And was shryuen of þe preest · that gaf me for my synnes

To penaunce · paciens and pouere men to feede

Al for cuueitise of my cristendome  in clennes to kepe it

¶ And kouthe I neuere by crist · kepen it clene an houre

That I ne fouled it with sight  or som ydel speche

Or thurgh werk or word · or wille of myn herte

But I ne floboure it foule · fra morwe til eue

And shal kenne þe quod conscience · of contricioun to make

That shal thy cote · of alle kynnes filthe

Cordis contricio & cetera ·

Do wel wasshen it and wryngen it  thurgh a wyes confessour

Oris confessio & cetera ·

Do bet shal beten it and bouke it  as bright as any scarlet

And engrayuen with good wille  and goddes grace to amende the

And sithen send the satisfaccioun · for to sowen it after

Satisfactio & cetera

Do best shal neuere myst bynolnen it · ne mought after biten it

Ne fende ne falss man · defoulen it in thy lyue ·

Shal no heravde ne harpour · haue a fairer garnement

Than haukyn the actif man  and thow do my techyng

Ne no mynstral be more worthe · amanges pore and riche

Than haukyns wif the wafrer with his actiua vita

¶ And I shal purueye the paste · quod paciens ; thouȝ no ploughe erye

And flour to fede folk with  as best be for thy saule

Though neuere greyn growed · ne grape vp-on vyne

Al that lyues and lokes · liflode wol I fynde

And that I nought shal non faille · of thyng þat hem nedes

We shold nouȝt be to bisie · a-boute oure liflode

Ne soliciti sitis & cetera volucres celi deus pascit & cetera Pacientes vincunt & ceteraC

¶ Than laughed · haukyn a litel · and lightly gan swere

Who-so leueth yow by our lord I leue nouȝt he be blissed

¶ No quod pacience paciently ˜ and out of his pok hente

vitailles of gret virtues · for al manere bestes

And saide lo here liflod ynough · if oure bileue be trewe

For lent neuere was lif · but liflod were schapen

Wher-of · or wherfore · or wherby to libbe

¶ First the wilde worm · vndir wete erthe

Fisshe to lyue in þe flood · and in the fir þe crikat

The curlowe by kynde of þe eire · moost clennest flessh of briddesCN

And bestes by gras and greyn · and by grene rotes

In menyng that alle men · myȝt se same ·

Lyue thurgh lele bileue · and loue as god witnesseth

Quodcumque pecieritis a patre in nomine meo & cetera et alibi non in solo pa-

¶ Bot I loked what liflode it was · that paciens sa praised

And than was it a pece of the pater noster · fiat voluntas tua

¶ haue haukyn quod pacience  and ete this whan the hungresC

Or whan thow clomsest for colde · or clyngest for drye

Shul neuere gyues the greue · ne gret lordes wrathe

Prison ne peyne for pacientes vincunt

By so þat þou be sobire · of sight and of tonge

In etyng and in handelyng ˜ and al thy fyue wittes

Thardestow neuere care for corun · ne lennen cloth ne wollen

Ne for drynk ne deth dred · but deye as god likes

Or thurȝ hunger or þurȝ hete · at his wille be it

For if thow lyuest after his lore · þe shorter lif þe better

Si quis amat christum mundum non diligit istum

For thurȝ his breth bestes · wexen and abrood yeden

dixi & facta sunt & cetera ·

Ergo thurȝ his brethe · mowen men and bestes lyuen

As holy vrit witnesse ˜ whan men sayes hir graces

apperis tu manum tuam & imples omne animal benediccione

¶ It is founden þat fourty wynter · folk lyued withoute tilynge

And out of the flynt spronge the flood · þat folk & bestes dronke

And in helyes tyme ˜ heuen was yclosed

That no rayn ne raynde · thus rede men in bokes

That many wyntires men lyueden · and no mete ne tylied

Seuene slepe as sayes the book · Seuene hundre wynter

And lyueden with-outen liflode · and þe laste þey woken

And if men lyued as mesure wolde · schulde neuere be defaute

Amanges cristen creatures · if cristes wordes be trew ˜

And vnkyndenesse caristia makes amange cristen pepile

And ouer plente makes · amange pouere and riche

And mesure is so muche worth · it may nouȝt be to dere

For the myschief and the myschaunce ; amonges men of sodome

Wex thurȝ plente of payn · and of pure sleuthe

Ociositas & habundancia panis peccatum turpissimum nutriuit

For thay mesured nouȝt hem-self · of þat thay ete & dranke

didden dedly synne · that þe deuel liked

So vengeaunce felle vp-on hem · for hir ville synnes

thay sonken in-to helle ˜ the Cittes Ilcone

¶ For-thy mesure we vs wel ˜ and make oure faith our shyltrounC

And thorugh faith cometh contricioun · conscience woot wel

Which dryues aw{e}ay dedly synne · and does it to be venialT

And brynge his saule to blisse · so that faith bere witnesse

That whiles he lyued he bileued · the lore or holy chirche

Ergo contricioun · faith · and conscience ; is kyndely do wel

And surgiens for dedly synnes ˜ whan schrift of mouthe faillesC

¶ And schrift of mouthe more worthy ˜ if man yliche contrite

For schrift of mouthe slees synnes · be it neuere so dedly

Per confessione to a preest · peccata occiduntur

Ther contricioun does but dryues it · in-to a venial synne

And dauid sayes in the sauter · et quorum tecta sunt peccata

¶ And satisfaccioun sekest out þe rote · and bathe sleeth and woides

And as it neuere had I-be to nouȝt · brynges dedly synne

That it is neuere eft seen sore · but semees a wounde heled

¶ Whare wonnes charite quod haukyn · I wist neuere in my lyueC

Man that with hym spak · as wide as I haue passed

Ther parfit treuthe and pouere herte is · and pacience of tonge

Ther is charite the chife chamber · for god hym-selue

¶ Wheither pacience pouerte quod haukyn · be more pleasaunt to oure sightC

Than richesse riȝtfulliche wonne and resonablich spende

ye quis est ille quod pacience ˜ quik laudabimus eum

Thouȝt men rede of richesse · riȝt to the worldes ende

I wist neuere renk that riche was ˜ þat whan he rekene scholde

Whan he droue to his deth day ˜ þat he ne dred hym sore

And that at þe reknyng in arrerage · fel rather than oute of detteC

¶ Ther the pouere dar plede · and preue by pure resoun

To haue alowaunce of his lorde · by the lawe he it cleymes

Ioie that neuere Ioie hadde ˜ of riȝtful Iugge he axeth

And sayes lo briddes and bestes · that no blisse ne couthe

And wilde wormes in wodes · thurȝ wynters þou hem greuest

And makest hem wel neiȝ meke · and mylde for defaute

And after þou sendest hym somer · that is hir souerayne Ioie

And blisse to alle that ben · bothe wilde and tame˜

¶ Than may beggers and bestes · after bothe wayten ·

That al hir lif han lyued · in langour and in defaute

But god sent hym som-tyme · som manere Ioie

Other hyere or elles-where ˜ kynde wolde it neuere

For to wo other wel was he wrouȝte · þat neuere was Ioie schapied

¶ Aungels that in helle now ben ˜ hadden Ioie som-tyme

And diues in deytees / dey[n]teesT lyued ˜ and in douce vie ·

Right so reson sheweth · þat þo men þat were riche

And hir makes also · lyued hir lif in myrthe

¶ And god is of a woundire wille · by þat kynde wit schewees

To gyue many men his mercymonie · er he it haue deserued

Riȝt so fares god by som riche ˜ reuthe me it thynkes

For thay haue hir hire here · and heuen as it were

And is gret likyng to lyue  · with-oute labour of body

And whan he deyes be disalowed · as dauid sayes in the sauter

dormierunt & nichil inuenerunt .

And in an other stede also ˜ velut sompnium surgencium domine in

Ciuitate tua & ad nichilum rediges

¶ Allas that richesse schal reue · and robbe mannes saule

Fram the loue of oure lord ˜ at his laste ende

¶ Hewen þat han hir hire · after aren euermore nedy

And selden dyeth he oute of dette · þat dyneth er he deserue it

And til he haue don his deuoir · and his iourne˜

For whan a werkman hath wrouȝte ˜ þan may men se þe sothe

What he were worthy for his werk · and what he has deserued

And nouȝt to fange bifore · for drede of disalowynge

¶ So I saye by yow riche ˜ it semes nouȝt þat ye shull

haue heuene in youre hee beryng ˜ and heuen here-after

Riȝt as a seruant takes his hire ˜ bifore and after walde clayme moreC

As he þat non hadde · and has hire atte laste

It may nouȝt be ye riche men ˜ or mathew on yow lyes

De delicijs ad delicias difficile est transire

¶ And if ye riche haue reuthe ˜ and reward wel the pouere

And lyuen as þe lawe teches ˜ don leaute to hem alle

Criste of his curteisye · schal confort yow atte laste

And reward alle doubile richesse · þat reufulle hertes hases

And as an hyne þat had his hire · er he bigonne

And whan he has don his deuoir wel · men does hym oþer bounteCN

Gyfe hym a Cite aboue his couenant · riȝt sa crist gyues heuen

Bot to riche and to nouȝt riche · þat reutfullich lyues

And alle þat does hir connande wel · han double hire for hir trauailleC

Forgyuenesse of hire synnes · and heuen blisse after

And it nys but selde so seyn · as by haly sayntes bookes

That god rewarded doubile reste to any riche wye

For muche myrthe is amange riche ˜ as in met and clothyng

And mykyl myrthe in may ˜ is amang wilde bestes

And sa forth while somer lastes · hir solace dures

And beggers aboute myssomer · bredles thay soupe

And yet is wynter for hem wors · for weet shoed they gange

Afirst sore and affyngerd · and fouliche rebuked

And arated of riche men · that reuth is to here

Now lord sende hem somer · and som manere Ioie

Heuene after hir hennes goyng ˜ that here han swich defauteCN

For alle myghtestow haue made · non mener than other

And ylich witty and wise · if thy wille had liked

And haue reuthe of thise riche men · þat reward nouȝt thy prisoners

Of the goode þat thow hem gyuest · Ingrati ben many

And god of thy goodnesse ˜ gif hem grace to amende

For may no derthe ben hem dere · drouȝte ne wete ·

Ne neither hete nor haille ˜ haue thay hir hele

Of þat thay wilne and wolde ˜ wantes hem nouȝt here

¶ And pouer pepyle thy prisoners · lord in the pyte of myschief

Conforte tho creatures ˜ that muche care suffren

Thorugh derthe and droughte · alle hir dayes here

Wo in wynter tymes for wantyng of clathes

And in somer tyme · selden soupen to the fulle

Conforte thy careful · crist in thy riche

For how thow confortest alle creatures · clerkes beres witnesse

Conuertimini ad me & salui eritis

¶ Thus in genere of gentrise · Ihesu crist saide

To robbers and to reuers · to rich and to pouerT

Thow taughtest hem in þe Trinite to take baptyme

And be clene thurgh þat cristennyng · of al kynnes synnes

And vs fel thorugh folie · to falle in som after

Confessioun and knowlechyng ˜ and crauyng þy mercye

Shuld amende vs as many sithes · as man walde desire

And if the pope walde plede here ayein · & punishe vs in conscience

He sholde take the aquitaunce as quik · & to þe queed shewe itC

Pateat & cetera per passionem domini & cetera .

And putten of the pouke · and preuen vs vnder borowe

And the parchemyn of this patente · of pouerte be mooste

And of pouere pacience ˜ and parfite bileue

Of pompe and of pride · the parchemyn decorreth

And principalich of alle pepile ˜ but thay be pouere of herte

Elles is al on ydel · al þat euere we written

Pater noster · and penaunce · and pylgrymage to Rome

Bot oure spence and spendyng · sprynge of a trewe wylle

Elles is al our labour loost ˜ lo how men writees

In fenestres at the freres · if fals be the foundement

For-thy cristen shuld be in comune riche non coueite for hymselueC

¶ For seuene synnes ther be · assaillen vs euere

The fende folowes hem alle ˜ and fondes hem to helpe

And with richesse þat ribalde · rathest men bigiles

For ther þat richesse regnes · reuerence folwes

And that is plesant to pride · in pouerte and in riche

And the riche is yreuerenced ; by reson of his richesse

That þe pouere is put bihynde · and parauenture kan more

Of wit and of wisdome · that fere away is better

Than richesse or reaute ˜ and rather herde in heuene

For the riche has muche to rekne · and ryght softe walkes

The heigh way to heuenward · ofte richesse lettes

¶Ita possibile diuiti & cetera ·

Ther the pouer preses bifore the riche · with a pak at his ryggeC

Opera enim illorum sequntur illos

Batanlich as beggers doon · and boldelich he craues

For his pouerte and pacience · a perpetuel blisse

Beati pauperes quoniam ipsorum est regnum celorum

And pride in richesse regnes · rather than in pouerte

Arst in the maistre than in the man · som mansioun he has

And in pouerte ther pacience is · pride has na myghte

Ne noon of the seuene synnes · sitten ne mow ther longe

Ne haue power in pouerte · if pacience it folowe

For the pouer is ay prest · to plese the riche

And buxom at his biddyng · for his broke loues

And buxomnesse and boost · arn euere at werre

And ayther hates other · in al manere werkes

¶ If wrath wrystel with the pouere · he has the wors ende

For if thay bath pleyne · the pouere is bot fibile

And if he chide or chater · hym cheues the warseT

¶ And if coueitise cacche the pouere · thay may nouȝt com togidersCN

And by the nekke namly hir noon may hent other

For men knowen wel þat coueitise is of a kene wille

And hase handes and armes · of a lang lengthe

And pouerte nys but a petit thyng · apeers nouȝt to his nauele

And louely laike was neuer bitwene þe lange and the short

¶ And þough auarice walde þe pouere · he has bot litil miȝte

For pouerte has bot pokes · to puten Inne hise soddes

Ther auarice hath almarys · and Iren bounde coffres

And whether be lighter to breke · lasse boost it makes

A begger bagge than an Iren bounden coffires

¶ leccherie loues hym nouȝt · for he gyues bot litel siluer

Ne doos hym nouȝt dyne delicatly · ne drynk wyn ofte

A strawe for the stewes · it stood nouȝt I trowe

Had thay no thyng but of pouere men · hire houses stood vntiled

¶ And though sleuthe swe pouert · and serue nouȝt to paye

Myschief is his maistre · and makes hym to thynke

That god is his grettest helpe · and no man elles

And is seruaunt as he sayes · and of his suyte bothe

And wheither he be or nouȝt · he beres the signe of pouerte

And in that secte oure saueour · saued al man-kynde

For-thy al pouerte þat paciens is · may claymen and asken

After hir endyng here · heuene-riche blisse

Mykyle hardyer may he axen · that here miȝt haue his wille

In londe and in lordschip · and likyng ob / o[f] body

And for goddes loue leueth al · and lyues as a begger

And as a mayde for mannes loue · hir moder forsakes

hir fader and al hir frendes · and folowes hir make

Muche is swich a maide to loue of hym · þat swich oon takes

More than a maiden is · that maried thurȝ brocage

And by assent of sondry parties · and siluer to bote

More for coueitise of good · than kynde loue of bothe

So it fares by ech a persoun · thaLX possession forsakes

And puttes hym to be pacient · and pouertee weddes

The which is sibbe to god hym-self · and so to hise sayntes

¶ haue god my trouthe quod haukyn · ye praise faste pouerte

What is pouerte with paciens · quod he propirly to mene

Paupertas quod paciens · est odibile bonum Remocio curarum pos-

¶ I kan nouȝt construe þis quod haukyn ye moost sayn on Englissh

¶ In englissh{Barred} quod paciens it is wel hard · wel to expounen

And somdel I shal saye it · by so ye vndirstonde

¶ Pouerte is the first poynt · þat pride moost hates

Than is good by good skille · al þat agastes pride

Riȝt as contricioun is confortabile thyng · conscience woot wel

And a sorwe of hym-self · and solace to þe saule

So pouerte propirliche penaunce and Ioie

Is to þe body · pure spritual helthe

Ergo paupertas est odibile bonum

And contricon confort · and cura animarum the {secunde} secounde

Selde sitte pouerte the sothe to declare

Or as Iustice to Iugge men · enioyned is no pouere

Ne to be a mair abouen men · ne mynister vndir kynges

Selde is any pouere putte · to punisshen any pepile

Remocio curarum

Ergo pouerte and pouere men · parfournes the comaundement

Nolite iudicare quemquam · the thridde

¶ Selde is any pouere riche · bot of rightful heretage

Wynnes he nouȝt with weightes fals ne vnseled mesures

Ne borwes of hise neigboures · but þat he may wel paye

Possessio sine calumpnia

¶ The ferde is a fortune · þat florisshes the saule

With sobrete fram al synne · and also yet more

It affaiteth the flessh · fram folies ful manye

A collateral confort · cristes owne gyfte

Donum dei

The fifte is moder of helthe · a frend in al fondynges

And for the lawde euere a lech · a lemman of al clennesse ·

Sanitas mater

The sexte is a pathe of pees ye thurȝ þe pas of Aultoue

Pouerte miȝte passe · with-oute peril of robbyng

For ther þat pouerte passes · pees folowes {e}after

And euere þe lasse þat he beres · the harder he is of herte

For-thy sayes senica paupertas est absque solicitudine semita

And an hardy man of herte · amang an heepe of theues

Cantabit paupertas coram latrone viator

¶ The seuenthe is wille of wisdome · and fewe wordes schewes

For lordes allowes hym litel · or listnes to his resoun

He temperees þe tonge to treuthward · and no tresoure coueites

Sapiencie temperatrix

¶ The eighte is a lele labour ˜ and lathe to take ? more

Than he may wel deserue ˜ in somer or in wynter

And if he chaffare he charges no losse · mow he charite wynne

Negocium sine dampno

¶ The nynthe is swete to the saule · no sugre swetter

For paciens is payn for pouerte hym-selue

And sobrete swete drynk · and good leche in siknese

Thus lered me a lettred man · for oure lordes loue

Saynt Austyn blissed lif · with-outen bissynesse

For body and saule · absque solicitudine felicitas

Now god þat al good gyues · graunte his saule reste

That thus first wroot to wissen men · what pouerte was to mene

¶ Allas quod haukyn the actif man tho · that after my cristendomeC

I ne had ben dede · and deluen for dowel sake

So hard it is quod haukyn to lyue · and to do synne

Synne sweth vs euere quod he · an sary gan wexe

And wepte water with his eighen · and wailed þe thyme

That euere he dide dede · þat dere god displesed

Swonde and sobbed · and siked ful ofte

That euere he had lande or lordschip · lasse other more

Or maistre ouer any man · mo than of hym-selue

I were nouȝt worthy quod haukyn to werie any clathes

Ne nouther scherte ne schone · saue for shame oon

To couere my cariogne quod he · and cried fast mercye

And wepte and wayled · and ther-with I waked