Wolleward and wette-schod wente I fforth after

and as a reccheles renke þat of no wo reccheth

and ȝede fforth like a lorell all my lif-tyme

Tille I wex wery of þe world and wilned efte to slepe

and lened me to a lenten and long tyme I slepte

and of cristis passion and penaunce þe peple þat of taughte

reste me þer and rutte ffaste till ramys palmarum

of gerlees and of gloria laus grettely me dremed

and how Ozanna by orgonye olde ffolk songen

on semblable to þe samaritan and sum-dell to petrus plowman

barfott and on an asse bak boteles gan prike

without spores oþer spere inelicheT he loked

as is þe kynde of a knyȝth þat cometh to be doubed

To geten him gilte sporis and gallochis y-couped

Than was ffeith in a ffennestre and cried a fili dauid

as doth an heraud of armes whan aunterous comyn to Iustis

Olde Iewes of Ierusalem ffor yoie þei songen

Benedictus qui venit in nomine domini & cetera

Than I ffreyned at ffeith what all þat ffare be-ment

and who sholde Iuste in Ierusalem Ihesus he saide

and ffecche þat þe ffende cleymeth petrus ffrute þe plowman

is petris in þis place quod I . and he preynte on me

This Ihesu of his gentris woll Iuste in pieris armes

In his helme and in his haubergon humana natura

That crist be not y-knowe here ffor consummatum est

In pieris palcot þe plowman þis priker shall ride

For no dynte shall him dere as in deitate patris

he shall Iuste with Ihesu quod I . Iuwes or scribes

Nay quod he þe ffoule ffende and ffals dom & deth

deth seith he shall ffor-do and doun brynge

al þat leueth or loketh in lond or in water

lyf seith þat he lieth and leythe his lif to wedde

þat ffor all þat deth can do with-inne þre daiez

To walke and ffecche ffro þe ffende pieris ffructe þe plowman

and to legge it þer him liketh and luciffer bynde

and ffor to bete and adoun brynge bale and deth ffor euere

O mors ero mors tua & cetera

Than cam pilatus with peple sedens pro tribunali

To se how douthliche deth shuld do & deme hir brethers rith

The Iewes and þe Iustice aȝeins Ihesus þey were

and all þe court on him cried crucifige scharpe

Tho put him fforth a pilour biffore pilat and saide

This Ihesus of oure Iewes temple Iaped and dispisid

To ffor-don it on a day and in thre daiez after

Edifie it efte newe here he stant þat said it

and ȝet maken it as moche in all manere poyntis

both as long and as large by lofte and by grounde

Crucifige quod a cacchepoll I warante him wicche

Tolle tolle quod anoþer and toke of kene thornys

and bigane P of kene thorne a gerlande to make

and sett it sore on his heed and said in Enuye

Aue rabi quod þat rebauude and þrewe redis at him

nailid him with þre nailis naked on þe rode

and poison on a pole þey puttyn vp to his lippis

and bede him drynk P his deth euell his daiez where don

and if þat þou subtille be helpe now þi-seluen

if þou be crist and kyngis sone come doun of þe rode

þan shull we leue þat liff þe loueth & woll not lete þe deie

Consummatum est quod crist & bigan ffor to swoune

petousliche and pale as a presoner þat deieth

þe lord of lyff and of lyght þo leide his eien to-gedris

The day ffor drede with-drowe and derk bicam þe sonne

þe wall waggid and cleff and al þe world quaued

dede men ffor þat dyn come out of depe graues

and tolde whi þat tempest so longe tyme durid

For a bitter bataile þe dede body saide

lyff and deth in þis derkenesse hir on ffor-doth hir oþer

shall no wyghte witte witterly who shall haue þe maistrie

Er sonday abouȝte sonne risinge and sank with þat to erthe

Summe said þat he was goddis sonne þat so ffaire deied

vere filius dei erat iste & cetera

and sum said he was a wiche good is þat we asaye

wheder he be deed or nouȝt deed / doun er he be takyn

Two þeffes also tholed deth þat tyme

vppon a croisse biside crist so was þe comune lawe

A cacchepoll cam fforth and crakid boþe here leegis

and her armes after of eiþer of þe þeeffes

but was no boy so bolde godis body to touuche

For he was knyth and kyngis sone kynde ffor-ȝaf þat tyme

That non harlot where so hardy to lay hand vppon him

but þer Cam fforth a k{y}nyght with a kene spere y-grounde

hyghte longeus as þe letter tellith & long had lore his syȝte

by-ffore pilate and oþer peple in þe place he houed

magry his many tethe he was made þat tyme

to take þe spere in his honde and Iuste with Ihesus

For alle þey were vnhardy þat houed on hors & stode

To touuchin him or tastin him or takyn him doun of rode

but þis blynde bacheler þan bare him þoru þe herte

þe blode spronge doun be þe spere & vnspeared his eyen

þan ffelle þe knyght vppon his kneys & cried him mercy

aȝeyne my will it was lord to wounde ȝow so sore

he seighed and saide sore it me athenketh

For þe dede þat I haue don I do me in ȝoure grace

haue on me reuthe rythffull Ihesu & right with þat he wepte

þan gan ffeith ffelly þe ffals Iewis dispise

Called hem caytiues acursid ffor euere

For þis ffoule velony vengeaunce to ȝou ffalle

to do þe blynde bete hym ybounde it was a bois conceill

Cursid caytyff knyȝghthode was it neuere

to myssedo a deed body by day or be nyȝth

þe gre ȝett hath he gettyn ffor all his grett wound

For ȝoure Champion Chiualer chief knyght of ȝou all

yelte him recreaunt rennynge right at Ihesus wille

For be þis derkenesse y-do his deth worth avengid

& þe lurdeyns han y-lost ffor lyff shall haue þe maistrie

& ȝoure ffraunchise þat ffre was ffallyn is in-to þraldom

& þe cherlis & ȝoure childrin cheue shull ȝe neuere

ne haue lordschepe in honde ne no lond til{..}ye

but all bareyne be and vserie vsyn

whiche is lyf þat oure lord in alle lawes acursith

now ȝoure good daiez ar don as danyell prophecied

whan crist come here kyngdom & croune shulld cesse

Cum veni{e}at sanctus sanctorum cessabit vnxio vestra

what ffor fferre of þis fferly & of þe ffalse Iewes

I drowe me in þat derkenesse to descendit ad inferna

And þer I sawe sothely secundum scripturas

out of þe west cost a wenche as me thought

Cam walkynge in þe way to helleward sche loked

mercy highte þat maide a meke þinge with-all

a f{..}full benigne burde & buxum of speche

Hir suster as it semed cam sothely walkynge

Euen out of þe est and west-ward sche loked

A ffull comly creature trewthe she highte

For þe vertue þat hir ffolwid afferde was she neuere

whanne these maydenes mette mercy and trewþe

eiþer axed oþer of þis grette wonder

of þe dyn & þe derknesse and how þe day rowed

and wyche a lyght and a leeme lay be-ffor helle

I haue fferli of þis ffare in ffeithe saide trewþe

and am wyndinge to witte what þis wondir meneth

haue no merueile quod mercy myrthe it betokeneth

a maide þat hatte marie and moder without ffelinge

of ony-kynnes creature conseiued þoru speche

And grace of þe holy gost wex grett with childe

Wit-oute wemme of man in-to þis world she brouȝt him

and þat my tale be trewe I take god to wittenesse

sith þis barn was born ben xxx / thritty wynter passid

wyche deyed & deth tholed this day abouȝte mydday

and þat is cause of þis clipse þat closeth now þe sonne

In menynge þat man shall ffro merkenesse be drawe

þe while this lyȝth & þis leeme shall lucyffere ablende

For patriarkis and prophetis han prechen here-of often

þat man shall man saue þoru a maydens helpe

and þat was tynt þoru tre ; tree shall it wynne

and þat deth doun brouth / deth shall releue

That þou tellyst quod trewþe it is but a tale of waltrot

For Adam and eue and Abraham with oþer

Ptriarkys / P[a]triarkys and prophetis þat in peyne liggen

leue þou neuere þat þou lyght alofte shall bringe

ne haue hem out of helle / holde þi tonge mercy

It is but a treffle þat þou telliste I treuþe wotte þe sothe

For þat is onys in helle out cometh he neuere

Iob þe prophete patriarke reproueth þi sawes

Quia in in-fferno nulla est redempcio

Than mercy ffull myldely mowthed þese wordis

Thoru experience quod sche I hope þey shull be saued

For venym ffor-doth venym & þat I preue be reson

For of all venemes ffowlest is þe scorpion

may no medecyne helpe þe place þer he styngyth

till he be deed and do þer-to þe euell he distroieth

þe ffrist venemeth þorugh venem of him-self

so shall þis deth ffor-do I dar my lyff legge

all þat deth dede ffrist þorugh þe deuyllis entisinge

and rith as thorugh gyle man was bigylid

so shal grace þat all bigan make a good ende

Ars ut artem ffalleret

Now suffre we saide trewthe / I se as me thenketh

Out of þe nyppe of þe North . nouȝt ffull ffer hens

Ryghtwysenesse come rennynge . reste we þe while

For he wotte more þan we . he was or we boþe

That is sothe said mercy . and I se here by southe P

where pees cometh pleynge . in pacience clothid

loue hath coueytid hir long . leue I non oþer

but he sent hir sum lettre . what þis lyght bement

þat houer-houeth helle þus . she us shall telle

whan pees in pacience clothed . approched nyȝ hem tweyne

Ryghwyssenese / Righ[t]wisnesse hym reuerencyd . ffor hir riche cloþinge

and preied pees to telle hir . to what place she wolde

and in hir gay garnementis . whom sche grette þouȝte

My will is to wynde quod sche . & wellcome hem alle

That ma{y}ny a day myght I not se . ffor merkenesse of synne

adam and Eue and oþer mo in helle

Moyses and many mo . mercy shull haue

I shall daunce þer-to ; do þou so syster

Ad vesperum demorabitur ffletus et ad matutinum leticia

loue þat is my lemman . swiche lettres me sente

þat mercy my sister & I . mankynde shulde saue

and þat god hath fforȝeuen . & granted me pees & mercy

To be mannys maynpernour . ffor euere-more after

lo here þe patent quod pees . in pace in idipsum

And þat þis dede shall dure . dormiam et requiescam

what rauestow quod rightwisenesse . or þou art riȝth dronke P

leuest þou yonde liȝt . vnlowke myght helle

and saue manys soule . suster wene it neuere

At bygynnynge god ȝaff þe dome him-self

þat adam and Eue . and all þat hem sued

shuld die doun-right . and dwelle in peyne after

ȝif þat þey touuchid a tree . and þe ffructe eten

adam afterwarde . aȝeins his deffense

Freted of þat ffrute . and fforsok as it where

The loue of oure lord . and his lore boþe

and ffollowed þat þe ffende taughte . & his ffellawis wyll

aȝeins reson and rightewynesse . recorde þus with treuthe

þat her peyne be perpetuell . and no preiere hem helpe

For-þi late hem chewe as þey chose . and chyde we not suster

For it is boteles bale . þe bite þat þey eten

and I shall preue quod pees . her peyne mote haue an ende

and wo in-to well mowe wedde . at þe laste

For had þey wuste of no wo . well had þey nouȝt knowen

For no wyght wott what well ys / þat neuere wo suffred

Ne what is hoot hunger . þat had neuere deffauȝte

ȝif no nythe ne were . no man as I leue

sholde witte witterly . what day is to mene

shulde neuer rith riche man . þat leueth in rest ese

witte what wo is . ne were þe deth of kynde

So god þat began all . of his good wille

by-cam man of a mayde . mankynde to saue

and suffred to be sold . to se þe sorowe of dyeynge

the whiche {vnkynttyth} vnknyttith all care . & bigynnynge is of reste

For till modicum mete with us . I may it well avowe

wotte no wyght as I wene . what is ynowȝ to mene

For-thy god of his godnesse . þe ffrist gome adam

sette him in solace . and in souereyne murthe

and sithe suffrid him synne . sorowe to ffele

and witte what well was . kyndeliche knowe it

and after god graunted h{e}ym-self . & toke adamys kynde

To witte what he hath suffrid . in þre sondry places

bothe in heuene and in erthe . and now to helle he thenkyth

To witte what all woo is . þat wotte of all ioye

so it shall ffare be þis ffolk . þat her ffoly & her synne

shall lere hem what langour ys . and lisse with-outyn ende

woote no wight what werre ys . þer þat pees regneth

Ne what is witterly well ; till wellawey him teche

Than was þer a wyght ; with two brode eyne

book hiȝte þat beawpere . a bolde man of speche

by my ffethe quod þis book . I wolle bere wittenesse

þat þo þis barn was born . þer blased a sterre

þat alle þe wise of þis world . in oo witt acordyn

þat swyche a barn was born . in bedlem Cete

and þat mannys soule shuld saue / and synne distroie

and alle þe Elementis quod þe book / here-of bere wittenesse

þat he was god þat all wrouȝth / þe walkyn ffrist schewyn

Tho þat weren in heuene / token stella comata

and tentedyn hire as a torche / to reuerence his burthe

The lyght ffollowid þe lord / in-to þe lowe erthe

That þe water wittenessith / þat he was god . ffor he wente on it

peet{.}er þe apostle parceyued his gate

and as he wente on þe water / well knewe him & said

Iube me venire ad te super aquas /

lo how þe sonne gan louke / hir lygh in hir-self

whan sche seie him suffre / þat sonne & see made

The erthe ffor heuynesse / þat he wolde suffre

quakyd as quyk þinge / & al be-squate þe roche

lo helle myght not holde / but opened þer god þolid

and lete out Simondis sones to seen him hange on rode

and now shall luciffer leue it / þouȝ him loth thynke

For gigas þe geaunt / with a gynne engyned

To breke and to bete adoun / þat ben aȝeins Ihesus

and I book wolle be brente / but Ihesus rise to leue

In alle myghtis of man / and his moder gladen

and comfort all his kyn / and out of care brynge

and all þe Iewen Ioye / vnloken and vnbyndyn

and but þey reuerence his rode / and his resurrexion

and leuen on a newe lawe / be lost lyf and soule

al þis I book wittenesse / and ȝet moche more

Suffre we said trewþe / I here and se boþe

how a sperit spekyth to helle / & bitt vnspere þe yatis

Attollite portas et cetera

A voise loude in þat lyght / to lucyffer crieth

prynces of þis place / vnbyndeth and vnlokketh

For here cometh with croune / þat kyng is of glorie

Than siked sathan / and said to hem alle

swyche a lyȝt aȝeins oure leue / lazar it ffette

Care and comberaunce / is Come to us alle

if þis kynge Come in / mankynde wolle he ffecche

and lede it þer him likyth / and lyghliche us bynden

patriarkis and prophetis / har parled here-of longe

That swiche a lord and lyȝth / shulde lede hem all hens

lysteneth quod lucyffere / ffor I þis lord knowe

bothe þis lord and þis lyȝth / is longe ago I knewe him

May no deth him dere ; ne no deuyllis quentise

and where he wolle is his wey / but whare him of þe perellis

if he reueth me my rith / he robbith me be maistrie

by rith and reson / þo renkis þat ben here

body and soule be myne / boþ good and ille

if adam ete þe appull / all shull die

And dwelle with us deuyllis / þis þretinge he made

and he þat sothenesse ys / said þis wordis

and sithen is seised / "vij" / seuen hundrid wynter

I leue þat þat lawe nyl nouȝt / leten him þe leste

That is sothe said sathan / but I me sore drede

For þou gete him with gyle / and his gardeyne breke

and in semblant of a serpent / sat on þe appilltre

and eggedest him to ete / Eue by hir-self

and toldist hir a tale / of treson were þe wordis

and so þou haddist hem out / and hidir at þe last

It is not trewly getten / þer gile is þe rote

For god wolle not be bigilid / quod gobelyn ne be-Iapyd

we haue no trewe title to hem / ffor þoru treson were þei dampned

Certis I drede me quod þis deuyll / lest treuþe woll hem ffecche

Out of oure poweste / and leden hem hens

Thys xxxti / thritty wynter as I wene / hath he gon and preched

I haue asailid him with synne / and sum tyme asked

where he were god or godis sone / he ȝaf me scorte answere

and þus hath he trollid fforth / this two & wynter

and whan I seigh it was so / slepinge I wente

To warne pilatus wyff / what doynge man was Ihesus

For Iewes hateden him / and han don him to deth

I wolde haue lenged his lif / ffor I leued if he deied

þat his soule wolde suffre / no synne in his sight

For þeP body while it on bones ȝede / abouȝte was euere

To saue men ffrom synne / ȝef hem-self wolde

and now I se where a soule Cometh / hidirwarde sailinge

with glorie and with grett lyghe / god it is I wotte well

I rede we ffle quod he / ffast all hens

For us where better nouȝt be / þan byden his sight

For þi lesingis luciffer / lost is all oure pray

Frist þoru þe we ffellyn / ffro heuene so high

For we leued þi lesyngis / lore we haue adam

and all oure lordschip I leue / a lond and on water

Nunc princeps huius mundi eicieture fforas

Efte þe lygh bad vnlouke / and lucyffer answerid

what lord art þou quod luciffere quis est iste

Rex glorie þe lygh sonne saide

and lord of myȝht & of mayn / and all maner vertues

dominus vertutum

dukis of þis dyme place / anon vndo þese yatis

þat Crist may Come in / þe kyngis sone of heuene

and with þat breth helle brak / with belliall barres

For ony wey or warde / wyde opene þe yatis

patriarkis and prophetis populus in tenebris

Songen seint Iohans songe Ecce agnus dei

luciffer lokene ne myght / so lyght him ablente

and þo þat oure lord loued / in-to his lyght he lauȝte

and said to satan / lo here my soule to amende

For all synffull soulis / to saue þo þat beth worthi

myne þei be & of me / I may þe better hem cleyme

al-þouȝ reson record / and riȝth of my-self

þat if þei ete þe appull / all shuld deie

I be-hiȝte hem nouȝt here / helle ffor euere

For þe dede þat þey dede / þi desceite it made

with gile þou hem gette / aȝein all reson

For in my palayce paradice / in likenesse of an eddere

Falsely þou fettist þer / þinge þat I loued

Thus ylike a lusard / with a lady visage

Theffliche þou me robbedest / þe olde lawe graunteth

That gylours bigilid / and þat is good reson

Dentem pro dente et oculum pro oculo

Ergo soule shal soule quite / and synne to synne wende

and all þat man hath myssedo / I man wolle amende

Membre ffor membre / be þe olde lawe was amendis

and lyf ffor lyf also / and be þat lawe I cleyme it

Adam and alle his issue / at my wille here-after

and þat deth in hem ffor-dede / my deth shall releue

and boþe quike and quite / þat queynt was þoru synne

and þat grace gile distroie / good ffeith it asketh

So leue I nouȝt luciffer / aȝeine þe lawe I fecche hem

but be reson and ryth / rampson my liegges

Non veni soluere legem set adimplere

þou ffettist myn in my place / aȝeins all reson

Falseliche and ffouliche / good ffeith it me taughte

To recouere hem þoru rampson / and be no reson ellis

so þat þoru gyle þou gette / þoru grace it is wonne

þou luciffer in likenesse / of a lether edder

Gettisdest bi gile / þo þat god loued

and in likenesse of a liode / þat lord am of heuene

Graciously þi gile haue quit / go gyle aȝeins gile

and as adam and all / þoru a tre deied

adam and al þoru a tre / shul turne aȝeine to lyue

and gile is be-gilid / and in his gile ffallen

Et cecidit in foueam quam fecit

Now bigynneth þi gyle / aȝein þe to turne

and my grace to growe / ay gretter and wy{d}dere

þe bitternesse þou browe / browke it þi-self

þat art doctour of deth / drynke P þat þou madist

For I þat am lord of lyf / loue is my drynk

and ffor þat drynk P to-day / I deied vppon erthe

I ffaunte so me þrestith ȝett / ffor mannys soulis sake

may no drynke P me moiste / ne my þreste slake

Till þe vyntage ffalle / in þe vale of Iosaphath

That I drynk P rith ripe muste / resureccio mortuorum

and þan shall I come as a kyng / crouned with angellus

and haue out of helle / all manys soulis

Fendis and ffendekynnes / be-ffor me shull stande

and be at my biddinge / wher-so-euere me likith

and to be merciable to man / þan my kynde it asketh

For we be bretheren of blood / but nouȝt in baptisme all

but all þat ben myne hole bretheren / in blode and in baptisme

shull nouȝt be dampned to þe deth / þat is with-outyn endeC

Tibi soli peccam & cetera

It is not vsid in erthe / to hangyn a ffelon

ofter þan onys / þouȝ he were a traitour

and if þe kyng of þat kyngdom / come in þat tyme

þer þe ffelon þole shuld deth / or oþer Iuwise

lawe wolde he ȝaf him lyf / ȝif he loked vppon him

and I þat am kyng of kyngis / shall come swiche a tyme

wher dome to þe deth / dampneth all wicked

and if lawe wull I loke on hem / it lithe in my grace

whedir þey deye or deye nouȝt / ffor þat þei dedyn ille

be it-ony þing þe boldenesse / of her synnes

I do mercy þoruȝ rithwysnesse / & all my wordis ben trewe

and þouȝ holy writte wolle ; þat I be wroke of hem þat dedyn ille

Nullum malum impunitum & cetera

þei shull be clensid clereliche / and wasshen of here synnes

In my prison purgatorie / till parce it hote

and my mercy shall be schewid / to many of my bretheren

For bloode may suffre blode / boþe hunger and colde

but blode may not se blode blede / but him rewe

Audiui archana verba que non licet homini loqui & cetera .

but my rithwysnesse and riȝth / shall rewlen all helle

and mercy all mankynde / be-ffor me in heuene

For I were an {.}vnkynde kyng / but I my kynde holpe

and nameliche at swiche a nede / þer nedes help bihoueth

Non intres in iudicum cum seruo tuo

Thus be lawe quod oure lord / lede I woll ffrom hens

þo þat me loued / and leeued in my Comynge P

For þi lesyngis lucyffer / þat þou leighe to Eue

þou shalt abie it bitter / and bonde him with cheynes

Astrott and all þe rouȝte / hidden hem in hirnes

þey durst not loke on oure lord / þe boldest of hem all

but lete him lede fforth / what him likyd . and lete what him liste

many hundride of angellus / harped and songen

Culpat Caro purgat caro . regnat deus dei caro

Than piped pees / of poisie a note

Clarior est solito post maxima nebula phebus

post inimicicias clarior est et Amor

after scharpe schouris quod pees / most schene is þe sone

is no whedir warmer / þan after watrye cloudis P

Ne no loue leuer / ne leuer ffrendis

Than after werre and wo ; whan loue and pees be maistris

was neuer werre in þis world / ne wykkednesse so kene

þat ne loue and him lyst / to laughynge ne brouȝte

and pees þoru pacience / all perellis stopped

Trewez quod treuþe / þou tellist us soth be Ihesus

Cleppe we in comenant / and iche of us kysse oþer

and lete no peple quod pees / parceyue þat we chide

For inpossible is no þinge / to him þat is all-myȝthy

þou seist sothe quod rithwynesse / and reuerenly hyr kyste

pees and pees here / per secula seculorum

Misericordia & veritas obuiauerunt sibi Iusticia & pax osculate sunt & cetera

Treuþe tromped þo / & songe te deum laudamus & cetera

and þan lutid loue / in a lowde note

Ecce quam bonum et quam Iocundum & cetera

Till þe day dawned / þese damysellis daunced

That men rungen to þe resurexion / & riȝth with þat I waked

and callid kytte my wyff / and kalotte my doughtere

arisith and reuerencyth / godis resurexion

and crepeth to þe crosse on kneis / & kissith it ffor a Iewell

For godis blessid body it bare / ffor oure bote

and it affereth þe ffende / ffor swiche is þe myȝth

may no gresly gost / glyde þer it schadwith