I haue but an hool hool hater quod haukyn ; I am þe lesse to blame

þouȝ it be suyledsoyled & ffoule ; I slepe þer-inne on nyȝtis

And also I haue a wyff ; huen and childrin

vxorem duxi & ideo non possum

þat wolden be-molen it many tyme ; mawgri my clekis

It haþe be laued in lenten ; and out of lenten boþe

with þe sope of sekenesse ; þat sekeþ wondir dede

and with þe losse of catell ; loþe ffor to agylte

God or ony good man ; bi out þat I wiste

and was schreven of þe preste ; þat gaffe me ffor my synnes

To penaunce pacience ; and pore men to ffede

al ffor coueitise of my cristendom ; in clennesse to kepe

and kouþe I neuere be crist ; kepe it clene an oure

þat I ne suylede soyled it with siȝt ; or summe yuell speche

Or þoruȝ werk or word ; or wille of myn herte

But I ne ffloboure it ffoule ; ffro morwyn till euen

and I shall kenne þe quod conscience ; of contricion to make

Cordis contricio & cetera.

þat shall clawe þi cote ; of all-kyns synnes .

Do-well shall wasshen it ; and wringin it þoruȝ a wise conffessour

Oris conffessio & cetera

Do-bette shall beten it & boukyn it ; as briȝt as ony scharlet

And engreyn it with good wille ; and godis grace to amende þe

and siþen sende þe satisfaccion ; ffor to sewe after

Satisfaccio & cetera

Do-best shall neuere myst be-molen it ; ne moþþe after bite it

Ne ffende ne ffals man ; deffouȝlen it in þi lyue

schall non heraud ne harpoure ; haue a ffairere garnement

Thanne haukyn þe actijf man ; and þou do be my techinge

Ne no mynystrall be more worþe ; amongis pore and riche

þanne haukyns wyff ; þe wafferere ; with his actiua vita

And I shall purueie þe past quod pacience ; þouȝ no plow erie

and ffloure to ffede ffolk with ; as best be ffor þi soule

þouȝ neuere greyn growed ; ne grape vp-on vyne

alle þat leuen and loken ; lijflode wolde I ffynde

and þat I-now shal non ffaile ; o þing þat hem nedeþ

we shulden not be to besi ; abouȝten oure lijflode

Ne solliciti sitis & cetera volucres celi deus pascit & cetera Pacientes vincunt & cetera

þanne lowȝ haukyn a litill ; and liȝtli gan swere

who-so loueþ ȝou be oure lord ; I leue not he be blessid

No quod pacience paciently ; and out of his poke hent

vetailis of grett vertues ; ffor alle manere bestis

and said lo here liiflode ynow ; if oure bileue be trewe

For lent neuere was lyff ; but liiflode were schapen

wher-of or where-ffore ; and where-bi to leue

Frist þe wylde worme ; vndir whete erthe

Fisshe to lyue in þe fflode ; and in þe ffiere þe criket

þe curlu be kynde of þe eyre ; most clenneste ffleishe of briddis

and bestis be gresse & greyne ; and be grene rotus

In menynge þat all men ; myȝten do þe same

leue þoruȝ lele bileue ; and loue as god wittenessiþ

Quodcumque pecieritis a patre in nomine meo et cetera . non in solo pane viuit homo set in omni verbo qui procedit de ore dei

but I loked what liiflode it was ; þat pacience so presid P

and {.}þanne was it a pece of þe pater noster ; fiat voluntas tua

haue haukyn quod pacience ; and ete þis whane þe hungriþ

Or whanne þou clomseste ffor cold ; or chillist ffor drie

shulde neuere gomes þe greue ; ne grett lordis wraþe

prison ne peyne ; ffor pacience vincunt

be so þat þou be sobre ; of siȝt and of tunge

In etinge and in handelinge ; and all þi ffyue wittis

þarst þou neuere care ffor corn ; ne lynnen cloþe ne wollen

Ne ffor drink P ne deþ drede ; but deye as god likiþ

Or þoruȝ hungre or þoruȝ hete ; at his wille be it

For if þou leuest after his lore ; þe scorter lyf þe better

Si quis amat christum mundum non diligit istum

For þoruȝ his breþ bestis wexen ; and abrode ȝeden

Dixit & facta sunt

Ergo þoruȝ his breþe ; mown men & bestis leue

as holi writte wittenessiþ ; whan men songon in her gracis

Aperis tu manum tuam & imples omne animal benediccione

It is ffounden þat ffourti wynter ; ffolk leueden with-out tyllynge

and out of þe fflynte spronge þe ffloode ; þat ffolk and bestis dronken

and in elies tyme ; heuene was y-closede

þat no reyn ne roon ; þus reden men in bokis

þat many wyntris men leueden ; and no mete ne tilieden

Seuene slepten as seiþ þe boke ; Seuene hundrid wynter

and leueden withoutyn loflode ; and at þe last þey woken

and if men leueden as mesure wold ; shulde neuer be deffaute

amongis cristen creaturis ; if cristis wordis be trewe

and vnkyndenesse Caristia makeþ ; amongis criisten peple

and ouere plente maakyþ pride ; amonge pore and ri{..}che

and mesure is so moche worþe ; it may not be to dere

For þe {.}Mysscheff & myssc{.}haunce ; amonge men of sodom

wexe þoruȝ plente of payn ; and of pure sluþe

Ociositas & habundancia panis ; peccatum turpissimum incrituitT

For þey mesurid not hem-self ; of þat þei eten & drunkyn P

Dedyn deedli synne ; þat þe dyuel liked

So veniaunce P ffelle vpon hem ; ffor her vile synnes

þei sunken in-to helle ; þe citees ichon

For-þi mesure wy vs well ; and make oure ffeiþ oure scheltrom

and þoruȝ ffeiþ comeþ contricion ; concience wot it well

whiche dryueþ away dedly synne ; and doþe it to be venyall

and þouȝ a man myȝte not speke ; contricion myȝte him saue

and bringe his soule to blisse ; so þat ffeiþ here wittenesse

þat whiles he leuede he beleuede ; þe lore of holi chirche

Ergo contricion ffeiþ and concience ; is kyndeli do-well

and Surgien ffor dedli synnes ; whan schrefte of mouþe ffailide

And schrifte of mouþe more worthy is ; if man be ilich contrite

For schrefte of mouþe sleþe synne ; be it neuere so dedly

per conffessionem to a prest ; peccata occiduntur

þer contricion dooþ . but dryueþ it doun ; in-to a venyall synne

and dauiþ seiþ in þe sauȝter ; & quorum tecta sunt peccata

and satisfaccion sekeþ out þe rote ; boþe sleeþ & voidiþ

and as it neuere hadde be to nouȝt ; bryngeþ dedly synne

þat it is neuere efte sene ne sore ; but semeþ a wounde heled

where woneþ charite ; quod haukyn ; I wiste neuere in my lyff

Man þat with him spake ; as wyde as I haue passid

þer parffiȝt trueþe and pore herte is ; & þanne pacience of tunge

þer is charite þe cheff chamberere ; ffor god him-selue

wheþer pacience pouerte quod haukyn ; be more plesaunte to oure saueoure

þanne richesse riȝtffulli wonnen ; and resonabliche spendid

Ȝe quis est ille quod pacience ; quik laudabimus eum

þouȝ men reddyn of richesse ; riȝt to þe worldis ende

I wiste neuere renke þat riche was ; þat whanne he rekene shulde

whanne he drowȝ to his deþ-day ; þat he ne drede him sore

and þat at þe rekenynge P in arerage ffell ; raþer þanne out of dette

þer þe pore dar plede ; and preue be pure reson

To haue aloauȝce of his lord ; be þe lawe he it cleymeþ

Ioye þat neuer Ioy hadde ; of riȝtffull Iuge he axeþ

and seiþ lo briddis and bestis ; þat no blisse ne kouþe

and wilde wormes in wodis ; þoruȝ wyntres þou hem greuest

and makist hem wel-ny meke ; & mylde ffor deffaute

and after þou sendest hem somer ; þat is her souereyne Ioie

and blesse to alle þat ben ; boþe wilde and tame

þanne may beggers & breddis ; after bote waytyn

þat alle her lijf han lyued ; in langour and in deffauȝte

But god sente hem summe tyme ; summe manere Ioie

Oþer here or ellis-where ; kynde ; wolde it neuere

For to {.}ouere-moche woo ; was he wrouȝt . þat neuer was ioie schaped

aungellis þat in helle now ben ; haden ioie summe tyme

And dyues in deyntes lyuede ; and in douce vie

Riȝt so reson scheweþ ; þat þo men þat weren riche

and her makes also ; leued here lyff in myrþe

and god is of a wondir wille ; bi þat kynde witt schewiþ

C To ȝeue many men his mercymonye ; er he it haue deserued

Riȝt so ffareþ god be summe riche ; ruþe me it þinkiþ

For þei han her hyre here ; and heuene as it were

and eke grett likynge to lyue ; with-out labour of body

And whane he deyeþ be disalowed ; as dauid seiþ in þe sauter

Dormierunt & nichil

And in anoþer stede also velut sompnium surgencium domine in ciuitate tua ad nichil nichil in redigez

Allas þat richesse shall reue ; & robbe manys soule

From þe loue of oure lord ; at his laste ende

huen þat han here hyre affore ; arn euere-more redy

and seldom dieþ he out of dette ; þat dyneþ er he deserue it

And till he haue don hir deuyr ; and his daies Iorne

For whanne a werkeman haþe wrouȝt ; þenne mown men se þe soþe

what he were worþi ffor his werk ; & what he haþe deserued

and not to ffonge be-ffore ; ffor drede of disalowinge

so I say be ȝou riche ; it semeþ not þat ȝe shull

haue heuene in ȝoure here byinge ; & heuene hereafter

Riȝt as a seruant takiþ his salerie ; be-ffore . & siþe wolde cleyme more

as he þat non hadde ; and haþe hyre at þe laste

It may not be ȝe riche men ; or mathew on god lieþ

De delicijs ad delicias difficile est transire

and if ȝe riche men haue ruþe ; and rewarde well þe pore

and leuen as lawe techeþ ; don lewte to hem all

Crist of his curteise shall ; comfforte ȝou at þe laste

and rewarde alle double richesse ; þat rewffull hertis haddyn

And as an hyne hade ; his hire er he bigunne

and whane he haþe don hi{.}s deuer well ; men don him oþer bounte

Ȝeuen him a cote abouen his couenauntP ; riȝt so crist ȝeueþ heuene

boþe to riche & to not riche ; þat rueffulliche lyuen

And all þat don her deuer well ; haue double hyre ffor here trauaile

her fforȝeuenesse of her synnes ; and heuene blisse after

and it nys but seldom seen ; as bi holi seintis lyues

þat god rewardid double reste ; to ony riche gome

For moche myrthe is amonge riche ; as in mete and cloþinge

and moche myrþe in may is ; amonge wilde bestis

and so fforþe while somer lastiþ ; her solace duriþ

and beggers abouȝte mydsomer ; bredles þei soupen

and ȝit is wynter ffor hem wers ; ffor weete-schode þei gangin

Aþreste sore & affyngrid ; and ffouliche rebuked

and arated of riche ; þat ruþe is to here

Now lord sende hem somer ; and summe Ioie

heuene after her hens goynge ; þat here han swiche deffaute

For alle myȝtist þou haue made ; non menere þan oþer

and ylike witti and wise ; if þi wille hade likid

and haue ruþe of þese riche men ; þat rewardyn not þi presouneris

of þe good þat þou hem gyueste ; vnkynde ben many

and god of þi goodenesse ; gyue us grace to amende

For may no derþe hem dere ; drie ne weete

Ne neiþer hete ne hayle ; haue þey here hele

Of þat þei welnen and wolden ; wanteþ hem not here

and pore peple þi presouneris ; lord in þi pete of myscheff

Comforte þo creaturis ; þat moche care suffrin

þoruȝ derþe and drouþe ; alle here daies here

woo in wynter tymes ; ffor wantinge of cloþis

and in somer-tyme seldom ; soupen to þe ffull

Comfforte þi careffull ; crist in þi riche

For how þou comfortist alle creaturis ; clerkis beren wittenesse

Conuertemini

þus in genere of gentrice ; Ihesu crist saide

To robbers and to reuers ; to riche and to pore

þou tauȝtiste hem in þe trinite ; to take baptisme

and be clene þoruȝ þat cristynynge ; of alle-kyns synnes

and us ffelle þoruȝ ffo{r}ly ; to ffalle in synne after

Confession & knowlechinge ; and crauynge P þi mercy

shulde amende us as many siþes ; as man wolde desire

And if þe pope wolld plede here-aȝeyn ; and punyshe vs in concience

he shulde take þe aquytaunce P as quik ; & to þe quede schewe it

pateat & cetera

and putten of þe pouke ; and preuen vs vnder borwe

And þe parchemynt of þis patent ; of pouerte be muste

And of pure pacience ; and parffiȝt bileue

Of pompe and of pride ; þe parchemyn decorreþ

and principali of alle peple ; but þei be pore of herte

Ellis is all on ydell ; all þat euere we written

Pater noster and penaunce ; & pilgrimage to rome

But oure spences & spen{..}dynge ; springe of a trew wille

Ellis is all oure laboure lost ; lo how men writtyn

In ffenestris at þe ffreris ; if ffalse be þe ffoundement

For-þi cristen shulde in Comune riche ; non coueyte ffor hym-selue

For seuene synnes þer ben ; assaylyn þe euere

þe ffende ffollowiþ hem alle ; and ffondiþ hem to helpe

and with richesse þat ribaudie ; raþeste men bigyliþ

For þer þat richesse regneþ ; reuerence ffolowiþ

and þat is plesaunt to pride ; in pore and in riche

And þe riche is reuerencid ; be reson of his richesse

Þer þe pore is put him by-hynde ; & paraunter can more

Of witt & of wisdam ; þat ffer away is better

þanne richesse or riallte ; & {þ}raþer herd in heuene

For þe riche haþe moche to rekene ; & riȝt softe walkyþ

þe wey to heuene-ward ; often richesse letteþ

Ita possibile diuiti et cetera  .

þer þe pore preseþ bifforn þe riche ; with a pak at his rigge

Opera enim illorum sequunturT illos & cetera

Batauntliche as beggers don ; and boldeliche he craueþ

For his pouerte and pacience ; a perppetuall blisse

Beati pauperes quoniam ipsorum est regnum celorum

and pride in richesse regneþ ; raþer þanne in pouerte

arst in þe maister þanne in þe man ; sum mansion he haþe

And in pouerte þer pacience is ; pride haþe no myȝte

Ne non of þe seuene synnes ; sitte ne mown þer long

Ne haue powere in pouerte ; if pacience it ffollowe

For þe pore is ay preste ; to plese þe riche

and buxum at his biddinge ; ffor his brokyn loues

And buxumnesse and bost ; are euere-more at werre

And ayþer hatheþ oþer ; in all manere werkis

If wraþe wrastill with þe pore ; he haþe {h}þe wers ende

For if þey boþe pleyne ; þe pore is but ffeble

And if he chide or chatre ; him cheueþ þe wers

and if coueytyse cacche þe pore ; þey mown not come to-gedris

and be þe nekke namely ; here non may hente oþer

For men knowyn þat coueytise ; is of a kene wille

and haþe honndis and armes ; of a longe lengþe

And pouerte is but petitt þinge P ; appereþ not to his nauell

and loueliche layk was neuere ; bitwynne þe long & þe scorte

and þouȝ auarice wolde angre þe pore ; he haþe but litil myȝt

For pouerte haþe but pokis ; to puttyn in his goodis

þer auerice haþe almaries ; & yren-bounden coffres

and whedir be liȝter to breke ; lesse boste it makyþ

A beggers bagge ; þanne an yren-boundyn coffre

leccherie loueþ him not ; ffor he ȝeueþ but litil siluer

Ne doþe him not dyne delicatli ; ne drinke P wyn ofte

A strawe ffor þe stewes ; it stode not I trowe

hadde þei no þinge but pore men ; her housis stoden vnhillid

And þouȝ sleuþe sue pouerte ; & serue not god to paye

Myssheff is his maister ; and makeþ him to þenke

þat god is his gretteste helpe ; & no man ellis

and his seruante he seiþ ; and of his sute boþe

and wheder he be or be not ; he bereþ þe signe of pouerte

And in þat secte oure saueour ; saued all man-kynde

For-þi all pouerte þat pacient is ; may cleymen & asken

After here endinge here ; heuene-riche blisse

Mechell hardier may he axen ; þat here myȝte haue his wille

In lond and in lordshepe ; and lackinge of body

and ffor godis loue leueþ all ; and leueþ as a begger

and as a mayde ffor manys loue ; hir modir fforsakiþ

and ffader and all hir ffrendis ; and ffollowiþ hir make

Moche is swiche a mayde to loue ; of him þat swiche on takiþ

More þanne a mayde is ; þat is maried þoruȝ brocage

and bi asent of sundri parties ; & siluere to bote

More ffor coueytyse of good ; þanne kynde loue of boþe

So it ffareþ bi iche a person ; þat possession ffor-sakeþ

and puttiþ him to be paciente ; & pouerte weddiþ

þe whiche is sibbe to god him-self ; and so to his seintis

haue god my trouþe quod haukyn ; ȝe preisyn ffaste pouerte

what is pouerte with pacience ; propirli to mene

Paupertas quod pacience est

I can not construe þis quod haukyn ; ȝe muste seie it on englisshe

In englisshe quod pacience ; it is well hard . well to expoune

and summe-dell I shall seie it ; be so ȝe vndirstonde

pouerte is þe ffriste poynte ; þat pride moste hateþ

þanne is it good be good skylle ; all þat agasteþ pride

Riȝt as contricion is comfortable þinge ; concience it woot well

and a sorow of him-self ; & solace to þe soule

So pouerte propreliche ; penaunce and Ioye

Is to þe body ; pure perpetuall helþe

Ergo paupertas est odibile bonum

and contricion comfforte ; & cura animarum þe secounde

Silde sitte pouerte ; þe soþe to declare

Or as iustice to iugge men ; enioyned is no pore

Ne to be meire aboue men ; ne menystre vndir kyng

Seldom is ony pore put ; to punnysshe ony peple

Remocio curarum

Ergo pouerte and pore men ; parfformen þe comaundementis P

Nolite iudicare quemquam . þe þrede

Seldom is ony pore riche ; but of riȝtfull eritage

wynneþ not with wyȝttis ffalse ; ne vnsellide vnseyled mesuris

Ne borwiþ of his neiboris ; but þat he may well paye

Possessio sine ca

þe fferþe is a ffortune ; þat fflorissheþ þe soule

with sobrite ffrom alle synnes ; & also ȝite more

It affaytiþ þe ffleshe ; ffrom ffolies ffull many

A collaterall . connfort ; cristis owyn ȝiftis

Donum dei

The ffifte is moder of helþe ; a ffrende in all ffondingis

and ffor þe lewde euere a leche ; a lemman of all clennese

Sanitatis mater

The þe sixte is a paþþe of pees ; ȝe þoruȝ þe pace of aulton

Pouerte myȝte passe ; without perell of robbinge

For-þi þer þat pouerte passiþ ; pees ffollwiþ after

And euere þe lesse he bereþ ; þe harder he is of herte

For-þi seiþ seneca ; paupertas est absque solitudine semita

And an hardy man of herte ; amonge an heep of þeues

Cantabit pauper coram latrone viator

The seuenete is welle of wissdom ; and ffewe wordis schewiþ

For lordis alowen him litill ; or listenen to his resoun

He temperiþ þe tunge to trueþewarde ; and no tresore coueitiþ

Sapiencie temperatrix

þe eyte is a lele labour ; and loþe to take more ;

þanne he may well deserue ; in somer or in wynter

And if he schaffare . he chargiþ no losse ; mowe he charite wynne

Negocium sine dampno

þe nynte is swite ffor þe soule ; no sugre swetter

For pacience is payne ; ffor pouerte him-selue

and sobrite swyte drink P ; and good leche in sekenesse

þus lerede me a lettred man ; ffor oure lordis loue

Seynt Augustyn a blessid lijf ; with-out besinesse

PFor body and soule Absque solicitudine ffelicitas

Now god þat al good gyueþ ; graunte his soule reste

þat þus ffrist wrotte to wissen men ; what pouerte was to mene

Allas quod haukyn þe actijf man þoo ; þat after my cristendom

I ne had be deed and doluen ; ffor do-wellis sake

So harde it is quod haukyn ; to leue & to do synne

Synne sueþ us euere ; quod he ; & sori gan waxe

and wepte water with his eyn ; and waylid þe tyme

That euere he deed dede ; þat dere god displesiden

Swowened and sobbyd ; and sekede ffull ofte

{For alle her ky}{nde knowinge ; come but of diuerse siȝtis}

That euere he hadde londe or larde ; lesse oþer more

Or maistrie ouere ony man ; mo þan of him-selue

I were not worthi quod haukyn ; to were ony cloþis

Ne neiþer schirte ne schoune ; saue ffor shame one

To coueren my Careyn quod he ; and criede ffast mercy

And wepte and weylide ; and þer-wiþ I awakyd