To rule alle rewmes wiþ  I bere itT writenT heer

Is it asseled I seyde  may men see þe lettres

Nay he seyde . I seke hym  þat haþ þe seel to kepe

And þat is crosse & cristendom  & crist þer-on to hange

And whanne it is asseled so  I woot wel þe soþe

Þat lucifers lordschip  laste schal no lenger

Latte see þi lettres quod I  we myȝte þe lawe knowe

Þanne plukkede he forþ a patent  a pece of an hard roche

Where-onne weren writen two wordis  on þis wise yglosed

Þi s was þe text truli  I toke ful good ȝeem

Þe glose was gloriousli writen  wiþ a gylt penne

Been heer alle þi lordis lawis quod I  ȝhe leue me wel he seide

Who-so wirchiþ after þis writ  I wole vndirtake

Schal neuere deuel hym dere  ne dette in soule greue

ForC þouȝ I seye it myself  I haue saued wiþ þis charme

Of men & of wommen  many score þousandis

He seiþ soþ seiþT þe heraud  I haue founden it ofte

Loo heer in my lappe  þat leuede on þat charme

Iosue & iudith  and Iudas machabeus

Ȝhe & sixti þousande biside forþ  þat been not seen heer

Ȝoure wordis been wondirful quod I which of ȝow is truest

And lellest to leue onne  for lijf & for soule

Abraham seiþ . þat he seyȝ  holli þe trinyte

Þre persoones in parcellis  departable from oþer

And alle þre but oo god  þus abraham me tauȝte

And haþ saued þat beleuede so  & sory for her synne

ICT can not segge þe summe  & summe arn in myT lappe

What nediþ þeeT þanne  a newe lawe to bigynne

Siþ þe first suffiseþ  to sauacioun & to blisse

And now bigynneþTspes & spekiþ  þat haþ aspied þe lawe

And telleþ not of þe trinyte  þat toke hym hise lettres

ToC beleue & louye  in oo lord almyȝti

And siþ . riȝt as my-self  so louye alle peple

Þe goom þat gooþ wiþ a staffe  he semeþ in gretter hele

Þan he þat gooþ wiþ two staues  to siȝt of vs alle

And riȝt so bi þe rode  resoun me scheweþ

It is liȝter to lewede men  a lessoun to knowe

Þan for to techen hem two  & to hard to lere þe leste

It is ful hard for any man  on abraham beleue

And welawey wers ȝit  for to louye a schrewe

It is liȝter to leue  in þre loueli persoones

Þan for to loue and lene  as wel lorellis as lelles

Go þi gate quod I spes  so me god helpe

Þoo þat lerenT þi laweT  litil whyle vsen it

And as we wenten þus in þe weye  wordynge to-gyderes

Þanne seyȝ we a samarithan  sittynge on a mule

Ridynge ful rapeli  þe riȝt weye we ȝeden

Comynge from a cuntree  þat men calledenTIerico

To a iustes in ierusalem  he chacede awey faste

Boþe þe heraud & hope  & he mette atC oones

Where a man was wounded  & wiþ þeues taken

He myȝte neiþer steppe ne stonde  ne stere foot ne handes

Ne helpe hym-self soþeli  for semyuyf he semedeC

And as naked as a nedel  & noon help aboute hym

Feiþ hadde first siȝt of hym  ac he fleyȝ on syde

And nolde not neyȝhe hym  bi nyne londis lenkþe

Hope cam hippynge after  &T hadde so ybosted

How he wiþ Moyses maundement  hadde many men yholpen

Ac whanne he hadde siȝt of þat segge  a-syde he gan hym drawe

Dredefulli bi þis day  as doke dooþ fram þe faucoun

Ac so soone so þe samaritan  hadde siȝt of þis leode

He liȝte a-doun of lyard  & ladde hym in his hand

And to þe wye he wente  hise woundis to beholde

And parceyuede bi his pouce  he was in perel to dye

And but if he hadde recouerer þe raþer  þat rise schulde he neuere

Wiþ wyn & wiþ oyle  hise woundis he waschede

Enbaumede hym & bonde his hed  & in his lappe hym leyde

And ladde hym so forþ on lyard  to lex christi a graunge

Wel sixe myle or seuene  bi-syde þe newe market

Herborwede hym at an ostrie  & to þe hosteler callede

And seyde . haue . kepe þis man  til I come fro þe iustis

And loo heer siluer he seyde  for salue to hise woundis

And he toke hym two pens  to lijflode as it were

And seyde . what he speneþ more  I make þee good her-after

For I may notT quod þat leode  & lyard he bistrode

And rapede hym to ierusalem-ward  þe riȝt weye to ride

Feiþ folewede after faste  & fondede to mete wiþT hym

And spes spakliche hym spedde  spede if he myȝte

To ouer-take hym & talke til hym  er þei to toune come

And whanne I seyȝ þis I soiournede not  but schope me to renne

And suede þat samaritan  þat was so ful of pite

And grauntede hym to be his groom  graunt mercy he seyde

Ac þi freend &T felaw  þou fyndest me at nede

And I þankede hym þoo  & siþ I hym tolde

How þat feiþ fleyȝ awey  & spes his felaw boþe

For siȝt of þe sorweful man  þat robbed was wiþ þeues

Haue hem excused quod he  her help may litil auayle

May no medicyne on moold  þe man to hele brynge

Neiþer feiþ ne fyne hope  so festred been hise woundis

Wiþ-outen þe blood of a barn  born of a mayden

And he be baþed in þat blood  baptised as it were

And þanne plastred wiþ penaunce  & passioun of þat baby

CAc þe smoke & þe smolder  þat smyt in oure yen

Is coueytise & vnkyndenesse  þat quencheþ goddis mercy

For vnkyndenesse is þe contrarie  of al kyns resoun

For þer nys seeke ne sory  ne noon so yuele aT wrecche

Þat he ne may louye and hym like  & lene of his herte

Good wille & good word  boþe wisschen & willen

Alle manere men  mercy & forȝyuenesse

And louye hem lijk my-selfT  & his lijf amende

I may no lenger lette quod he  & harde prikede forþT

And wenteT as wynde  & þerwiþ I awakede .