Thanne scripture scornede me ; and a skille tolde

and lakked me in latyn ; & liȝt be me sette

and saide multi multa sciunt ; et seipsos nesciunt

þo wepte I ffor woo ; & wraþe of hir speche

and in a wyndinge wraþe ; wex I aslepe

a merueylouse sweuene ; mette I me þanne

þat I was rauysshid riȝt þere ; & ffortune me ffette

and in-to þe lond of longinge ; alone sche me brouȝte

In a myroure þat hyȝte mydillerd ; sche made be-holde

Siþen sche seide vn-to me ; here myȝt þou se wondris

and knowe þat þou coueytiste ; & come þer-to parauntere

þanne had ffortune ffolwinge hir ; two ffaire damysellis

Concupiscencia carnis ; men callid þe elder mayde

And coueytise of eyn ; callid was þat oþer

pride of parffiȝt l{e}yuynge P ; pursued hem boþe

and bad me ffor ony contenaunce ; acounte clergie liȝt

Concupiscencia carnis ; culled me abouȝte þe necke

and saydP þou art ȝong & ȝeep ; & hast ȝeris ynow

For to l{e}yue longe ; and ladies to loue

and in þis myroure þou myȝtist see ; myrþis ffull many

þat lede þe wolle to likynge ; all þi lijf-tyme

þe secound said þe same ; I shall sue þi will

Till þou be a lord & haue lond ; lete þe I nylle

þat I ne shall ffolowe þi ffellawschepe ; if ffortune it like

he shall ffynde me his ffrende ; quod ffortune þer-after

þe ffrek þat ffolwid my wille ; ffailid neuere blisse

þanne was þer on hiȝte elde ; þat heuy was of chere

Man quod he if I mete with þe ; be marie of heuene

þou shalte ffynde ffortune þe ffaile ; at þi moste nede

and concupiscencia carnis ; clene þe fforsake

Bitterliche schalt þou banne þanne ; boþe daiez & nyȝtis

Coueitise of þe at euere þou it knewe ;

and pride of parffiȝte {......}lyuynge ; to moche perell þe bringe

ȝe recche þe neuer quod recchelesnesse ; stode fforþe in raggyde cloþis

Followe fforþe þat ffortune wole ; þou hast well ffare to elde

a man may stoupe tyme ynow ; whane he shall tyne þe croune

homo proponit quod a poete ; & plato he hiȝte

and deus disponit quod he ; latte god do his wille

if truþe woll wittenesse it be well do ; ffortune to ffolowe

Concupiscencia carnis ; ne coueytise of eyn

Ne schall non greue þe grettli ; ne bigyle þe but if þou wilte

Ȝe ffare well pheppe quod ffauntelte ; & fforþ gan me drawe

Till conpiscencia carnis ; acordid all my werkis

Allas þ{e}o quod elde ; and holynesse boþe

þat witt shall turne to wrechednesse ; ffor wylle to haue his likynge

Coueytise of eyn ; conffortid me sone after

and ffolwyd me ffourti wynter ; or fifti or more

þat of do-well ne do-bett ; no deynte me þouȝte

I had no likynge ne luste ; of hem ouȝt to knowe

Coueytise of eyn ; cam ofter in my mynde

þanne do-well or do-bette ; amongis my dedis alle

Coueytise of eyn ; conffortide me ofte

and saide haue no concience ; how þou come to good

Go conffesse þe to sum ffrere ; & schewe him þi synnes

For whylis ffortune is þi ffrende ; ffreris woll þe loue

and ffecche þe to her ffraternte ; & ffor þe beseche

To her prioure prouynciall ; a pardon ffor to haue

and prey ffor þe poll be pol ; if þou be pecuniosus ;

Set pena peccuniaria

By wissinge of þis wenche I wrouȝte ; her wordis wer so swete

Tyll I fforȝate ȝowþe ; & ȝerne in-to elde

and þanne was ffortune my ffo ; ffor al hir ffayre biheste

and pouerte pursued me ; & put me lowe

and þo ffonde I þe ffrere afferde ; and fflyttinge boþe

aȝens oure ffrist fforwarde ; ffor I saide I nolde

B{.}e beried at her hous ; but at my parisheP chirche

For I herde ones ; how concience it tolde

þat þer a man were cristened ; be kynde he shuld be beried

Or where he were parishen ; riȝth þer he shuld be grauen

and ffor I said þus to ffreris ; a ffolle þei me helden

and loued me þe lesse ; ffor my lele speche

and ȝit I cried on my conffessoure ; þat helde him-selue so kunnynge

Be my ffeiþ ffrere quod I ; ȝe ffaren like þese wowers

Þat weddyn no wedewis ; but ffor to welde her goodisC

Ryȝt so be þe rode ; rouȝten ȝe neuere

where my body were I-beried ; bi so ȝe had þe siluere

I haue moche merueile of ȝou ; and so haþe many oþer

why ȝoure couent coueytiþ ; to conffesse & to berie

raþer þanne to baptise barnes ; þat ben cathecumynys

Baptisinge & biringeP ; boþe ben ffull nedffull

and moche more merytorie ; me þinkyþ is to baptise

For a baptisid man may ; as maystris tellyn

þoruȝ contriccion come ; to þe hye heuene

sola contricio delet pecatum

and a beren P with-ouȝten baptem ; may not be saued

Nisi quis renatus fuerit ex aqua

loke ȝe lettred men ; whedir I lie or not

and lewte loked on me ; & I louride after

where-ffor louriste þou quod lewte ; and loked on me hard

If I durste quod I amongis men ; þese metelis awoue

Ȝe be peter & bi poul quod he ; & toke boþe to wittenesse

Non oderis fratres secrete in corde tuo set puplice argue illos

þei alegge also quod I ; and be þe gospell preue

Nolite iudicare quemquam

and where-of serueþ lawe quod lewte ; if no lyf vndirtoke

Falsenesse ne ffaytrie ; ffor sum-what þe apostele said

Non oderis ffratrem and in þe sauter also ; seiþ dauiþ þe prophete

Existimasti inique quod ero tui similis & cetera

It is leffull ffor lewde men ; to seie þe soþe

If hem likiþ or liste ; iche a lawe it graunteþ

Exsept persouns & prestis ; & prelatis of holi chirche

It ffalliþ not ffor þat ffolk ; no talis to telle

þouȝ þe tale were trewe ; and it touuchid synne

þing þat alle þe world woot ; werffore shuldeste þou spare

and reden in rethorik ; to arate dedly synne

and be neuere-more þe ffriste ; þe deffauȝte to blame

þouȝ þou se yuell . seie it not ffrist ; be sory it nere amendid

and þinge þat is preuy ; puplice þou it neuer

Neiþer ffor loue laude it not ; ne lacke it not ffor non envie

{parum} lauda vitupera parcius

he seiþ soþe quod scripture þoo ; & skipped on hie & preched

and þe matere þat he meued ; if lewde men it knewe

þe lesse as I leue ; louen it þey wolden

þis was her teme ; & her tixt I toke ffull good heede

multi to a mangerie ; and to þe mete were sompned

and whanne þe peple was plenere comen ; þe porter vnpynned þe gate

and plukkid in pauci priuyliche ; and lete þe remenaunte go rome

alle ffor tene of her tyxt ; trembled myn herte

and in a weer gan I waxe ; & with my-self dispite

wheþer I were chosyn or not ; on holi chirche I þouȝt

þat vndirffenge me at þe ffounte ; ffor one of godis chosyn

For crist cleped vs alle ; Come if we wolden

sarazens & stismatikes ; and so he dede þe Iues

O vos omnes scicientes venite & cetera

And bad hem souke ffor synne ; saueli at his breste

And drink P bote ffor bale ; broke it so myȝte

þanne mown all cristen comen quod I ; & cleyme þer entre

By þe blode þat he bouȝte us with ; and þoruȝ baptisme after

qui crediderit & baptizatus fuerit

For þouȝ a cristen man coueyted ; his cristendom to renyeC

Riȝtffuliche to renye ; no reson it wolde

For may no cherl chartre make ; ne his catell selle

with-outyn leue of his lord ; no lawe wolle it graunte

and he may renne in arerage ; & rome so ffrom home

and as a reneyed Caytif ; rechelesly aboute

And reson shall rekene with him ; and caste him {u}in arerage

and put him after in prison ; in purgatorie to brenne

For his arerage rewarde him þer ; to þe day of dom

But if contricioun wolle come ; & crie bi his lyue

Mercy ffor his mysdedis ; with mouþ or with herte

þat is soþe quod scripture ; may no synne lette

Mercy al to amende ; and mekenesse hir ffelawe

For þei ben as oure bokis tellyn ; aboue godis werkis

Misericordia super omnia opera eius

ȝe bawe ffor bokis quod one was brokyn out of helle

hiȝte tr{o}aianus had ben a trewe knyȝt ; toke wittenesse at þe pope

how he was deed & damnped ; to dwellyn in peyne

For an vncristen creature ; clerkis witten þe soþe

þat all þe clergie vndir crist ; myȝte me cracche ffro helle

But oneliche loue & lewte ; and my laweffull domes

Gregori wiste þis well ; & wilneþ to my soule

salvacioun ffor soþenesse ; þat he seyȝ in my werkis

and after þat he wepte ; & wilned me were graunted

Grace with-out ony bede biddinge ; his bone was vndir-ffongen

And I saued as ȝe mown se ; with-out syngynge of messis

By loue and be lernynge P ; & of my l{e}yuynge P in truþe

Brouȝte me ffro bitter peyne ; þer no biddinge myȝte

lo ȝe lordis what lewte dede ; bi an emperoure of rome

þat was an vncristen creature ; as clerkis ffyndyn in bokis

Not þoruȝ preiere of a pope ; but ffor his pure truþe

was þat sarazyn saued ; as seint gregori bereþ wittenesse

well auȝten ȝe lordis þat lawis kepen ; þis lesson haue in mynde

And on tr{o}aianus truþe to þenke ; & do truþe to þe peple

lawe with-ouȝtyn loue quod tr{o}aianus ; ley þer a bene

Or ony science vndir sonne ; þe Seuene artis and all

But þei be lerned ffor oure lord{e}ys loue ; lost is all þe tymeC

For no cause to cacche siluere ; þerbi ; ne to be callid a mayster

But all ffor þe loue of oure lord ; & þe bette to loue þe peple

For Seynt Iohan saide it ; & soþe arn his wordis

Qui non diligit manet

who-so loueþ not leue me ; he l{e}yueþ in deþ deynge

and þat alle manere men ; enemyes and ffrendis

loue here eiþer oþer ; & lene hem as hem-seluen

who-so leneþ not loueþ not ; god wott þe soþe

and commaundede P iche creature ; to confforme hym to loue

and souereynli pore peple ; & her enemyes after

For hem þat haten vs ; is oure merite to loue

and pore peple to plese ; her preyris mown us helpe

For oure Ioy & oure hele ; Ihesu crist of heuene

In a pore mannys aparaile ; pursueþ us euere

and lokeþ on vs in here likenesse ; and þat with loueli chere

To knowe us b{e}y oure kynde herte ; & castinge of oure eye

wheþer we louen þe lordis heere ; be-ffor oure lord of bl{e}ysse

and exciteþ vs b{e}y þe euangelie ; þat whanne we maken ffestis

we shulde not calle oure kyn þer-to ; ne no kyn riche

Cum facitis conuiuia

and Callyþ þe careffull þer-to ; þe croked & þe pore

For ȝoure ffrendis wolle ffede ȝou ; & ffonde ȝou to quyte

Ȝoure ffestinge and ȝoure ffaire ȝiftis ; iche ffrende quyteþ so oþer

and ffor þe pore I shall pay ; & pure well quyte here trauaile

þat ȝeueþ hem mete or mony ; & loueþ hem ffor my sake

For þe beste ben summe riche ; & summe beggers & pore

For alle ar we cristis creaturis ; & of his coferis riche

and breþeren as of blood ; as beggers and erlis

For on caluerie of cristis blood ; cristendom gan springe

and blody breþeren we be-come ; þer of o body wonne

as quasi modo geniti ; & gentell men ichone

Ne begger ne boye amonge us ; but if it synne made

Qui facit peccatum seruus est peccati

In þe olde lawe ; as holi lettre telliþ

Mennys sonnes ; men callid us ichon

Of adamys issu & eue ; ay till god-man deied

and after his resureccioun ; redemptor was his name

and we his breþeren þoruȝ him bouȝte ; boþe riche & pore

and ffor-þi / l{e}oue we ; as leue breþeren shuld . & iche man lauȝhe on oþer

For if þat iche man may fforbere ; amende þer it nedeþ

and euery man helpe oþer ffor hens shull we alle

Alter alterius onera porter & cetera

and be we not vnkynde of oure catell ; ne of oure kunnynge neiþer

For not no man how it is ; to be ynome ffro boþe

For-þi / lakke no lyff oþer ; þouȝ he more latyn knowe

Ne vndirnyme not ffoule ; ffor is non with-outyn deffauȝte

For what-euere clerkis carpyn ; of cristendom or ellis

Crist a comune womman saide ; in comune at a ffeste

þat ffides sua shulde sauen hir ; & saluen hir of synnes

þanne is bileue a {.}lele helpe ; aboue logyk or lawe

Of logyk ne of lawe ; in legenda sanctorum

Is lytill alowaunce P made ; but if bileue hem helpe

For it is ouerlonge er logyk ; ony lessoun assoyle

And lawe is loþe to loue ; but if he lacche syluere

But logyk and lawe ; þat louen not to lye

I counceyll alle cristen men ; cleue not þer-on to sore

For summe wordis I ffynde wretten ; þat were of ffeiþes techinge

þat saued synffull man ; as seint Iohan beriþ wittenesse

Eadem mensura qua mensi ffueritis ; remecietur vobis

For-þi lerne we þe lawe of loue ; as oure lord tauȝte

and as seint gregory said ; ffor mennys soule helþe

Melius est scrutari stelera nostra

why I meue þis mater ; is moste ffor þe pore

For in his {k}likenesse oure lord ; ofte haþe ben y-knowe

wittenesse in þe paske weke ; whanne he ȝede to Emaus

Cleophas knewe him not ; þat he crist were

For his pore apparayle ; and pilgrimes wedis

Tyll he blesside & brak þe bred þat þey eten

So be his werkis þey wisten ; þat he was Ihesus

and be cloþing þey knewe him not ; ne be carpinge of tunge

and alle was in ensammple ; to vs synffull here

þat we shulden be lowe ; and loueliche of speche

and apparale us not prouudly ; ffor pilgrimes ar we all

and in þe apparaile of a pore man ; & pilgrimes likenesse

Many tyme god haþe be mett ; amonge nedy peple

þat neuere segge him seiȝ ; in secte of þe riche

Seint Iohan and oþer seintis ; were seyn in pore cloþinge

And as pore pilgrimes ; preyed mennys goodis

Ihesu crist on a Iues douȝter alyȝt ; gentill womman þouȝ sche were

was a pure pore mayde ; and to a pore man weddid

Martha on marie magdalene ; an huge pleynt sche made

and to oure saueoure self ; seide þese wordis

Domine non Est tibi cure quod . soror mea reliquit me solam & cetera

and hasteli god answeryd ; & eyþeris wille ffollwid

Boþe in marthas & in maries ; as matheu bereþ wittenesse

and pouerte god putte beffore ; & preisid it þe better

maria optimam

and alle þe wyse þat euere weren ; bi ought I can aspie

preysen pouerte ffor best lijf ; if pacience it ffollowe

and boþe better and blessidere ; bi many ffollde þanne richesse

and þouȝ it be soure to suffre ; þer comeþ swete after

as a walnote withoutyn ; is a bitter barke

and after þat bitter bark ; be þe schelle aweye

is a kyrnell of comfforte ; kynde to restore

so is after pouerte . or pacience ; pacientliche ytake

For it makeþ man haue mynde in god ; & a grett wille

To wepe & to well bidde ; were-of wexiþ mercy

and well sekerere he slepiþ ; þe man þat is pore

and lesse he drediþ deþ ; and in derk to be robbid

þan he þat is ryȝt riche ; reson bereth wittenesse

Pauper ego ludo ; dum tu diues meditaris

and þouȝ saloman said ; as ffolk seen in þe bible

Diuicias nec paupertate & cetera .

wyser þan saloman was ; beriþ wittenesse & tauȝte

þat parffyȝt pouerte was ; no posession to haue

and lijf most likynge to god ; as luke bereþ wittenesse

Si vis perfectus esse vade et vende & cetera

and is to mene to men ; þat on þis molde l{e}yuen

who-so wolle be pure parffiȝt ; mote possesion fforsake

Or selle it as seiþ þe book ; and þe siluer dele

To beggers þat gon & beggen ; and biddin good ffor godis loue

For ffailede neuer man mete ; þat myȝtfull god serued

Non vidi iustum derelictum nec semen eius querens panem .

as dauiþ in þe sauter ; to swiche þat ben in wille

To serue god goodliche ; ne greueþ him no penaunce P

Nichil inpossibile volenti

Ne lakkiþ neuer lijflode ; lynnen ne wollen

In-quirentes autem dominum non mi

If prestis were parffiȝt ; þei wollde no siluer take

For masses ne ffor matynys ; not her mete of vsureris

Ne neiþer kyrtill ne kote ; þouȝ þei ffor colde shuld deye

and þey her deuer ded as dauid ; seiþ in þe sauȝter

Iudica me deus & deserne causam & cetera spera in deo & cetera .

spekeþ of prestis ; þat han no spendinge syluere

þat if þei trauaile truliche ; & triste in god almyȝti

hem shulde lakke no lijflode ; neiþer wollen ne lynnen

and þe title þei take ordre by ; telliþ ȝe ben auaunced

þanne nediþ not ȝou take syluer ; ffor massis þat ȝe syngen

For he þat toke ȝou ȝoure title ; shulde take ȝou ȝoure wages

Of þe bisshope þat blessiþ ȝou ; if þat ȝe ben worþi

For made neuer kynge no knyȝt ; but he had catell to spende

As be-ffelle ffor a knyȝt ; or ffound him ffor his strenkþe

It is a careffull knyȝt ; & of caytijf kyngis makynge

þat haþe no lond ne l{e}ynage riche ; ne good loos of his handis

þe same I seie ffor-soþe ; bi alle swiche prestis

þat han neiþer kunnynge ne kyn ; but a croun one

And a title a tale of nouȝt ; to his lijflode at myscheff

he haþe more bileue as I leue ; to lacche þoruȝ his croune

Cure . þan ffor kunnynge or knowinge ; ffor clene of beringe

I haue wo{r}ndir and why ; & wherffore þe bisshope

Makeþ swiche prestis ; þat lewde men be-traien

A chartre is chalengable ; biffore a {.....}Cheef Iustice

If ffals latyn be in þat letter ; þe lawe it impugneþ

Or peyntid par-interlynarie ; parcellis ouere-skippid

þe gome þat gloseþ so Charters ; ffor a goky is holdyn

so it is a goky be god ; þat in his gospell ffailiþ

Or in messe or matyns ; makiþ ony deffauȝte

Qui offendit in vno in omnibus est reus

And also in þe sauȝter seiþ ; dauiþ to ouerskippers

Psallite deo nostro psallite ; quoniam rex terre deus israel psallite sapienter

þe bisshop shall be blamed ; be-ffore god as I leue

þat swiche goddis knyȝtis ; þat kunne not sapienter

Synge ne psalme rede ; ne Segge a messe of þe day

and neuer neiþer is blameles ; þe bischope ne þe chapeleyn

For euere eiþer is enditid ; & þat of ignorancia

Non excusat episcopos ; nec ydiotes prestis

þis lokynge of lewde prestis ; haþe don me lepe ffro pouerte

whiche I preise þer pacience is ; more parffiȝt þan richesse

and moche more in metinge þus ; with me gan on dispute

and slepinge I seiȝ al þis ; & siþen cam kynde

and nem{.}pnede me be name ; and bade me nymme heed

and þoruȝ þe wondris of þis world ; witt ffor to take

And on a mounteyn þat mydelerd hiȝte ; as me þo þouȝt

I was ffett fforþe ; be ensaunplis to knowe

þoruȝ iche a creature & kynde ; my creatoure to loue

I seyȝ þe sunne & þe sehe ; & þe sonde after

and where þat briddis and bestis ; bi her make ȝeden

wylde wormes in wodes ; & wondirffull ffoulis

with fflekked ffeþeres ; and of ffeleP colouris

Man had his make ; I myȝte boþe by-holde

pouerte & plente ; boþe pees & werre

Blisse & bale ; boþe I seiȝ at ones

and men token mede ; & mercy reffusid

Reson I seiȝ soþely ; suen alle bestis

In etynge & drinkinge ; & in engendringe of kynde

and after cours of concepcioun ; non toke kepe to oþer

and whanne þey haddyn reden a rotey-tyme ; anon-riȝt þer-after

Males drowen hem to males ; on morwnynge P bi hem-selue

In euenynge P also ; þe males ffro þe ffemelis

þer was kow ne kowkynde ; þat conseyued hade

þat wolde belue after boles bulles ; ne bore after sowe

Boþe hors and houndis ; and all oþer bestis

medeleden not with her makes ; þat with ffole weren

Briddis I be-helde ; þat in buskis made nestis

had neuere wye witte ; to werche þe leste

I had wondir at whom ; and where þe pie lerned

To legge þe stykkisP ; in which he leiþ & bredyþ

þer nys wyȝt as I wene ; shulde werche hir neste to paye

if ony mason made a molde þer-to ; moche wondir it were

and ȝit me merueilid more ; how many oþer briddis

hidden and hileden ; her eyren ffull derne

In mareys & moris ; ffor men shulde hem not ffynde

and hiddyn her eggis ; whanne þei þer-ffro wenten

For ffere of oþer ffoulis ; & ffor wylde bestis

and summe troden here makis ; & on tres bridden

And brouȝten fforþe here bridis so ; al aboue þe ground

and summe briddis at þe bille ; þoruȝ bredinge conceyued

And summe kakeleden I toke keep ; how pekoccis breddyn

Moche merueilid me ; what mayster þey haddyn

And who tauȝte hem on trees ; to tymbre so hie

þer neiþer barn ne beste ; may her briddis reche

and siþen I lokede on þe see ; & so on þe sterris

Many selkouþis I seiȝ ; be not to seie nouþe

I seiȝ fflouris in þe ffriþe ; & her ffaire colouris

and how amonge þe grene gresse ; grew so many hewes

and summe soure & summe swete ; selcouþe me þouȝte

Of her kynde & her coloure ; to carpe it were to longe

and þat moste meved me ; and my mode Chaungid

þat reson rewardyde ; and rewlide alle bestis

saue man and his make ; many tyme and ofte

No reson hem ffolwyd ; & þanne I rebukede

Reson and riȝt to him-selue saide

I haue wonndre of þe quod I ; þat witti art holdyn

why þou ne sueste man & his make ; þat no mysfayte him ffolowe

and reson aratede me ; and said recche þe neuere

why I suffre or not suffre ; þi-selue hast not to done

Amende þou if þou myȝte ; ffor my tyme is to abide

Sufferaunce is souereyne vertu ; & of swift veniaunce P

who suffrede more þan god quod he ; no gome as I leue

He myȝte amende in a menute while ; al þat mystondiþ

and he suffred ffor summe mannys good ; & so is oure better

þe wise and þe witti ; wrotte þus in þe bible

De re que te non molestat noli certare

For be a man ffaire or ffoule ; it ffalleþ not to lakke

þe schappe ne schafte ; þat god schope him-selue

For all þat he dede was well do ; as holi writte wittenessiþ

Et vidit deus cuncta que fecerat et erant valde bona

and bad euery creature ; in his kynde encrece

all to myrþe with man ; þat most wo þoliþ

In ffondinge of þe ffleisshe ; & of þe ffende boþe

For man was made of swiche a mater ; he may not well asterte

That ne sum tyme him betid ; to ffolowe his kynde

Caton acordiþ her-with ; nemo sine crimine viuit

þo cauȝte I coloure anon ; & comsede to be aschamed

and I awakid þer-with ; woo was me þanne

þat I in metels ne myȝte ; more haue I-knowen

þanne said I to my-self ; and chidde þat tyme

Now I wott what do-well ; is quod I . be dere god as me þinkiþ

and as I caste vp myn eyn ; one loked on me & axed

Of me what þing it were ; I-wisse sire I saide .

Go se moche and suffre more ; certis quod I is do-well

haddist þou suffred he said ; slepinge þo þou were

þou shuldest haue yknowe ; þat clergie can . and conceyued more þoruȝ reson

For reson wolde haue rehersid þe ; riȝt as clergie said

and ffor þin entermetinge here ; art þou fforsaken

Philosophus esses si tacuisses

Adam whilis he spake nouȝt ; had paradice at his wille

and whanne he mamelede abouȝte mete ; & entermete him to knowe

þe wisdam of þe witte of god ; he was put ffro bl{e}ysse

and riȝth so fferde reson b{e}y þe ; þou with rude speche

lakkedest & losedest þing ; þat longed not to don

þo had he no likynge ; ffor to lerne þe more

Pride now & presumpsioun ; paraunter wolle þe apele

þat clergie þi companye ; ne kepeþ not to sue

Schal neuere schalenginge ne chidinge ; chastice a man so{n} son{.}e

As schame & schenden him ; & schape him to amende

For late a drunken daff ; in a diche ffalle

latte him ligge loke not on him ; tille him list to rise

For þouȝ reson rebukede him þanne ; it were {.}but pure synne

and whanne nede nymeþ him vp ; ffor douȝte leste he sterue

and schame schrapeþ his cloþis ; & his schyns wassheþ

þanne woteþ þe drunken daff ; whereffore he is to blame

ȝe seggen soþe quod I . iche haue yseyn it {h}ofte

þer smyte no þing so smerte ; ne smelliþ so soure

as schame þer he schewiþ him ; ffor euery man him schonyeþ

why ȝe wissen me þus quod I was ; ffor I rebuked reson

Certis quod he þat is soþe ; and schope him ffor to walke

And I aros vp riȝt with þat ; & ffolwide him after

And preyd him of his curteysie ; to telle me his name