht / syþen resoun hem dampned
¶ And sythe we han beo sesed / seuene þousand wyntur
And neuure was þer-a-ȝein / and now wolde by-gynne /
He were vnwrayst of here worde / þat witnesse is of treuthe
¶ Þat is soþe sayde Satan / but y me sore doute
For þow gete hym with gyle / and his gardeyn broke
A-gayns his loue and his leue / on his lond ȝeodest
Not in forme of a feond / but in forme of an eddre
And Entysedest Eue / / to ete by heore one
And by-heitest heore and hym / aftur to knowe
As two godes wiþ god / boþe good and ille
Thus with treson and tricherie / thou troiledest hem boþe
And dudest hem breke here buxumnesse / throw falce by-heste
¶ Thus haddest þou hem out / and hidur at þe laste
Hit is not greythely getoun / þer gyle is þe roteC
We haue no trewe tytle to hem / for þi treson hit makeþ
¶ For-þi y drede me quaþ þe deuul / lest treuthe wol hem fecche
And as þou by-gylest godes ymage / in goynge of an eddre
So hathe god by-gyled vs alle / in goynge of an wye
¶ For god haþ gon quaþ gobylyn / in a gome liknesse /
This þritty wyntur as y wene / and went a-boute and preched
¶ I haue assailed him wiþ synne / and some-tyme y askede
Wher he were god or godesone / he gaf me schort vnswere
Thus haþe he troylod and trauayled / in his tyme
Forþe like a tydy man / this two and þritty wyntur
¶ And whan y sey þat hit was so / y sotylede hou y myhte
Lette hem þat louede hym nat / lest þei wolde martre
¶ I wolde a lengþed his wyf / [l]yf / for y leued if he deyde
And soule hydur come / he scholde schende vs alle
¶ Þe body whyles hit on bones ȝeode / a-boute was hit euure
To lere men to beo lelle / eche man to loue oþur
¶ Þe wuche lyf and lawe / beo hit longe y-vsed
Hit schal vndon vs deuules / and doun brynge vs alle
¶ Now y seo where his soule comeþ / seylynge hydurwardes
With glorie and wiþ grete liht / god hit is y wote wel
¶ I rede we Fleo quaþ þe feond / faste al hennes
For ous were betre not beo / þan a-byde in his sihte .
¶ For þi lesynges lucyfer we losten furst oure ioye
And oute of heuene hydur / thy pruyde made vs falle
For we leued on þin lesynges / ther losten we blisse
¶ And now for a latere lesynge / þat þow lowe tyl Eue
We han lost oure lordschip / a londe / and in helle
nunc princeps huius mundiC
¶ Sy þat satan mysseyde thus foule
Lucyfer for his lesynges / leoue y non other
But oure lord at þe laste / lyheres here rebuke
And wyten hem al þe wrechednesse / þat wrouhte is on eorthe
Beoþ y-war ȝee wyse clerkes / and witty men of lawe
Þat ȝeo by-gyle nat þis lewede men / for atte þe laste
Witnesseþ in his wrytinge / what is lyeres mede
Odisti omnes qui operantur iniquitatem / perdes omnes qui locuntur mendacium
A litul ich ouur-lipe / for lesynges sake
Þat y ne segge as y seyh / suynge my teme
¶ For eft liht bade vnlouke / and lucifer aswerede
What lord art þow quath lucyfer a vois a-louhd seyde
Þe lorde of myht and of mayn / þat made alle þinges
Duke of þis dymme place / a-non vndo þe ȝates
Þat criste mowe comen In / þe kynges son of heuene
¶ And with þat breþe helle brake / wyþ al belial barres
For eny wy or w{o}arde / wyde openede þe ȝates
patriarches and prophetes / populus in tenebris
Songen with seynt Iohan /Ecce agnus dei .
/ ¶ Lucyfer loke ne myhte / so lith hym a-blente
And þo þat oure lord louede / with þat liht forþe flowen
¶ lo me here quaþ oure lorde / lyf and soule boþe
For alle synful soules / to saue oure bey ryht
Myne þei were and of me / y may þe bet hem clayme
¶ Al-þauh reson recorde / and riht of my-selue
Þat if þei eten þe appul / al scholden deye
I by-hihte hem nat here / helle for euure
¶ For þe dedly synne þat þei duden / þi deceyte hit made
With gyle þou hem gete / a-gayne al resoun
¶ For in my paleys paradys / in person of an eddre
Falsliche fecchedest þere / þat me by-fel to loke
By-glosedest hem and bygyledest hem / and my gardyn breke
A-ȝeins my loue and my leue / þe olde lawe techeþ
Þat gylours beo by-gyled / and in here gyle by-falle
¶ And wo-so hitteþ out a mannes eye / or elles his fore-teþe
Or eny maner membre / maymeþ or hutteþ
Þe same for schal he haue / þat eny so smyteþ
dentem pro dente et oculum pro oculo /
¶ So lyf schal lyf lete / þer lyf haþ lyf aneynted
So þat lyf qui{..}te lyf / þe olde lawe hit askeþ
Ergo / soul schal soul quite / and synne to synne wende
And al þat man mysdude / y man to amendon hit
¶ And þat þat deþ fordude / y deþ to releuen
Boþe aquite and quykie / þat was a-queynte þrow synne
And gyle beo by-gyled / þrow grace at þe laste /
Ars ut artem falleret .C
Fecche here eny sunfol soule / souereynly by maistrie
But throw rith and resoun / raumson here my lige
Non veni soluere legem / sed ad-implere /
So that þorhg gyle was getoun / þrow grace is nowe y-wonne .
¶ And as Adam and alle / þrow a treo deydoun
Adam and alle þrow a treo / schal turne to lyue
¶ And now by-gynneþ þi gyle / a-gayn on þe turne
And my grace to growe / ay wyddur and wyddur
¶ The bitturnesse þat þow hast browe / now brouke hit þi-self
Þow ert doctour of deþe / dryng þat þou madest .
¶ For y þat am lord of lyf / loue is my drynke
And for þat drynke to-day / deide as hit semed .
¶ Ac y wol drynke of non dysche / ne of non deop Clergye
But of comune coppes / al cristone soules
¶ Ac thy drynk worþe deth / and deop helle þi bolle
I fauht so . me furstuþ ȝut / for mannes soules sake
scicio / sicioC
¶ May no piement ne pomade / ne precious drynkes
Moyste me to þe folle / ne my furst slocke
Til þe vendage valle / in þe vale of iosophat
And drynke ryht ripe most / resurreccio mortuorum /
¶ Þenne schal y come as a kynge / with crone and with angeles
And haue out of helle / al mennes soules
¶ Feondes and feondkynes / by-fore me schulle stande
And beo at my byddynge / at blisse or at peyne
¶ Ac to beo merciable to man / þenne my kynde askeþ
For wo beoþ breþeren of blod / ac nat in baptisme alle
Ac alle þat beon myn half breþeren / in blod and in baptisme
Schal neuure eft in helle come / beo he onus oute
/ tibi soli peccaui & ma=
lum coram te feciC
¶ Hit is not vsed on eorthe / to hongon eny felones
Oftur þanne ones / thau þei weron treytours
¶ And if þe kynge of þe kynedom / come in þe tyme
Ther a þeof þolie scholde / dethe or Iuwyse
Lawe wole he ȝeue hym lyf / and he lokede on hym
And y þat am kyng ouur kynges / schal come suche a tyme
Ther þat dom to þe deth / dampneþ al wykede
And if lawe wole y loke on hem / hit lith in my grace
Weþer þei deye or dey not / dude þei neuure so ill .T
As nullum malum impunitum & nullum bonum irremuneratum .
And so of alle wykkede / y wole here take veniaunce
And my kunde in my kene Ire / schal constrayne my wil
domine ne in furore tuo arguas me
To beo merciable to meny / of myn half-breþeren
¶ For blod may seo blod / boþe a-furst and a-kale
Ac blod may not seo blod / blede but hym rewe
Audiui archana verba que non licet homini loqui
Ac my rithwesnesse and riht / schal regnen in helle
And mercy and man-kynde / by-fore me in heuene
¶ For y were an vnkynde kynge / but y my kyn holpe
And nameliche at suche a neode / þat neodes help askeþ
Non intres in iudicio cum seruo tuo /
¶ Thus by lawe quaþ oure lorde / lede y wol fro hennes
Al tho þat y louye / and leouede in my comynge
Ac for þe lesynge þat þow lowe / lucyfer tyl eue
Þou schalt a-buy bittere quod god / and bound hym wiþ cheynes
¶ Astrot and al othere / hudden hem in hurnes
Þei durst not loke on oure lord / þe leste of hem alle
But lette hym lede forþ wuch hym lust / and leue wuche hym likede
Mony hondred of angelus / harpedoun þo and songoun
Culpat caro purgat caro regnat deus
Þenne pipede pees of poetes / a note
Clarior est solito / post inimcicias / inim[i]cicias clarior est et amor
Aftur scharpest schoures quaþ pees / / most schene is þe sonne
Is no wedur warmor / þan aftur watery cloudes
Noþur loue leuere / ne leuere frendes
Þan aftur werre and wrake / whan loue and pees beoþ maystres
¶ Was neuure werre in þis worlde / ne wykkedor enuye
Þat loue and hym luste / to lauhinge brouhte
¶ Truwes quaþ treuth / thow tellest soþe by ihesus
Cluppe we in couenaunt / and eche of vs cusse othur
And leet no people quaþ pees parceyue þat we chydde
For inpossible is no þinge / to hym þat is al-myhty
¶ Thow seist sothe quaþ rithwesnesse / and reuerently heo custe
Pees and pees heore / per secula seculorum
Misericordia & veritas obuiauerunt sibi / iusticia & pax osculate sunt .
treuthe trompode þo / and songe te deum laudamus
¶ And þenne lutede loue / in a loud note / Ecce quam bonum & quam iocundum
¶ Tyl þe day dawede / þese damyseles daunsede
Þat men rang to þe resurreccion / and wiþ þat y a-wakede
And calde kitte my wyf / and kalote my dowtur
A-rys and go reuerence / godes resurreccion
And creop on kneos to þe cros / and cusse hit for a Iuwel
And rithfollokest a relyk / non richerre on eorþe
¶ For godes blesset body / hit bar for oure bote
And hit a-fereþ þe feond / for suche is þe myhte
May no gryseliche gost / glide þer hit schadewiþ .
Explicit passus quartus et vltimus de dobet
{So l}