Thus I awakid and wrotte / what I had dremyd

and diȝte me derely / and dede me to chirche

To here holy þe masse / þo men ȝede to offringe

þat peris þe plowman / was peyntid all blody

and come in with crosse / be-ffore comune peple

and rith like in all lymes / to oure lord Ihesu

Than callid I conscience / to kenne me þe sothe

is þis Ihesus þe Iuster quod I . þat Iewes dede to deth

or is it piers þe plowman / ho peynted him so rede

quod conscience and knelid þo / þese arn piers armes

his colours and his cote armure / but he þat comeþ so blody

is crist with his crosse / conquerour of cristene

why calle ȝe him crist quod I / sith Iewes calle him Ihesus

patriarkis and prophetis ; prophicied biffore

þat all-kynne creaturis / sholde knelyn and bowyn

Anon as men nemepned / þe name of god Ihesu

Ergo is no name / to þe name of Ihesus

ne non so nedeffull to nempne / be nyȝth ne be day

For all derk dyuyllis / arn adred to here it

and synffull ar solaced / and saued be þat name

and ȝe callyn him crist / ffor what cause telliþ me

is crist more of myȝth / and more worthi name

þan Ihesu or Ihesus / þat all oure Ioie come of

þou knowest well quod conscience / and þou konne reson

That knyght kyng conquerour / may be oo persone

To be callid a knyȝth is ffaire / ffor men shull knele to him

To be callid a kynge is ffairere / ffor he may knyttis / kny[ȝ]ttis make

and to be conquerour callid / þat cometh of speciall grace

and of hardenesse of herte / and of hendenesse

To make lordis of laddis / of londe þat he wynneth

and ffre men ffoule þrallis / þat ffolwyn not his lawis

The Iewes þat were gentell men / Ihesus þey dispisid

boþe his lore and his lawe / now ar þei lowe cherlis

as wyde as þe world is / woneth þer non

but vndir tribit and taillage / as tikes and cherlis

and þo þat bicome cristene / bi conceill of þe baptisme

arn ffrankleyns ffre men / þoru ffullynge þat þey toke

and gentell men with Ihesu / for Ihesu was ffullid

& vppon Caluarie on croisse / crouned kyng of Iewis

It becometh to a kynge / to kepe & to deffende

and conquerour of conquest / his lawes and his large

and so dede Ihesus þe Iuwes he Iustified / and tauȝt hem

þe lawe of lyff / þat laste shall euere

and ffende it ffrom ffoule euellis / ffeuerez and ffluxus

and ffro ffendis þat in hem were / and ffalse bileue

þo was Ihesus of Iewes / callid gentell prophete

and kyng of her kyngdom / and croune bare of thornes

and þo conquered he on crosse / as conquerour noble

myȝte no deth him ffor-do / ne adoun brynge

þat he ne aros and regned / and rauisshed helle

And þo was he conquerour callid / quike and of deed

For he ȝaf adam and Eue / and oþer mo blisse

þat long had leyne be-ffor / as lucyffers Cherlis

and sith he ȝaf largely / all his trewe liegis

placis in par{d}adice / at here partinge hens

he may well be callid a conqueroure / and þat is crist to mene

but þe cause þat he cometh þus / with crosse of passion

Is to wissen us þer-with / þat whan þat we be tempted

þer-with to ffyȝte ffenden us / ffro ffallynge in-to synne

and se be his sorowe / þat ho loueth Ioie

to penaunce P and to pouerte / he muste pu{s}tte him-self

and moche wo in þis world / willen and suffren /

but to carpe more of crist / and how he come {.}to þat name

Feithely ffor to speke / his ffrist name was Ihesus

Tho he was born in bedlem / as þe book tellyth

and come to take mankynde / kyngis & angellus

Reuerencyd him ffaire / with richesse of erthe

angellus out of heuene / cam knelynge and songe

Gloria in excelsis deo & cetera

kyngis comyn after / knelid and offrid

Mirre and moche gold / with-out mercy askynge

Or ony-kynnes catell / but knolechinge him ffor souereyne

boþe of sonde sonne and see / and sithen þey wente

In-to here kyngeliche / by conceille of angellus

and þer was þat word ffulffilled / þe whiche þou of speke

Omnia celestia terrestria fflectantur in hoc nomine Ihesu

For all þe angellus of heuene / at his burthe knelid

and all þe witte of þe world / was in þo þre kyngis

Reson and rithwysenesse / and reuthe þey offrede

where-ffore and why / wyse men þat tyme

maistres and lettred men / magi hem callid

þat oo kyng cam with reson / couered vndir sence

The secunde kynge eke / sotheliche offride

Rythwysnesse vndir rede gold / resons ffelawe

gold is likenede to leaute / þat laste shall euere

And reson to riche gold / to rith and to trewe

The þrede kynge þo cam / knelynge to Ihesu

and presentid him with pete / apperinge be mirre

For mirre is mercy to mene / and mylde speche of tonge

þre yliche honeste þingis / were offrid þus at onys

þoru þre kyn kyngis / knelinge to Ihesu

but ffor all þese precious presentis / oure lord prince Ihesus

was neiþer kynge ne conquerour / till he gan to wexe

in þe manere of a man / and þat be moche sleiȝhte

as it becometh a conquerour / to konne many sleightis

and many wylis & witte / þat woll be a leder

and so dede Ihesus in his daiez / who-so had tyme to telle it

some-tyme he suffred / and some-tyme he hidd him

and some-tyme he ffast ffauȝte / and ffleigh oþer-while

and some-tyme he ȝaff good / and graunted hele boþe

lyf and lyme / as him lyste he wrouȝte

as kynde is of a conquerour / and so be-gan Ihesu

Tille he had all hem / þat he ffor blede

In his Innocence þis Ihesus / at Iewene ffeste

water in-to wyne he turned / as holy writte tellith

and þer bygan god / of his grace to do well

For wyne is lykenede to lawe / and lyff of holynesse

and {...}lawe lackid þo / ffor men loued not her enemyesT

So at þe ffeste ffrist / as I beffore tolde

bygan god of his grace / and goodenesse to do well

and þo was he clepid and callid / nouȝt holy crist but Ihesus

A ffaunt ffyn ffull of witt / ffilius marie

For be-ffor his moder marie / made he þat wondir

þat she ffrist and fformeste / fferme shulde bileue

þat he þoru grace was gette / and no gome ellis

He wrouȝte þat be no witt / but þoru word on

after þe kynde þat he cam of / þer bigan he to do well

and whan he was wexen more / in his moders abscence

he made lame to lepe / and ȝaff lyȝth to blynde

and ffedde with two ffisshis / and with ffyue loffes

Sore affyngrid ffolk / mo þan ffyue thousande

þus he comfforted carefull / and cauȝte a gretter name

þe wyche was do-bett / where þat he wente

For deef þoru his doyngis to here / & dombe speke he made

and all he heled and halpe / þat him of grace asked

and þo was he callid in contre / of þe comune peple

For þe dedis þat he dede / Ihesu ffili dauid

For dauid was douȝtiest / of dedis in his tyme

breddis þan songe / saul interffecit mille & dauid decem millia

For-þi þe contre þer Ihesu come / callid him fili dauid

and nempned him of nazareth and no man so worthi

To be kaiser or kynge / of þe kyngdom of Iuda

ne ouere Iewes Iustice / as Ihesus was hem thouȝghte

where-of Caiphas had Enuye / and oþer of þe Iewes

and ffor to don him to deth / day and nyȝth þey castid

kyllid him on crosse-wyse / at caluerie on a ffriday

and sithe buried his body / and beden þat men sholde

kepen it ffro nyth-comers / with k{y}nyȝtis y-armed

For no ffrendis shulde him ffecche / ffor prophetus hem tolde

þat þat bl{.}esside body / of buriels shulde rise

and gon in-to Gallilee / and gladyn his apostlis

and his moder marie / þus men be-ffore demed

þe knȝtes þat kepten him / biknewe it hem-self

þat angellus and archangelus / er þe day sp{e}ronge

Come knelinge to þe corps / and songen Christus resurgens

verry man be-ffor hem all / and fforth with hem he ȝede

þe Iewes preied hem pees / and besouȝte þe knyghtes

Telle þe comune þat þer cam / a company of his apostlis

had biwicched hem or þey woke / and awey stole it

but marie magdalene / mette him be þe wey

Goynge towarde Gallilee / in manhede & godhide

and aleue and lokynge / and she alowde cried

In iche a company þer she cam Christus resurgens

þus cam it out / þat crist ouere-cam recouered and leued

Sic oportet Christum pati et in-trare & cetera

For þat þat women wetten / may not well be counceyll

peter parceiued all þis / and pursued after

bothe Iames and Iohan Ihesu ffor to seke

Thaddie and ten mo with thomas of ynde

and as all þese wyse weies weren to-gedris

In an hous all be-settebe-sette and her dore spered

Crist cam in all cloþid / bothe dore and yatus

To peter and his apostelis / and said pax vobis

and toke thomas be þe honde / and taughte him to groppe

and ffele with his ffyngris / his fflesshly herte

Thomas touuchid it / and with his tonge saide

deus meus et dominus meus

Thow art my lord / I beleue god lord Ihesu

þou deydest and deth tholedist / and deme shalt us alle

and now art leuynge and lokynge / and lest shalt euere

Crist carpid þanne / and curteisliche said

Thomas ffor þou trowist þis and trewliche bileuest it

blessid mote þou be / and be shalt ffor euere

and blesside mote þei be / in body and in soule

That neuere shull se me in syghte / as þou dost now

and trewlich bileue al þis / I loue hem and blesse hem

Beati qui non viderunt et crediderunt & cetera

and whan þis dede whas don / do-best he tauȝte

and ȝaff piers powere ; and pardon he graunted

To all manere men / mercy and fforȝeuenesse

his myȝth mowe man asoile / all manere synnes

In couenaunt þei come / and knoweliche to paie

To piers pardon þe plowman / Redde quod debes

Thus hath piers powere / bi his pardon paied

To bynde and to vnbynde / boþe here and ellis-where

and assoyle men of all synnes / saue of dette on

Anon after on hie vp to þe heuene

he wente and woneth þer / and woll come at þe last

and rewarde him rith well / þat reddit quod debet

and paieth parffittly / as pure trouth wolde

and what persone paieth it nouȝt / punnysshen he thenkyght

and demyn hem a domys-day / boþe quike and deed

þe good to þe godhede / and to þe grett Ioye

and wikkid to wonnen in wo with-outyn ende

Thus conscience of crist / and of þe crosse carped

and conceillid me to knele þer / and þan cam me thought

On spiritus paraclitus to piers / and to his ffellawis

In likenesse of a lightnynge P / he lighte on hem all

and made hem konne and knowe / alkyn langagis

I wondrid what þat was / and waggid conscience

and was afferde of þat liȝth / ffor in ffires likenesse

Spiritus paraclitus ouere-sprad hem all

quod concience and knelid / þis is cristis massanger

and cometh ffro þe grette god / and grace is his name

knele now quod conscience / and ȝif þou canst synge

welcome him & worschepe him / with veni creatur spiritus

Than songe I þat songe / and so dede many hundrid

and cried with conscience / helpe us god of grace

and þo bigan grace to go / with piers plowman

and conseilled him and conscience / þe comune to sompne

For I wolde dele to-day / and deuide grace

To all-kynne creaturis / þat han her ffyue wittis

Tresore to lyue by / to her lyuez ende

and wepene to ffighte with / whan antecrist yow asaylith

and ȝaf iche man a grace / to go with him-self

þat ydilnesse encombre him nouȝt / Enuye ne pride

diuisiones graciarum sunt & cetera

Some he ȝaff witt / with wordis to schewe

witte to wynne her lifflode with / as þe world asketh

as prechouris and prestis / and prentice of lawe

They trewly to leue / by laboure of her tonge

and by witt to wissen oþer / as grace hem wolde teche

and somme he kenned crafftis / and konnynge of sighte

with sellynge and beynge / her bileue to wynne

And some he lered laboure / a lele lif and trewe

and somme he tauȝte to tilie / to diche and to hegge /

To wynne with her lif-lode / bi lore of his techinge

and some to deuine and deuide / nounbris to kenne

and some to compas crafteli / and colours to make

and some to se & some to seie / what shulde be-ffalle

boþe of weell and of woo / telle it or it ffelle

as astronomyes þoru astronomye / and phelisophres wyse

and some to ride & some to recouere / þat vnriȝthffulli was wonne

he wissed hem wynne it aȝeine / þoru rithwyssnese of handis

and ffecchin it ffro ffalse men / with ffoluyles lawes

and some he lered to leue / in longynge to ben hens

In pouerte and in penaunce P / to preie ffor all Cristene

and all he lered to be trewe / and ich a crafte loue oþer

and fforbade hem all debate / þat non were amonge hem

þouȝ some be clenner þan some / ȝe se well quod grace

þat he þat vsith þe ffaireste crafte / to þe ffoulest I kowde haue put hym

loke þat non lakke oþer / but loueth all as bretherin

and þo þat moste maistris konne / be myldeste of beringe

and crouneth Conscience kynge / & makith crafte ȝoure stiward

and after craftis conceill / cloþe ȝou and ffede

For I make piers þe plowman / my procuratour & my reue

and register to resseiue / Redde quod debes

my purveour and my plowman / pers shall be on erthe

and ffor to tilie truþe / a teme shall he haue

Grace ȝaf piers a teme / ffoure grete oxen

þat on was luke a large best / and a loue cherid

and mark and matthew / þe þrede myȝthy bestis boþe

and Ioyned to hem on Iohan / þe moste gentill of alle

The pris neet of piers plow / passinge all oþer

and grace ȝaf piers / of his goodenesse ffoure stottis

all þat his oxen eried / þey to harewe after

On highte austyn and ambrose anoþer

Gregori þe greett clerk / and Ierom þe goode

þese ffoure þe ffeith to teche / ffolwyn piers teme

And harewen in an handewhile / al holy scripture

with two harewis þat þey hadde / an olde and a newe

vetus testamentum et nouum

and grace ȝaf greynes / þe cardinallis vertues

and sewe hem in mannys soule / and sithen tolde her names

spiritus prudencie þe ffrist seed highte

and who-so ete þat / ymagyne he shulde

Er he dede ony dede / devise well þe ende

and lerneth men a ladil bigge / with a longe stele

That cast ffor to kepe a crokke / to saue þe ffatte aboue

Cþe secunde heed highte spiritus temperancie

he þat ete of þat seed / it had swiche a kynde

shulde neuer mete ne moche drynnnk / make him to swelle

Ne shuld no scorner ne skolde / out of skylle him brynge

wast word of ydilnesse / ne wikkid speche move

shulde no curious cloþe / comen on his rigge

Ne no mete in his mouþe / þat maister Iohan spiced

The þred seed þat piers sew / was spiritus ffortitudinis

and ho-so ete of þat seed / hardi was euere

To suffre all þat god sent / sekenesse and angris

myghte no lesingis ne liere / ne losse of worldly catell

makyn him ffor ony murnynge / þat he nas mery in soule

and bolde and abidynge / bismers to suffre

and pleyeth al with pacience / and parce in domine

and coueren him vnder conceill / of caton þe wise

Esto forti animo cum sis dampnatus inique

The fferth seed þat piers sew / was spiritus Iusticie

and he þat ete of þat seed / sholde be euere trewe

with god and nouȝt agast / but of gyle on

For gyle goth so preuyly / þat good ffeith oþer-while

may not be aspied / ffor spiritus Iusticie

spiritus Iusticie sparith nouȝt to spille

hem þat ben giltie / and ffor to corecte

The kyng if he ffalle in gilte / or in ony tresspas

For counteth he no kyngis wrath / whan he in court sittith

To demen as a domes-man / adred was he neuere

Neiþer of duk ne of deth / þat he ne dede lawe

For present or ffor preire / or ony princes lettrez

he dede equite to all / euen-fforth his power

These ffoure seedis piers sewe / and sith he dede hem harewe

with olde lawe and newe lawe / þat loue myȝte wexe

amonge þe ffoure vertues / and vicis distroie

For comuneliche in contris / Cammokis and wedis

Foulith þe ffrute in þe ffellde / þer þei growe to-gedris

and so don vices / vertues worthy

quod piers harwen all / þat konne kyndeli witt / be conceill of þese doctours

and tillieþ after þis techinge / þe Cardinal vertues

aȝeins þi greynes quod grace to piers / bigynneth ffor to ripe

Ordeyne þe an hous / to hereborwe in þi corn

by god grace quod piers / ȝe mote ȝeue tymber

and ordeyne þat hous / er ȝe hens wende

and grace ȝaf him þe crosse / with þe croune of thornes

þat crist vppon Caluarie / ffor mankynde on pyned

and of his baptesme and blode / þat he blede on rode

he made a manere mortir / and mercy it highte

and þer-with grace bigan to make / a good ffoundement

and watled it and wallid it / with his peynes & his passion

and of holy writte / he made a roof after

and callid þat hous vnite / holy chirche in Englysshe

and whan þis dede was don / grace anon deuysed

a carte high Cristendom / to carie piers scheues

and ȝaf him caples to his carte / contricion & conffession

and made presthode hayward / þe while him-self wente

as wide as þe worlde is / with piers to tilie treuþe

now is piers to þe plowgh / and pride it aspied

and gaderid him a grett hoste / to greuen him he thenketh

blowe hem doun and breke hem / and bitte atwo þe mores

and sent fforth surquidous / his sergaunt of armes

and his spie spille loue / on speke yuell by-hinde

These two come to conscience / and to cristene peple

and tolde hem tidingis / þat tene þei shulde þe seedis

þat piers þer had sowyn / þe Cardinall vertues

and piers berne worthe brokyn / and þey þat ben in vnite

shull come out and conscience / and ȝoure two caples

Confession and contriccion / and ȝoure cart þe bileue

shall be colourid so queintely / and couered vnder oure sophistrie

That conscience shall not knowe by contricion

ne be conffession / ho is cristene or hethen

ne no manere marchaunte / þat with mony deleth

where he wynne with riȝth / with wronge or with vsurie

with swiche colours / and quentise cometh pride armed

with þe lord þat leueth / after þe lust of his body

To wasten on wellfare / and wikkid kepinge

al þe world in a while / þoru oure witt quod pride

quod Conscience to all cristene þo / my conceill is to wende

hastilich in-to vnite / and holde us well þer

and preie we þat a pees where / in piers berne þe plowman

For witterly I wott well / we be not of strenthe

CTo gon agayne pride / but grace where with us

þan come kynde witte / conscience to teche

and cried and comaundid P / all cristen peple

For to deluen and diche depe / abouȝte vnite  /

That holy chirche stonde in vnite / as it a pile were

Conscience comaundid P þo / all cristene to delue

and make a moche mott / þat myȝth be a strenthe

To helpe holy chirche / and hem þat it kepyn

þat alkynne cristen creaturis / saue comune wommen

Repenteden and reffuseden synne / saue þei on

and ffalse men fflatterrs / vsurerers and theues

lyers and questmongers / þat were ffor-swore ofte

wyttingly and wulfully / with þe ffalse helden

and ffor siluer were ffor-swore / sothely þei wiste it

Ther nas no cristen creature / þat kynde witte hadde

saue þo schrewis one / swiche as I spake of

þat he ne halpe a quantite / holynesse to wexe

Some þoru bedis biddinge / and some þoru pilgrimage

and oþer preuy penaunce / and somme þoru penaunce P delinge

and þan walkyd water / ffor wikkede werkis /

Egriliche rennynge / out of menys of menys eien

Clennesse of þe Comune / and clerkis clene leuynge

made vnite holi chirche / in holynesse to stonde

I care nouȝt quod conscience / though pride come nouthe

The lord of lust shall be letted / al þis lente I hope

Cometh quod conscience / ȝe cristen and dyneth

þat han labourid trewly / all þis lente tyme

here is bredde I-blessid / and godis body þer-vnder

Grace þoru godis word / ȝaff piers power

myȝtis to makyn it / and men to ete it after

In helpe of her hele / ones in a monthe

Or as ofte as þei had nede / þo þat had ypayed

To piers pardon þe plouman / Redde quod debes

how quod al þe comune / þou counseilis us to yelde

all þat we owen ony wyght / er we go to houusell

That is my conseill quod conscience / and Cardinall vertues

That iche man ffor-ȝeue oþer / and þat woll þe pater noster

Et dimitte nobis debita nostra & cetera

and so to ben asoilid / and sithen to ben housled

ȝe how quod a brewer / I woll be reulid

by Ihesu ffor all ȝoure Ianglynge / with spiritus Iusticie

Ne after conscience be crist / while I can selle

boþe dreggis and draff / and drawe it at an hole

Thikke ale and thynne ale / ffor þat is my kynde

and nouȝt hakke after holynesse / holde þi tonge conscience

Of spiritus Iusticie þou spekist moche an ydell

Caytif quod conscience / cursid wrecche

vnblessid art þou brewer / but if þe god helpe

and but þou leue be lore / of spiritus Iusticie

The scheff seed þat piers sewe / saued wors-þou neuere

and Conscience be comune ffode / and Cardinall vertues

leue it well þey be lost / boþe lyff and soule

Than is many a man y-lost / quod a lewde vicorie

I am a curatour of holy chirche / and come neuere in my tyme

Man to me þat Couude telle / of Cardinall vertues

Or þat countted conscience / at a kokkis ffether or an hennes

I knewe neuere Cardinall / þat he ne come ffro þe pope

and we clerkis whan þey come / ffor her comunes paydenP

For her pellure and her palffreis met / & pilours þat hem ffolwyn

The comine clamat Cotidie eche a man to oþer

The contre is þe cursider / þat cardinalis come in

and þer þei ligge and lengen / moste leccherie þer regneth

For-thi quod þis vicorie / be verri god I wolde

That no cardinall come / amonge þe comine peple

but in her holynesse / helden hem stille

at avi{s}ion amonge þe Iewis Cum sancto sanctus eris

Or in rome as her rewle wull / þe relekis to kepe

and þou Conscience in kyngis court / & shuldest neuere come þens

and grace þat þou gredist so of / gwyoure of all clerkis

and piers with his new plowȝ / and eke with his olde

Emperoure of all þe world / that all men were cristen

Inparfit is þat pope {..}That all þe peple shulde helpe

and sendith hem / þat sleth swiche / as he shulde saue C

and well worth piers plowman / þat pursueth god in doynge

qui pluit super Iustos et in-iustos at ones

and sente is sonne to saue / a cursid manys tilthe

as bright as to þe best man / and to þe best womman

Rith so piers þe plowman / peyneth him to tillie

as well ffor a wastoure / and wenchis of þe stewes

as ffor him-self and his seruauntis / saue he is ffrist serued

and traueiliþ and tillieth / ffor a traitour al-so sore

as ffor a trewe tidy man / alle tymes yliche

and wurscheped be he þat all wrouȝte / boþe good & ylle

and suffreth þat synffull be / till some-tyme þat þey repente

and god amende þe pope / þat pileth holy chirche

and claymeth be-ffore þe kynge / to be keper ouere cristenC

and Counttith nouȝt / þouȝ Cristen be kylled or robbid

and ffynte ffolk to ffyghte / and cristen blode to spille

aȝeins þe olde lawe & newe lawe / as luke þer-of wittenessith

Non occides & cetera . michi vindictam & cetera

It semeth be so / him-self had his will

That he ne recchith rith nouȝt / of all þe remenaunt P

and crist of his curteisie / þe Cardinalis saue

and turne her wytt to wisdom / and to well of soule

For þe Comune quod þis curatour / counten ffull litill

The conceill of consience / or cardinall vertues

but if þei seiȝ as be sighte / some-what to wynnynge P

of gyle ne of gabbinge / ȝeue þei no tale

For spiritus prudencie amonge þe peple is gyle

and alle þe ffaire vertues / as vices þey semed

Eche man subtiliche / a sleght / synne ffor to hide

and coloure it with konnynge P / and a clene leuynge P

Than lowȝ þer a lord / and be þis lygh said

I holde it rith and reson / of my reve to take

al þat myn endentour / or ellis my stiward

Conseille me be her acounpte / and be my clerkis writtinge

with spiritus intellectus to seke þe reves rollis

and with spiritus ffortitudinis ffecche it I wolle

and þan come þer a kyng / and be his croune said

I am kynge with Croune / þe comune to rewle

and holi chirche and clergie / ffro cursid men to deffende

and ȝif me lakke to leue by / þe {.}lawe wull þat I take it

þer I may hastlokest it haue / ffor I am heed of lawe

For ȝe ben but membris / and I aboue all

and sith I am ȝoure alder hed / I am ȝoure alder hele

and holy chirche cheff helpe / and cheffteyne of þe comine

and what I take of ȝou two / I take it at þe techinge

Of spiritus Iusticie ffor I Iuge ȝou all

So I may boldly be housled / ffor I borowed it neuere

ne craue of my comune / but as my kynde asketh

In condiccion quod conscience / þat þou konne deffende

and rewle þi reawme in reson / rith well and in trewthe

Take þou may in reson / as þi lawe asketh

Omnia tua sunt ad defendendum set non ad deprehendamdendumT

The viker had ffer home / and ffaire toke his leue

And I awakide þerwith ; and wrotte as me mette