And I wakede þerwith ; witteles nyre-hande

and as a ffreke þat ffre were ; fforþe gan I walke

in manere of a mendynaunte ; many ȝere after

and of þis metinge many tyme ; moche had I þouȝte T

Friste how ffortune me ffailide ; at my moste nede

And how þat elde manacede me ; we myȝte neuere mete

and how þat ffreris ffolloweden ; ffolk þat weren riche

and ffolke þat weren pore ; at litill price þei setten

and no cors in her kyrk-ȝerd ; ne in here kyrk was beried

But quyk he be-queþe hem ought ; or shuld helpe quyte here dettis

And how coueytise ouerecome ; clerkis and prestis

And how þat lewde men ben ledde ; but oure lord hem helpe

þoruȝ vnkynnynge P curatouris ; to in-curable peynes

and how þat ymagynatyf ; in dreme{l}es me tolde

Of kynde & of kunnynge P ; & how curteise he is to bestis

and how louynge he is to bestis ; on lond & on water

leneþ he no lijf ; lasse ne more

þe creatouris þat crepen ; of kynde ben engendrid

and how ymagynatif saide ; vix saluabitur Iustus

and whanne he had saide so ; how sodeyneliche he passide

I lay doun long in þis þouȝt ; and at þe last I slepte

and as crist wolde þer come conscience ; to comforte me þat tyme

and bad come to his courte ; with clergie shulde I dyne

And ffor conscience of clergie spake ; I Come well þe raþer

and þer I seiȝ a mayster ; what man he was I nyste

þat lowe lowted ; and loueliche to scripture

Conscience knewe him well ; and welcomede him ffayre

þey wassheden and wypeden ; & wente to dyner

and pacience in þe paleys ; stede in pilgrimes cloþis

and preyed mete por charite ; ffor a pore hermyte

Concience callide him Inne ; and curteysliche saide

welcome wie go & wasshe ; þou shalt sitte sone

þis maister was made sitte ; & ffor þe moste worþi

þanne clergie and conscience ; & pacience cam after

Pacience and I ; weren put to be macchis

and sitte be oure-selue ; at a side borde

Conscience callide after mete ; & þanne cam scripture

and serued hem þus sone ; of sondri metis many

Of austyn of ambrose ; of alle þe ffoure euangelistis

Edentes et bibentes que apud eos sunt

and þis mayster ne his man ; no manere fflessh eten

and þei eten mete of more coste ; mortrewes & potages

Of þat men myswonnen ; þei maden hem well at ese

and her sauce was euere soure ; & vnsauery y-groundyn

In a mortir post mortem ; of many bitter peynes

But if þei synge ffor þe soulis ; & wepte salte teris

Vos qui peccata hountunT comeditis nisi pro eis lacrimas & oraciones effuderitis

ea que in delicijs comeditis in tormentis euometis

Conscience curteisliche þo ; comaunded{ist} P scripture

By-ffore pacience bred to bringe ; & me þat was his make

he sette a soure loof to-ffore vs ; & saide agite penitenciam

and syþen he droewe us drynk P ; diu perseuerans

as longe quod he as I l{e}yue ; and likam may dure

here is propre seruyse quod pacience ; þer ffareþ no prince better

and þanne he brouȝte fforþe oþer mete ; of miserre mei deus

and of beat quorum ; of beatus vir makynge

Et quorum tecta sunt ; peccata in a dische

Of derne schrifte dixi ; and confitebor tibi

Brynge pacience sum petaunce ; quod conscience

and þanne come to pacience ; a petaunce brouȝt

Of pro hac orabit ad te omnis sanctus in tempore oportuno

and conscience comfortide us ; & carpid us merie wordis

Cor contritum & humiliatum deus non despicies

pacience was proud ; of þat propre seruyse

and made him myrþe with his mete : & I mornyd euere

For þis doctoure on þe hie deis ; drank wyn so ffaste

Ve vobis qui potentes estis ad bibendum vinum

He ete many sundri metis ; mortrewis & puddinges

wombe clouutes & wilde brawin ; & eggis ffried with grece

þanne saide I to my-self ; so pacience it herde

It is not ffoure daies þat þis ffreik ; be-ffor þe deen of poulis

Prechede of penaunces ; þat poule þe apostle suffred

In ffame & frigore ; & fflappis of schorgis

Ter cesus sum & a iudeis quinquies quatragenas

And o word þei ouere-hippen ; at iche tyme þat þei prechen

þat poule in his pistle ; to þe peple tolde

Periculum est in ffalsis fratribus nota

holi writt bidiþ men be war ; I wole not write it here

On Englisshe an auntere it shulde ; be rehercid to ofte

and greue þer-with þat good ben ; & gramariens shull rede

Vnusquisque a fratre se CustodiatT quia vt dicitur periculum est in ffalsis fratribus

and I wiste neuer ffreik ; þat as a ffrere ȝede . be-ffor men on Englisshe

Take it ffor her tyme ; & telle it with-oute glosinge

þei prechen þat pennaunce P is ; profitable to þe soule

&P What mescheff or malese ; crist ffor man þolede

and þis goddis gloton ; quod I ; with his grette chekis

haþe no pete on vs pore men ; he parfornmeþ yuell

þat he precheþ he preueþ not ; to pacience I tolde

and wisshede wittirly ; with wille ffulle egre

þat disshes and doubleris ; be-ffor þis ilke doctoure

were molton leed in his mawe ; & mahon amyddis

I shall Iangle to þis Iurdon ; with his Iutte wombe

To telle men what penaunce P is ; of whiche he preched raþer

Pacience parceyued what I þouȝt ; & wynkid on me to be stille

And saide . þou shalt se þus sone ; whanne he may no more

he shall haue a penaunce P in his paunche ; & puffe at iche a word

and þanne shalle hise guttis groþele ; & he shall galpen after

For now he haþe drunken so depe ; he wolle dyuyne sone

and preue it be her pocalipis ; & passion of seint auereys

þat neiþer bakon ne brawn ; blankmanger ne mortrewes

Is neiþer ffisshe ne ffleishe ; but ffode ffor a penaunte

and þanne shall he testifie . of a trinite ; & take his ffelawes to wittenesse

what he ffonde in a ffrayll ; after ffreris leuynge P

and but if þe ffrst leef be lesinge ; leue me neuer afterC

and þanne is tyme to talke ; & appose þis doctoure

Of do-well . & do-bette . & if do-best ; be ony pennaunte

and I satte stille as pacience saide ; & þus sone þis doctoure

as rody as a rose ; rubbede his chekis

Cowede and carpede ; & concience him herde

And tolde him of a trinite ; & towarde us he lokede

what is do-well ; sir doctour quod I ; is do-well ony penaunte

Do-well quod þis doctour ; and toke þe cupe & drank P

Do non yuel to þin euen-cristen ; not be þi powere

By þis sir doctour quod I þanne ; be ȝe not in do-well

For ȝe harmed us two ; in þat ȝe ete þe puddinge

Mortrewis & oþer mete ; & we no mussell {..}hadden

and if ȝe ffaren so in ȝoure ffermorie ; fferli me þinkiþ

But cheste þer charite shulde be ; and sh{u}yldrin dursten pleyn

I wolde permitte my penaunte P with ȝoure ; ffor I am in poynt to do well

þanne concience curteisliche ; a contenaunce P made

and preynte vppon pacience ; to preye me be stille

and saide him-selue sire doctour ; & it be ȝoure wille

what is do-well & do-bette ; ȝe dyuynouris knowen

Do-well quod þis doctour ; do as clerkis techen

and do-bett is he þat techeþ ; & trauailiþ to teche {þ}oþer

and do-beste doþe him-self so ; as he seiþ & precheþ

Qui ffecerit et docuerit magnus vocabitur in regus celorum

Now þou clergie ; quod concience . carpeste what is do-well

I haue seuene sonnes he said ; seruen at a castell

þer þe lord of lyf wonneþ ; to lerne what is do-well

Tyll I se þo seuene ; & my-self acordyn

I am vnhardy quod he ; to ony wyȝte to preue it

For on peers þe plowman ; haþe impugned vs alle

and sette alle science at a soppe ; saue loue one

and no tixte ne takiþ ; to meynteyne his cause

But dilige deum ; & domine quis habitabit & cetera

And seiþ do-well . & do-bette ; ar two inffinitis

whiche in-ffenites with a ffeiþ ; ffyndyn out do-best

whiche shall saue manys soule ; þus seiþ peers plowman

I can not here-on quod concience ; & I knowe peers

he wolle not aȝeine holi writte speke ; I dare vnder-take

þanne passe we ouere tyll peers Come ; & preue þis in dede

pacience haþe ben in many placis ; & parauuenture knoweþ

That no clerk knoweþ ; as crist bereþ wittenesse

Pacientes vincunt

At ȝoure preire quod paciens þo ; so no man displese him

Disce quod he & doce ; & dilige inimicos

Disce and do well ; doce and do bette

a lemman þat I loued ; loue was hir name

with wordis and werkis quod sche ; & wille of þin herte

þou loue lelli þi soule ; all þi lijf-tyme

and so þou lerne þe to loue ; ffor þe lordis loue of heuene

þin enemye in all wyse ; euene-fforþe with þi-selue

Caste colis on his heed ; & all kynde speche

Boþe with werk & word ; ffonde his loue to wynne

And leye on him þus with loue ; till he lawȝhe on þee

and but he bowe ffor þis betinge ; blynde mote he worþe

And ffor to ffare þus with þi ffrynde ; ffolie it were

For he þat loueþ þe lelli ; litill of þin coueytiþ

kynde loue coueitiþ not ; no catell but speche

with half a laumpe lyne ; in latyn ex vi transgressionis

I bere þer-Inne a bewte ; ffaste y-bounde do-well

In a signe of þe saterday ; þat sett ffrist þe kalendir

In alle þe witte of þe weddenysday ; of þe nexte weke after

þe mydill of þe mone ; is þe myȝt of boþe

And here-with am I welcome ; þer I haue it with me

Vndo it latte þis doctour deme ; if do-well be þer-inne

For be him þat me made ; myȝte neuere pouerte

Missese ne myschell ; ne man with his tunge

Colde ne care ; ne companye of þeues

Ne neiþer hete ne hail ; ne non helle pouke

Ne neiþer ffiere ne fflode ; ne ffere of þin enemyes

Tene þe ony tyme ; & þou take it with þe

Caritas nichil timet

It is but a dido quod þis doctour ; a disouris tale

all þe witt of þis world ; and with mennys strengþe

Can not conformen a pees ; bitwynne þe pope & his enemyes

Ne bytwynne two cristen kyngis ; kan no wyȝt pees make

Proffitable to eiþer peple ; & put þe table ffro him

And toke clergie & conscience ; to conceill as it were

þat pacience þo muste passe ; ffor pilgrimes kun well lie

and concience carped loude P ; and curteysliche said

Frendes ffareþ well ; & ffaire spake to clergie

For I wolle go with þis gom ; if god wolle gyue me grace

and be pilgrime with pacience ; till I haue proued more

what quod clergie to concience ; & {..}ȝe coueytous nouþe

after ȝerisȝeues and ȝiftis ; or ȝernen to rede redels

I shall bring ȝou a bible ; a book of þe olde lawe

and lere ȝou if ȝou like ; þe best poynt to knowe

þat pacience þe pilgrime ; parffiȝtly knewe neuere

Nay by crist quod concience ; to clergie god þe ffor-ȝelde

For all þat pacience me profreþ ; proud am I ffull litill

and þe wille of þe wie ; and ȝe wull of ffolk here

haþe moued my mod ; to morne ffor my synnes

þe good wille of þe wiȝt was ; neuer bouȝt to þe ffull

For þer is no tresore þer-to ; to a trewe wille

had not magdaleyn more ; ffor a box of salue

þanne zacheus ffor he saide dimidium bonorum meorum do pauperibus

and þe pore wedowe ; ffor a peire of myȝtis

þanne alle þo þat offreden ; in-to gazophilacium

þus curteisliche concience ; congeyed þe ffrere

and siþen softeliche he said ; in clergies ere

Me were leuere be oure lord ; and I leue shulde

haue pacience parffiȝtli ; þan half þi bak of bokis

Clergie to concience ; no congie wolde take

But said ffull soburliche ; þou shalt se þe tyme

whanne þou art wery ffor-walked ; wilne me to conceill

þat is soþe quod concience ; so me god helpe

if pacience be oure partinge ffelawe ; & preuy with us boþe

þer is no wo in þis world ; þat we ne shulde amende

and conformen kyng to pees ; & all-kyns londis

Sarasens & surri ; so fforþ all þe Iues

Turne in-to þe true ffeiþ ; and in-till on bileue

þat is soþe quod clergie ; I se what þou menest

I shall dwelle as I do ; my deuyr to schewe

and Confermen ffauntkyns ; and oþer ffolk ylered

Tyll pacience haue serued þe ; & parffiȝt þe made

Concience þo with pacience passid ; pilgrimes as it were

þanne had pacience as pilgrimes han ; in his poke vetailis

Sobrete & symple speche ; & soþeffaste bileue

To comfforte him in concience ; if þei comen in place

þer vnkyndenesse & coueytise is ; hungry contres boþe

and as þey wenten be þe wey ; of do-well þe carpenden

þey metten with a mynstrall ; as me þo þouȝt

pacience aposede him þo ; & preyed he shuld him telle

To concience what craft he couude ; and to what contre he wolde

I am a mynstrall quod þat man ; my name is actiua vita

and alle ydell I hate ; ffor actijf is my name

a waferere wolle ȝe witte ; & serue many lordis

and ffewe robis I ffonge ; or ffurred gounes

kouþe I lye to do men lawȝe ; þanne lacchen I shuld

Oþer metell or mony ; amongis lordis mynstrallis

and ffor I can neiþer taboure ne trompe ; ne telle no gestis

Farten ne ffeþelen ; at ffestis ne harpin

Iape ne Iogele ; ne Ientiliche pipe

Ne neiþer saile ne sauȝte ; ne synge with þe gyterne

I haue no good gyftis ; of þese grette lordis

For no bred þat I bringeP fforþ ; saue a beneson on þe sonday

whane þe preste preyeþ þe peple ; her pater noster to bidde

For peers þe plowman ; & þat him profiȝt wayteþ

and þat I am actiif ; þat ydilnesse hateþ

For alle trewe trauelouris ; & tillers of erthe

Fro myhelmesse to myhelmesse ; I ffynde hem waffris

Beggers and bidders ; of my bred crauen

Faytouris and ffreris ; & ffolk with brode crounes

I ffynde payn ffor þe pope & prouendre ffor his palfrey

and I had neuere of him ; haue god my trewþe

Neiþer prouendre ne parsonage ȝit ; of þe popis ȝifte

Saue a pardon with peise of leed ; & two pollis amydis

had iche a clerk þat couþe wriȝte ; I wolde caste him a bille

þat he sente me vndir his seel ; a salue ffor þe pestelence

and þat blessinge and his bullis ; myȝte bochis distroie

In nomine meo demonia eicient & super egros manus imponent & bene habebunt

and þanne wolde I be prest ; to þe peple . past ffor to make

and buxum and besi ; abouȝte bred and drink P

For him & all his ; ffonde I þat his pardon

Miȝte lechen a man ; as I bileue shulde

For sithe he haþe þe powere ; þat peter him-selue hadde

he haþe þe potte with þe salue ; soþeli as me þinkeþ

Argentum & aurum

And if myȝt of myracle him ffaile ; it is ffor men ben not worþi

To haue þe grace of god ; & no gilte of þe pope

For may no blessinge don vs bote ; but if we wollen amende

Ne mannys masse make pees ; amongis cristen peple

Till pride be puriliche ffor-do ; & þat þoruȝ peyne deffauȝte

For er I haue breed of mele ; erste mote I swete

And er þe comune haue corn y-now ; many colde mornynge P

So er my waffres be wrouȝt ; moche woo I þole

al london I leue ; likeþ well my wafres

and louryn when þey lakkyn it ; is not long passid

þer was a careffull Comune ; whanne no carte come to toune

with bred ffro stratfford ; þo gonnen beggers wepe

and werkmen were agast a litill ; þis wolle be þouȝt longe

In þe date of oure dryȝte ; in a drieP aprill

A þouusand and thre hundrid ; twyes twenti & ten

My wafres weren gesen ; whanne chichestre was meire

I toke good kepe bi crist ; and concience boþe

of aukyn þe actijf man ; & how he was cloþid

He hade a coke of cristendom ; as holi chirche bileueþ

And it was molede in many places ; with many sondry plottis

Of pride here a plotte & þer a plott ; of vnbuxum speche

Of scornynge & of scoffinge ; & of vn-skylfull beringe

As in aparayle & in porte ; proud amongis þe peple

Oþer-wise þanne {..}he haþe with herte ; or ye schewinge

him wyllynge þat al men wenden ; he were þat he is not

For-why he bostiþ & braggeþ ; with many bolde oþes

And inobedient to be vndirnome ; of ony lyf leuynge

And so synguler bi him-self ; ne non so poppe-holi

In habite as an hermyte ; an ordre by him-selue

Religion saunz rule ; and resounable obedience

lakkinge lettride men ; & lewde men boþe

In likenynge of lele lijf ; and a liere in soule

with in-witte & wiþ out-witte ; ymagynen & studien

as best ffor his body be ; to haue a badde name

and entermete him ouere all ; þer he haþe not to don

wylnynge þat men wende ; his witte were þe best

and if he gyue out to pore gomes ; telleþ what he deleþ

Pore of possesion in purs ; and in coffres boþe

and as a leon on to loke ; and lordliche of speche

Baldeste of beggers ; a boster þat nouȝt haþe

In toune and in tauernes ; talis to telle

and segge þinge þat he neuere seiȝ ; & ffor soþe sweren it

Of dedis þat he neuere dede ; demen & bosten

and of werkis þat he well dede ; wittenesse & sege

loo if þou leue me not ; or þat I lie wene

Axeþ at him or at him ; & he ȝou can telle

what I suffred & seiȝ ; & summe tymes hadde

and what I kouþe & knewe ; and what kyn I come of

all he wolde þat men wisten ; of werkis & of wordis

whiche myȝt plese þe peple ; & preysen hem-seluen

Si hominibus placerem christi seruus non essem & alibi nemo potest duobus dominis seruire & cetera .

By crist quod concience þoo ; þi beste cote haukyn

haþe many molis & spottis ; it must ben y-wasshid

ȝee who-so toke heed ; quod haukyn . bi-hynde & be-ffore

what on bakke & on body ; & be þe twey sidis

Men shulden ffynde many ffrounces ; & many ffoule plottis

and he turned him as tite ; & þenne toke I hede

It was ffouler be ffele ffolde ; þanne it ffrist semede

It was be-droppid with wraþe ; & wikkide wille

with envie & yuell wikked speche ; entycinge to ffiȝt

liynge & lawȝhinge ; and leef tunge to chide

all þat he wiste wikked ; be ony wiȝt tellyn it

and blame men bihynde her bak ; and bidde hem myschaunce

and þat he wiste bi wille ; telle it to watte

And þat watte wiste ; wille wiste it after

And made of ffrendis ffoos ; þoruȝ a ffals tunge

Or with myȝte of mouþe ; or þoruȝ mannys strenþe

Auenge me ffele tymes ; ouþer ffrete my-selue

with-Inne as a schepsters schere ; I schrewed men & cursid

Cuius malediccione os plenum

þer is no lyf þat I loue ; lastinge ony while

For talis þat I telle ; no man tristeþ to me

and whane I may not haue þe maistrie ; with malancolie I take

þat I cacche þe crappe ; þe cardiacle summe tyme

Or an ague in swiche an angre ; and summe tyme a ffeuere

That takiþ me al a twelue-moneþ ; till þat I dispice

leche-crafte of oure lorde ; & leue on a wycche

and seggiþ þat no clerk ne can ; ne crist as I leue

To þe Souȝter of Souþwerk ; & of sordiche dame Emme

and seggiþ þat no goodis word ; gaff me neuer bote

But þoruȝ a charme had I Chaunce ; & my chef hele

I wayted besiloker ; & þanne was it suylid

with likinge of leccherie ; and be lokynge of his ye

For yche a maydyn þat he mette ; he made hir a signe

Semynge to synnewarde ; and summe tyme he gan taste

Abouȝte þe mouþe or beneþe ; bigynneþ to grope

Till eiþer wille waxet kene ; and to þe werk ȝeden

as well in ffastinge-daies ; as ffridaies & fforboden nyȝtis

and as well in lente ; as outȝ of lente . al tymes Iliche

Swyche werkis with hem ; were neuere ouȝt of seson .

Tille þey myȝten no more ; & þanne hade meri talis

And how þat leccherous leuen ; lawȝen and Iapen

And of her herlotrie & horedom ; in here elde tellen

þanne pacience parceiued ; of poyntis of his cote

was colmy þoruȝ coueitise ; & vnkynde desiringe

More to good þanne to god ; þe gom his loue caste

and ymaginede how ; he it myȝt haue

with ffalse mesure & met ; & with ffalse wittenesse

Lonede it ffor loue of þe wed ; & loþe to do trueþe

and I awaytide ; þoruȝ wiche weye to bigyle

And mengid his marchaundise ; & made a good mustre

þe wers with-Inne was ; grett witt I lete it

And my neiȝbore had ony hyne ; or ony beste ellis

More prophetable þanne myn ; many sleiȝtis I made

how I myȝte haue it ; al my witt I caste

and but I had be oþer wey ; at þe laste I stale it

Or preuyliche his purs scoke ; vnpikide his lokkis

Or be nyȝt or be day ; abouȝte was I {neuere}

þoruȝ gyle to gaderen ; þe good þat I haue

If I ȝede to þe plow ; I pynched so narwe

þat a ffote lond or a fforuȝ ; fecchyn I wolde

Of my next neibore ; nymen of his erthe

And if I repe ouere-reche ; & ȝaue hem reed þat rope

And seise to me with my sykill ; þat I sewe neuere

And who-so borwiþ of me ; abouȝt þe tyme

with presentis preuyliche ; or payd summe certeyn

So wolde he or he nolde ; wynnen I wolde

And boþe to kyþe & to kyn ; vnkynde of þat I hadde

And who-so chepede of my chaffare ; chiden I wolde

But he propherid me to paye ; a peny or tweyne

More þanne it was worþ ; & ȝit wolde I swere

þat it coste me moche more ; & swore many oþes

In halidaies in holi chirche ; whanne I here messe

hadde I neuere wille wotte god ; wittirli to be{c}seche

Mercy ffor my mysdedis ; þat I ne mornyd more

For losse of good leue me ; þanne ffor my ffoule gyltis

As if I had dedli synne don ; I drede not þat so sore ;

as whanne I lenede . leuede it loste ; or longe or it were paid

So if I kidde ony kendenesse ; myn euen-cristen to helpe

vppon cruell coueytyse ; myn herte gan hang .

And I sente ouere see ; my seruantis to bruggis

Or in-to pruselond my prentice ; my proffiȝt to wa{.}ytyn

To marchaunten with mony ; & make her eschaunges

Miȝte neuere me comfforte ; in þe mene tyme

Neiþer messe ne matyns ; ne no manere siȝtis

Ne neuer penaunce P parfformed ; ne pater noster said

þat my mynde ne was more ; on my good in douȝte

þanne in þe grace of god ; & his grette helpis

vbi thesaurus tuus ibi & cor tuum

whiche ben þe branchis ; þat bringen a man to sluþe

Is whanne a man mornyþ not ffor his dedis ; ne makiþ no sorowe

and penaunce þat þe prest enjoyneþ parfformeþ yuell

Doþe non almes-dede ; drediþ him of no synne

lyueþ aȝeyn þe bileue ; & no lawe holdiþ

Iche day is an haliday ; and an hieȝ fferie

and if he out wolle here ; it is an harlottis tunge

and whanne men carpen of crist ; or clennesse of soule

he waxiþ wroþe and woll not here ; but wordis of myrþe

Penaunce and pore men ; and passion of seyntis

he hatiþ to here þer-of ; and alle þat it telliþ

These ben þe braunchis ; be war ; þat bringen a man to wanope

Ȝe lordis and ladies ; and legatis of holy chirche

þat ffynden ffoles sage ; fflateriris & lieris

and han likynge to lyþen hem ; to do ȝou to lawghe

ve uobis qui ridetis & cetera

and ȝeuen hem mete and mede ; and pore men reffusen

In ȝoure deþ deynge ; I drede me full sore  ;

Lest þe þre manere men ; to moche sorwe ȝou bringe

Consencientes & agentes ; pari pena punientur

Patriarkes & prophetis ; & prechouris of godis wordis

Sauen þoru her sarmon ; mannys soule ffrom helle

Riȝt so fflateriris and foolis ; and þe ffendis disciplis

To entise men þoruȝ her talis ; to synne & harlotrie

as clerkis þat knowyn holi write ; shulden kenne lordis

what dauiþ seiþ of swiche men ; as the sauter telliþC

Non habitabit in medio domus mee qui facit superbiam & qui loquitur iniqua

shulde non harlot haue audience ; in halle ne in chambris

þer wyse men weren ; wittenesse godis wordis

Ne non mysproude man ; amongis lordis be alowed

And fflaterris and ffolis ; þoruȝ her ffoule wordis

leden þo þat louen hem ; to luciffers ffestis

with turpiloquio a layP of sorouȝ ; and luciffers ffeþele

þus haukyn þe actijf man ; had ysueuled soyled his cote

Tyll concience acoupede him þer-of ; in a curteys manere

why he ne hadde wasshen it ; or wipid with a brusshe