[W]Olwerie and wetschode wente ich forth after

   As a richelees renke · þat reccheþ nat of sorwe

   And ȝeode forþ lyke a lorell · al my lyf-tyme

Til ich wax wery of þis worlde · and wilnede efte slepe

And lenede me til lenten · and longe tyme ich slepte

Of gurles and of gloria laus gretliche me dremede

And how osanna by orgne · olde men songe

On was semblable to þe samaritan and somdel to peers plouhman .

Barfot on an asse bak bootles cam prykye

With-oute spores oþer spere · and sprakliche he lokede

As is þe kynde of a knyght · þat comeþ to be doubed

To geten hus gilte spores · and galoches ycoped

Thenne was faith in a fenestre · and cryde a filij dauid .

As doþ an heraud of armes · when auntres comeþ to Iustes

Olde Iuwes of ierusalem for ioye þei songen · benedictus qui uenit in nomine domini .

Þenne ich fraynnede faith what al þat fare by-mente

And ho sholde Iusten in ierusalem . iesus he seyde

And fecche þat þe feond cleymeþ peers frut þe plouhman .

Ys peers in þis place quaþ ich · and he preynkte vpon me

Liberum dei arbitrium quaþ he · for loue haþ vndertake

That þes Iesus of hus genterise · shal Iouste in peers Armes

In hus helme and hus haberion · humana natura .

ÞaLX crist be nat knowe for · consummatus deus .

In peers plates þe plouhman thes prykere shal ryde

For no dunt shal hym dere · as in in deitate patris .

Ho shal Iouste with Iesus quaþ ich Iuwes oþer scrybes

Nay quaþ faith bote þe feond · and fals dom to deye

Deþ seith he wol for-do and a-doun brynge

Al þat lyueþ oþer lokeþ · a londe and awatere / a watere

Lyf seyth þat he lyeþ and haþ leyde hus lyf to wedde

Þat for al þat deþ can do with -Inne þre dayes

To walke and fecche fro þe feonde peers frut þe plouhman

And legge hym þer hym lykeþ · and lucifer bynde

And for-bite a-doun and brynge · bale deþ for euere

O mors tua ero mors ·

Thenne cam pilatus with muche peuple sedens pro tribunali .

To seo hou douhtiliche deþ sholde do · and deyme here beyer ryght

The Iuwes and þe Iustices aȝens Iesus þey were

And alle þe court cryede crucifige lowede

Thenne put hym apelour / a pelour by-for pilat and seyde

Thes Iesus of oure Iuwen temple · Iapede and despisede

To for-don hit on a day · and in þe þre dayes after

Edefien hit efte newe her he stant þat seyde hit

And ȝut make as muche in alle manere poyntes

Bothe as longe and as large · aloft and a-grounde

And as wyde as hit euere was · this we whitnessen alle

Crucifige quaþ a kachepol · he can of wicche-crafte

Tolle tolle quaþ anoþer · and toke of kene þornes

And by-gan of a grene þorne · a garlaunde to make

And sette hit sore in hus hefd · and suthe seyde in enuye

Aue rabi quaþ þat ribaud · a reodes shotte at hus eyen ·

And nailede hym with þre nayles naked on þe rode

And with a pole poyson putten to hus lippes

And bed hym drynke hus deþ to lette · and hus dayes lengthen

And seide yf he sotthfast beo he wol hym-self helpen

And now yf þow be criste crist godes sone of heuene

Come a-doune of þis rode and þenne wole we leyue

That lyf þe louyeþ · and wol nat lete þe deye

Consummatum est quaþ crist and comsede for to sounye

Pitousliche and paal · as prison þat deyeþ

The lord of lyf and of light · þo leyde hus eyen to-gederes

The day for drede þer-of with-drow and deork by-cam þe sonne

The wal of þe temple to-cleef · euene a two pices

The harde roche al to-rof · and ryght derk nyght semede

The erthe quook and quashete · as hit quyke were

And dede men for þat deon · comen out of deope graues

And tolden wy þat tempest · so longe tyme durede

For a byter bataile þe dede bodye seyde

Lyf and deþ in þis deorknesse her on for-doþ þat oþer

Ac shal no whitLX wite witerliche · hoshal / ho shal haue þe mastrye

Er soneday a-boute sonne rysynge and sank with þat til erthe

Somme seiden he was godes sone · þat so faire deyede . vere filius dei erat iste .

Somme seiden he can of sorcerye · good is þat we asaye

Wher he be ded oþer nat ded · doun er he be take

Two þeoues þer were þat þoleden deþ þat tyme

Vpon crois by-side crist so was þe comune lawe

Quikliche cam a cacchepol and crakede a-two here legges

And here armes after of euerich of þo þeoues

Ac þer was no boye so bolde · godes body to touche

For he was knyght and kynges sone kynde for-ȝaf þat tyme

Þat no boye hadde hardinesse hym to touche in deyynge

Ac þer cam forth a blynde knyght with kene spere y-grounde

Hihte longeus as þe lettere telleþ · and longe hadde lore hus sight

By-fore pilat and oþer peuple · in þe place he houede

Ac maugrey hus meny teþ he was mad þat tyme

To Iouste with Iesus this blynde Iuwe longeus .

For alle hij were vnhardy · þat houede þer oþer stonde

To touche hym oþer to tryne hym oþer to take hym doun and graue hym

Bote þis blynde bachelere þat bar hym þorw þe herte

The blood sprang* doun by þe sper · and vnsperrede þe knyghtes eyen

Tho feol þe knyght vpon knees · and cryed ihesus mercy

Aȝens my wil hit was quaþ he · þat ich ȝow wonde made

He syghede and seide · sore hit me for-þynkeþ

Of þe dede þat ich haue donn · ich do me in ȝoure grace

My londe and my licame · at ȝoure lykynge takeþ hit

And haue mercy on me ryghtful · ihesu ryght with þat he wepte

Thenne gan faith foully · þe false Iewes to despisen

And calde hem caytifs a-corsed · for þis was a vil vilanye

Veniaunce is to ȝou falle · þat makede þe blynde

Beten hym þat was ded · hit was a boyes dede

Corsede caityfs knyghthod was hit neuere

To bete a body ybounde with eny bryȝth wepne

Þe gree ȝut haþ he geten · for alle hus grete wondes

For ȝoure campion chiualer · chief knyght of ȝow alle

Ȝelt hym recreaunt remynge · ryght at iesus wil

For beo þis deorkenesse ydo · deþ worth venkised

And ȝe lordlinges han lost · for lyf shal haue þe maystrie

And ȝoure fraunchises þat freo was · fallen is to þraldom

And alle ȝoure children cheorles · chuuen shulle þei neuere

Ne haue lordshup in lond noþer lond tylie

And as barayne beo · and by vsure libbe

The wiche is lif þat oure lorde · in alle lawes defendeþ

Now beoþ ȝoure goode dayes don · as daniel of ȝow telleþ

When crist with crois ouer-cam ȝoure kyngdom shal to-cleue

Cum uenerit sanctus sanctorum cessabit unctio uestra .

What for fere of þis ferly and of þe false Iewes

Ich drow in þat deorknesse to descendit ad inferna .

And þer ich seyh sothliche · secundum scripturas .

Out of þe west as it were · a weynche as me þouhte

Cam walkynge in þe way · to helle-ward heLX lokede

Mercy hihte þat mayde · a mylde þing* with-alle

And a ful benyngne burde and buxum of speche

Heore sustre as hit semede · cam softly walkynge

Euene out of þe est · and westwarde he / sheo þouhte

Acomely / A comely creature and clene treuthe sheo hihte

For þe vertue þat here folwede · afered was he / sheo neuere

Whan þeos maydenes metten mercy and treuthe .

Ayþer axed of oþer · of þis grete wonder

Of þe deone and deorknesse · and how þe day roued

And wiche a light and wich aleom / a leom · lay by-fore helle

Ich haue ferly of þis fare · in faith seide treuthe

And am wendyng to wyte · what þis wonder meneþ

Haue no meruayle þer-of quaþ mercy murthe hit by-tokneþ

A mayde þat hatte Marie and moder with-oute felynge

Of eny kynde of creature · conceyuede þorw speche

And grace of þe holygost waxe gret with childe

With-oute wommen wem · in-to þis wordle brouhte hym

And þat my tale is trywe ich take god to witnesse

Sutthen þis barn was ybore · beoþ þritty wynter passed

Deyed and deþ þolede þis day a-boute mydday

That is þe cause of þis eclipse · þat ouer-closeþ now þe sonne

In menynge þat man shal fro meorknesse beo drawe

The while þis light and þis leom shal lucifer a-bleynde

For patriarkes and prophetes han prechede her-of ofte

That þyng þat tynt was þorw treo treo shal hit wynne

And þat þat deþ doun brouhte · deþ shal releue

That þat þou tellest quaþ treuþe · is bote a tale of walterot

For adam and eue . and abraham with oþere

Patriarkes and prophetes þat in peyne liggen

Leyf hit neuere þat ȝeon lyght · hem a-lofte brynge

Ne haue hem out of helle · hold þy tonge mercy

Hit is trufle þat þou tellest ich treuthe wot þe sothe

That þyng þat ones was in helle · out comeþ hit neuere

For Iob þe parfit patriarke repreoueþ þy lawes

Quia in inferno nulla est redempcio .

Thenne mercy ful myldeliche · mouþed þes wordes

Þorgh experience quaþ heo · ich hope þei shulle be sauede

For venym for-doþ venym þer vecche ich euydence

That adam & eue haue shullen bote

Of alle fretynge venymes þe vilest is þe scorpion

May no medecyne amende þe place þer he styngeþ

Til he be ded ydo þerto and þenne hit distrieþ

The ferste venemoste thorgh vertu of hym-selue

And so shal this deþ for-do · ich þar my lyf legge

Al þat deþ and þe deouel · dude formest to eue .

Ryght as þe gylour þorw gyle · by-gylede man formest

So shal grace þat al by-gan · make a good ende

And by-gyle þe gylour · and þat is a goo sleithe ars ut artem falleret .

Now suffre we saide treuthe ich seo as me thynkeþ

Out of þe nype of þe northt / north · nat ful feer hennes

Rythwisnesse come rennynge · reste we þe wyle

For he wot more þan we · he was er þan we boþe

That is soth seide mercy and ich seo her by southe

Wer comeþ pees pleyinge In pacience cloþed

Loue heore haþ coueyted longe leyue ich non oþer

Bote loue haue sent heore som lettere · what þis light by-meneþ

That ouere-houeþ helle þus · he shal ous telle

Wenne pees In pacience cloþed · aproched ayþer oþer

Ryghtwisnesse reuerencede pees in heore riche cloþinge

And prayede pees to tellen huere · to what place he wolde

In heore gay garnemens · wham he gladie þouhte

My wil is to weynde quaþ pees and wel-come hem alle

Þat meny day myghte ich nat seo · for meorknesse of synne

Adam and eue and oþer mo in helle

Moyses and meny mo mercy shullen synge

And ich shal daunce þer-to · do also þow suster

For iesus ioustede wel ioye by-gynneþ to dawen

ad uesperum demorabitur fletus & ad matutinum leticia .

Loue þat is my lemman suche letteres me sente

Þat mercy my suster and ich · mankynde shullen saue

And þat god haþ for-gyue · and graunted to al mankynde

Mercy my suster and me to maynprise hem alle

And crist haþ conuerted þe kynde of ryghtwisnesse

Into pees and pyte of hus pure grace

Lo here þe patente quaþ · pees . in pace in idipsum .

And þat þis dede shal dure

Rauest þou quaþ ryghtwesnesse · oþer þou ert right dronke

Leyuest þou þat þe ȝon light vnlouke myghte helle

And saue mannes soule · suster wene hit neuere

Ac / A[t] þe bygynnynge of þe worlde god gaf þe dom hym-selue

Þat adam and eue and hus issue alle

Sholden deye doun-right · and dwelle in peyne euere

Yf þei touchede þe treo and of þe frut eten

Adam afterwarde · a-ȝens hus defense

Faste fret of þat frut · and for-soke as hit were

The leel loue of oure lorde · and hus lore boþe

And folwede þat þe feonde tauhte and hus sheshes / fleshes wil

A-ȝens reson and ryghtwysnesse recorde þis with treuþe

That here peyne is perpetuel no preyere may hem helpe

For-thi let hem chewe as þei chose · and chide we nat susteres

For hit is a botles bale þe byte þat þei eten

And ich shal preye quaþ pees here peyne mote haue an ende

Þat here wo in-to wele wende mote atte þe laste

For hadde þei wist of no wo wele hadde þei nat knowe

For wot no whitLX wat wele is · þat neuere wo suffrede

Ne wat is hot hunger · þat hadde neuere defaute

Ho couþe kyndeliche wit · colour discriue

Hif alle þe worlde where whit oþer swan whit alle þynges

Yf no nyght were no man as ich leyue

Sholde wite whiterly · what day were to mene

Ne hadde god suffrede of som oþer þan hym-selue

He hadde nat wist wyterly weþer deþ wer sour oþer sweyte

For sholde neuere right riche man þat lyueþ in reste and hele

Ywyte what wo is · ne were þe deþ of kynde

So god þat al by-gan of hus good wil

By-cam man of a mayde · mankynde to saue

And suffrede to be solde to seo þe sorwe of deyynge

The wiche vnknytte alle care · and comsyng* is of reste

For til moreyne mete with ous · ich may hit wel a-vowe

Ne wot no whight as ich wene · what is ynowh to mene

For-thi god of hus goudnesse þe furste man Adam

He sette hym in solace furst · and in souerayne murthe

And sutthe suffrede hym to synege · sorwe to fele

To whiteLX þer-þorw wat wele was · an kyndeliche to knowe

And after auntrede god hym-self and touk adams kynde

To white what he hadde suffred in þre sondry places

Boþe in heuene and in erthe · and now to helle he þenkeþ

To wite what alle wo is · þat what of alle ioye

Omnia probate quod bonum est tenete .

So shal hit fare by þis folke · here folie and here synne

Shal lere hem what loue is and lisse with-outen ende

For wot no whight what werre is · þer as pees regneþ

Ne what whiterliche wele · til wele away hym teche

Thenne was þer a whight · with two brode eyen

Book hihte þat beau-pere · a bold man of specheP

By godes body quaþ þes book · ich wole bere wyttnesse

Tho þis barn was ybore · þer blased a sterre

Þat alle þe wise of þe worlde · in owit / o wit a-corde

Þat suche a barn was ybore in · bethleem þe cyte

Þat mannes soule sholde saue · and synne destruye

And alle þe elemens quaþ þe book here-of bereþ whitnesse

Þat he was god þat al wrouhte · þe wolkene furst shewede

To þat weren in heuene · token · stella comata .

And tenden hit as a torche to reuerence hus burthe

Þat light folwede þe lorde in-to þe lowe erthe

The water whitnessedLX þat he was god · for god wente on hym drye

Peter þe apostel · parceyuede hus gate

And as he wente vpon þe water wel hym knewe and seide

Domine iube me uenire ad te .

Loo how þe sonne gan louke hure light in huere-selue

When he sey hym suffry deþ þat sonne and see made

Lo þe erthe for heuynesse · þat he wolde deþ suffre

Quaquide as quike þyng · and alto quaschete / al toquaschete þe roches

Lo helle myghte nat holde · bote openede þo god deþ þolede

And let out symondes sones to se hym honge on rode

Non uisurum se mortem .

Now shal lucifer lyue hit · thauh hym loþ þynke

Fo / For ihesus as a gyaunt · with a gyn comeþ ȝeonde

To breken and to bete a-doun · al þat ben a-gayns hym

And to haue out alle · of hem þat hym likeþ

And ȝut ich book wol beo brent · bote he a-rise to lyue

And conforten al hus kyn and out of care brynge

And al þe Iuwene ioye · vnioyenen and vnlouken

And bote yf þei reuerencen hus resurexion · and þe rode honoure

And by-leyue on a newe lawe · beo ylost lyf and soule

Suffre we saide treuthe and huyre and seo boþe

Aspirit / A spirit speke to helle · and bit vnsperre þe ȝates

Attollite portas principes uestras & eleuamini porte eternales & cetera .

A voys loude in þat light to lucifer seide

Princes of þis palys prest vndo þe ȝates

For here comeþ with coroune · þe kynge of alle glorie ·

Thenne syhede satan · and seide to helle

Suche a light a-ȝeyns oure leue lazar hit fette

Colde care and combraunce · is come to ous alle

Yf thes kyng* comen yn · mankynde wol he fecche

And leden hit þer lazar is · and lightliche me bynde

Patriarkes and prophetes han parled her-of longe

Þat suche a lorde and a lyght shal leden hem alle hennes

Ac rys vp ragamoffyn · and reche me alle þe barres

That belial þe beel-syre · beot with þy damme

And ich shal lette þis lorde and hus light stoppe

Ar we þorw bryghtnesse be blent barre we þe ȝates

Cheke we and cheyne we · and eche chyne stoppe

Þat no light leopen yn at louer ne at loupe

And þow astrot hot out · and haue out knaues

Coltyng* and al hus kynne · oure catel to saue

Brynston boilaunt · brennyng out casteþ hit

Al hot in here heuedes þat entren ny þe walles

Setteþ bowes of brake · a brasene gonnes

And sheteþ out shot ynowh · hus shultrom to blende

Sette mahon at þe mangenel · and mulle-stones þroweþ

WhithLX crokes and with kalketrappes · a cloye we hem echone

Lusteþ quaþ lucifer · for ich þis lord knowe

Boþe þis lord and þis lyght · is longe gon ich knew hym

May no deþ þis lord dere · ne no deoueles queyntise

And wher he wolde is hus wey · ac war hym of þe periles

Yf he reue me of my ryght · he robbeþ me by mastrie

For by ryght and reson þe renkes þat beon here

Body and soule beþ myne · boþe good and ille

For he hym-self hit seide · þat syre is of helle

That adam and eue and al hus issue

Sholden deye with deol · and here dwelle euere

Yf þei touchede a treo oþer toke þer-of an appel

Thus thees lorde of light suche a lawe made

And sitthe he is so leel a lorde · ich leyue þat he wol nat

Reuen ous of oure ryght sutthe reson hem dampned

And sutthe we han beosesed / beo sesed · seuene þowsend wynter

And neuere was þeraȝeyn · and now wolde by-gynne

He were vnwrast of hus worde þat witnesse is of treweþe

That is soþ seide satan · bote ich me soreP douhte

For þow gete hem with gyle · and hus gardyn breke

Ageyn hus loue and hus leue · on hus londe ȝeodest*

Nat in forme of a feonde · bote in forme of an Addre

And entisedest eue to ete · by heore one ve soli .

And by-hihtest heore and hym . after to knowe

As to godes with god boþe good and ille

Thus with treison and with trecherie þou troiledest hem boþe

And dudest hem breke he buxumnesse þorw false by-heste

Thus haddest þou hem out · and hyder atte laste

Hit is nat greythly getyn ther gyle is þe rote

And god wol nat be by-gyled · quaþ gobelyn ne by-Iaped

We haue no triwe title to hem · for þi treison hit makeþ

For-thi ich drede me quaþ þe deouel · lest treuthe wol hem Fecche

And as þow by-gyledest godes ymage · in goynge of an addre

So haþ god by-gyled ous alle · in goynge of a wye

For god haþ go quaþ gobelyn in a gome lyknesse

This þritty wynter as ich wene · and went abowte and prechede

Ich haue asailid hym with synne · and som tyme ich askede

Wher he were god oþer godes sone · he gaf me short answere

Thus haþ he troiled and trauailed In hus tyme

Forþ like a tydy man · this to and þritty wyntere

And wenne ich seih þat he was so ich sotelide how ich myghte

Lette hem þat louede hym nat · lest þei wolde hym martrye

Ich wolde haue lengthed hus lyf · for ich leyuede yf he deyede

And hus soule huder come · he sholde shende ous alle

The body wyle hit one bones ȝeden a-boute was hit euere

To lere men to beo leel · eche man to louen oþer

The wiche lif and lawe · be hit longe yusede

Hit shal vndon ous deoueles · and don brynge ous alle

Now yseo / y seo wher hus soule comeþ · seilinge hiderwardes

WhitLX glorie and with gret light · god hit is ich wot wel

Ich rede wey fleo quaþ þe feond · faste alle hennes

For hus were betere nat beo þan a-byde in hus syghte

For-thi lesynge lucifer · we loste furst oure ioye

And out of heuene hider · thi pruede made ous falle

For we lyuede on þy lesinges þer losten we blysse

And now for a later lesynge þat þow lowe tyl eue

WheLX han lost oure lorshep · a londe and in helle Nunc princeps huius mundi

Suþþe þat satan · myssayde þus foule

Lucifer for hus lesynges · leyue ich non oþer

Bote oure lord atte laste · lyeres here rebuke

And wyten hem al þe wrecchednesse þat wrouht is on erthe

Beo yware ȝe wise clerkes · and wytty men of lawe

Þat ȝe by-gylie nat þeos men for atte laste dauid .

Whittnesseþ in hus wrytynge what is lyeres mede

Odisti omnes qui operantur iniquitatem . & perdes omnes qui loquntur mendacium .

A lytel ich ouer-lep · for lesynges sake

Þat ich ne segge as ich seih · suynge my teme

For eft þat light bad vnlouke · and lucifer answerede

What lord ert þu quaþ lucifer · a voys aloud seyde

The lord of myght and of man þat made alle þynges

Duke of þis dymme place · a-non vndo þe ȝates

That crist mowe comen In · þe kynges sone of heuene

And with þat breþ helle brake with alle beliales barres

For enywye / eny wye oþer-warde · wyde openede þe ȝates

Patriarkes and prophetes populus in tenebris

Songen with seint Iohan . ecce agnus dei .

Lucifer loke ne myghte · so lyght hym a-blente

And þo þat oure lord louede with þat lyght forth flowen

Lo me her quaþ oure lorde · lyf and soule bothe

For alle synful soules to saue oure beyere ryght

Myne þei were and of me · ich may þe beter hem cleyme

Al þauh re{c}son recorde · and ryght of my-selue

That yf þei eten þe appel alle sholden deye

Ich by-hihte hem nat here · helle for euere

For þe dedliche synne þat þei duden · thi deceite hit made

With gyle þow hem gete · a-geyn alle reson

For in my paleis paradis in persone of an Addere

Falsliche fettest þere · þat me by-feol to loke

By-glosedest hem and gyledest hem · and my gardyn breke

Aȝeyns my loue and my leyue · þe olde lawe techeþ

Þat gylours beþ by-gylid and in here gyle falle

And ho-so hitteþ out a mannes eye oþer elles hus for-teþ

Oþere eny manere membre · maymeþ oþer hurteþ

The same for shal · he haue þat enye so smyteþ

Dentem pro dente & oculum pro oculo .

So lyf shal lete þer lyf haþ lyf anyented

So þat lyf quyte lyf · þe olde lawe hit askeþ

Ergo soule shal soule quyte · and synne to synne wende

And al þat man mys-dude · ich man to amenden hit

And þat þat deþ for-dude · ich deþ to releuen

Boþe aquyte and aquykye · þat was aqueynt þorwe synne

And gyle be by-gyled · thorgh grace atte þe laste

Ars ut artem falleret . & cetera .

So leyf hit nat lucifer þat ich a-ȝens þe lawe

Fecche here eny synful soule · souereynliche by maistrie

Bo..[þe] þorgh ryght and reson · raunson here myne lige

No.[n] ueni soluere legem . sed adimplere .

So þat þorgh gyle was geten · þorwe grace is now ywonne

And as Adam and alle þorw a treo deyden ·

Adam and alle þorgh a treo shal turne to lyue

And now by-gynneþ thi gyle · agayn on þe turne

And my grace to growe · ay wydder and wydder

The biternesse þat þou hast browe · now brouk hit þy-self*

That ert doctour of deþ · drynk þat þow madest*

For ich þat am lord of lyf · loue is my drynke

And for þat drynke to daye · deyede as hit semede

Ac ich wol drynke of no dich · ne of no deep cleregie

Bote of comune coppes alle cristene soules

Ac þi drynke worth deþ · and deop helle þy bolle

Ich fauht so me fursteþ ȝut · for mannes soule sake sicio .

May no pyement ne pomade · ne presiouse drynkes

Moyste me to þe fulle · ne my þurst slake

Til þe vendage valle · in þe vale of Iosaphat .

And drynke ryght rype most Resurreccio mortuorum .

Then shal ich come as a kyng* · with coroune and with angeles

And haue out of helle · alle menne soules

Feondes and feondekenes · by-for me shullen stande

And be at my byddyng* at blysse oþer att peyne

Ac to beo merciable to man · þenne my kynde askeþ

For we beoþ broþerne of blod · ac nat in baptisme alle

Ac alle þat beoþ myn half broþerne · in blod and in baptisme

Shal neuere eft in helle come · beo he ones oute

Tibi soli peccaui & malum coram te feci . & cetera .

Hit is nat vsed on erthe · to honge eny felones

Ofter þan ones · þauh þei weren treitours

And yf þe kyng of þe kyngdom · come in þe tyme

Ther a þeof þoly sholde deþ oþer Iuwes

Lawe wolde he ȝeue hym lyf · and he lokede on hym

And ich þat am a kynge ouer kynges shal come suche tyme

Ther þat dom to þe deoþ · dampned alle wyckede

And yf lawe wol ich loke on hem hit lyth in my grace

Wheþer þei {...}deye oþer deye nat dude þei neuere so ille

Be hit eny þyng dure ybouht þe boldnesse of here synne

Ich may do mercy of my ryghtwisnesse · and alle myne wordes trywe

For holy writ wole þat ich be awreke · of hem þat wrouhte ille

As nullum malum impunitum & nullum bonum irremuneratum .

And so of alle wyckede ich wolle here take veniaunce

And ȝut my kynde in my kene yre shal contrarie my wil

Domine ne in furore tuo arguas me neque in ira tua corripias me .

To beo merciable to meny · of myne half-broþerne

For blod may seo blood boþe a þurst and a cale

Ac blod may nat seo blod · blede bote hym rewe ·

Audiui archana uerba que non licet homini loqui .

Ac my ryghtwisnesse and my right shal regnen in helle

And mercy and mankynde · by-for me in heuene

For ich were an vnkynde kynge · bote ich my kyn helpe

And nameliche at suche a neode · þat neodes help askeþ

Non intres in iudicio cum seruo tuo domine .

Thus by lawe quaþ oure lord · lede ich wol fro hennes

Alle þat ich louye · and leyuede in my comynge

Ac for þe lesynge þat þow lucifer lowe til eue .

Þow shalt abygge bitere quaþ god · and bond hym with cheynes

Astrott and alle oþere hudden hem in heornes

Thei dorste nat loken on oure lorde · þe leste of hem alle

Bote leot hym leden forth wich hym luste · and leue wiche hym lykede

Mony hundrede of aungelis harpeden þo and songen

Culpat caro purgat caro regnat deus dei caro .

Thenne pipede pees of poetes a note

Clarior est solito . post maxima nebula phebus

Post inimicicias . clarior est et amor .

After sharpest shoures quaþ pees moost shene is þe sonne

Ys no weder warmer · þan after watery cloudes

Noþer loue leuere · ne leuere freondes

Þan after werre and wrake · wanne loue and pees beon maistres

Was neuere werre in þis worlde ne wykkeder ennye

Þat loue and hym luste to lauhynge brouhte

Treuwes quaþ treuthe þou tellest soþ by · iesus

Cluppe we in couenaunt · and ech of ous cusse oþer

And leet no peuple quaþ pees parceyue þat we chide

For impossible is no þyng to hym þat is al-myghty

Þow seist soþ quaþ rightwisnisse and reuerentliche heo custe  .

pees and pees heore · per secula seculorum .

Misericordia & ueritas obuiauerunt sibi . Iusticia & pax osculate sunt .

Treuthe trompede þo · and song* te deum laudamus .

And þenne lutede loue In alowd note

Ecce quam bonum & quam iocundum est habitare fratres in unum .

Tyl þe day dawede these damseles daunsede

That men rang to þe resurectioun · and with þat ich a-wakede

And kallyd kytte my wyf · and kalote my doughter

Arys and go reuerence godes resureccioun

And creop on kneos to þe croys and cusse hit for a Iuwel

An ryghtfullokest a relyk non riccher on erthe

For godes blesside body hit bar for oure bote

And hit a-fereþ þe feonde for such is þe myghte

May no grysliche gost glyde þer hit shadeweþ ·